പ്രളയത്തില്‍ തകര്‍ന്ന കേരളത്തിന്റെ പുനര്‍ നിര്‍മ്മിതിയ്ക്കായി കാതോര്‍ത്ത മലയാളികള്‍ക്ക് തുടക്കത്തിലേ കല്ലുകടി നല്‍കി തോമസ് ഐസക്. കേരളത്തിലെ ബഹുഭൂരിപക്ഷം വിശ്വാസികളെ വെല്ലുവിളിച്ചുകൊണ്ട് യുവതീ പ്രവേശനവും മറ്റുമാണ് ബജറ്റില്‍ ആദ്യം പറഞ്ഞത്. ജനങ്ങള്‍ പട്ടിണി കിടക്കുമ്പോള്‍ കോടികള്‍ നവോത്ഥാനത്തിന് ചെലവാക്കുന്നത് എന്തിനെന്ന വിമര്‍ശനമാണ് വരുന്നത്. പ്രളയത്തിലെ ജനങ്ങള്‍ക്ക് മതിയായ സൗകര്യം നല്‍കാതെ വീണ്ടും മതില്‍ കെട്ടി കളിക്കുകയാണ് സര്‍ക്കാരെന്നാണ് വിമര്‍ശനം.

നവോത്ഥാനത്തെ കുറിച്ച് അറിയാനും പഠിക്കാനുമായി സമഗ്ര മ്യൂസിയം തിരുവനന്തപുരത്ത് സ്ഥാപിക്കുമെന്നാണ് ബജറ്റിലെ ആദ്യ പ്രഖ്യാപനം ഉണ്ടായത്. നവോത്ഥാനത്തെക്കുറിച്ച് സമഗ്ര പഠന മ്യൂസിയം തിരുവനന്തപുരത്ത് സ്ഥാപിക്കും. വനിതാമതില്‍ ഉയര്‍ന്ന പാതയില്‍ എല്ലാ ജില്ലകളിലും നവോത്ഥാന ആശയങ്ങളെക്കുറിച്ച് പറയുന്ന മതില്‍ച്ചിത്രങ്ങള്‍ വരയ്ക്കും. ലളിതകലാഅക്കാദമി മുന്‍കൈയെടുക്കും. സ്ത്രീ ഉന്നമനത്തിനായി പ്രവര്‍ത്തിക്കുന്ന സ്ത്രീകളിലൊരാള്‍ക്ക് വര്‍ഷത്തിലൊരിക്കല്‍ ദാക്ഷായണി വേലായുധന്റെ പേരിലുള്ള ഒരു പുരസ്‌കാരം നല്‍കും. ഇതിനായി രണ്ട് കോടി രൂപ നീക്കി വച്ചു

ശ്രീനാരായണ ഗുരുവിനെ പരാമര്‍ശിച്ച് കൊണ്ട് ധനമന്ത്രി തോമസ് ഐസകിന്റെ ബജറ്റ് അവതരണത്തിന് തുടക്കമായത്. ശബരിമല വിവാദവും വനിതാ മതിലും അടക്കം പരാമര്‍ശിച്ച് കൊണ്ടാണ് ധനമന്ത്രി ബജറ്റ് പ്രസംഗം ആരംഭിച്ചത്. കേന്ദ്ര സര്‍ക്കാരിനെ രൂക്ഷമായി വിമര്‍ശിക്കുകയും ചെയ്തു തോമസ് ഐസക്. പ്രളയം ഈ തലമുറ കണ്ട ഏറ്റവും വലിയ ദുരന്തമാണെന്ന് തോമസ് ഐസക് പറഞ്ഞു. പ്രളയത്തെ അതിജീവിച്ച കേരളത്തിന്റെ ഐക്യത്തെക്കുറിച്ച് പറയുന്നതിനൊപ്പം മത്സ്യത്തൊഴിലാളികളുടെയും പൊതുജനത്തിന്റെയും പ്രവാസികളുടേയും സംഭാവനകളേയും ധനമന്ത്രി പരാമര്‍ശിക്കാന്‍ മറന്നില്ല.

എന്നാല്‍ പ്രളയത്തിന് ശേഷം കേരളത്തോട് കേന്ദ്രം ക്രൂരതയാണ് കാട്ടിയതെന്ന് ഐസക് കുറ്റപ്പെടുത്തി. കേരളത്തോട് എന്തിനിത്ര ക്രൂരതയെന്ന് തോമസ് ഐസക് ചോദിച്ചു. പ്രളയത്തിന് ശേഷം കേന്ദ്രസര്‍ക്കാര്‍ കേരളത്തിനുളള വായ്പ വെട്ടിച്ചുരുക്കി. കേരളത്തിന്റെ ആവശ്യങ്ങളോട് കേന്ദ്രം മുഖം തിരിച്ചു. സംസ്ഥാനങ്ങളുടെ ആവശ്യം പരിഗണിക്കുന്ന സര്‍ക്കാര്‍ കേന്ദ്രത്തില്‍ വരണം. പ്രളയത്തില്‍ നഷ്ടമായതെല്ലാം കേരളം 2020ഓടെ തിരിച്ച് പിടിക്കുമെന്നും ഐസക് പറഞ്ഞു.

ശബരിമല വിവാദവും തോമസ് ഐസക് ബജറ്റ് പ്രസംഗത്തില്‍ ഉള്‍പ്പെടുത്താന്‍ മറന്നില്ല. പ്രളയത്തിന് ശേഷം കേരളം കണ്ട രണ്ടാമത്തെ ദുരന്തമായിരുന്നു ശബരിമല പ്രക്ഷോഭം എന്ന് തോമസ് ഐസക് പറഞ്ഞു. ശബരിമല വിധിയെ വര്‍ഗീയ ധ്രുവീകരണത്തിന് ഉപയോഗിച്ചു. അതേസമയം സ്ത്രീകള്‍ പാവകളല്ലെന്ന പ്രഖ്യാപനമായിരുന്നു വനിതാ മതിലെന്നും തോമസ് ഐസക് കൂട്ടിച്ചേര്‍ത്തു.

കേരളത്തിന്റെ പുനര്‍ നിര്‍മ്മാണത്തിനായി വലിയ പദ്ധതികള്‍ ഇത്തവണത്തെ ബജറ്റിലുണ്ടാകുമെന്ന് ധനമന്ത്രി തോമസ് ഐസക് നേരത്തെ പറഞ്ഞിരുന്നു. പ്രളയം ഏറ്റവും കൂടുതല്‍ നാശനഷ്ടമുണ്ടാക്കിയ പ്രദേശങ്ങളുടെ പുനര്‍നിര്‍മ്മാണത്തിന് പ്രത്യേകമായി പദ്ധതികളാവിഷ്‌കരിച്ചിട്ടുണ്ട്. അതോടൊപ്പം തന്നെ നിരവധി ക്ഷേമ പദ്ധതികളും പ്രഖ്യാപിക്കുമെന്നും തോമസ് ഐസക് പറഞ്ഞു.ജനപ്രിയ ബജറ്റാകുന്നതിനൊപ്പം തന്നെ കേരളത്തെ ഒരു സുസ്ഥിര വികസന ധനസ്ഥിതിയിലേക്ക് നയിക്കുന്ന ബജറ്റാകും അവതരിപ്പിക്കുക. സംസ്ഥാനം വലിയ സാമ്ബത്തിക പ്രതിസന്ധി നേരിടുകയാണെന്നും അതുകൊണ്ടു തന്നെ ഏറ്റവും വലിയ വെല്ലുവിളി നേരിട്ട ബജറ്റാണ് ഇത്തവണത്തേതെന്നും ധനമന്ത്രി പറഞ്ഞിരുന്നു. പ്രളയസെസ് വിലക്കയറ്റത്തിന് കാരണമാകില്ല. നികുതി ചോര്‍ച്ച തടയാന്‍ കര്‍ശന നടപടിയുണ്ടാകുമെന്നും ധനമന്ത്രി ഉറപ്പു നല്‍കിയിട്ടുണ്ട്