ധനമന്ത്രി ഡോ. തോമസ് അവതരിപ്പിച്ച ബജറ്റ് സമ്മാനിക്കുന്നത് വിലക്കയറ്റത്തിന്റെ നാളുകള്‍. 3000 ചതുരശ്ര അടി മുതല്‍ മുകളിലോട്ടുള്ള ആഢംബര വീടുകള്‍ക്ക് 5000 മുതല്‍ 7000 രൂപ വരെ നികുതി ഏര്‍പ്പെടുത്തി. സ്വര്‍ണം, വെള്ളി, പ്ലാറ്റിനം, സിമന്റ്, സെറാമിക് ടൈല്‍സ്, ഗ്രാനൈറ്റ്, ആയൂര്‍വേദ മരുന്നുകള്‍, പാക്കറ്റ് ഭക്ഷണങ്ങള്‍, സിനിമാ ടിക്കറ്റ്, മൊബൈല്‍ ഫോണുകള്‍, കമ്പ്യൂട്ടറുകള്‍, മറ്റ് ഇലക്ട്രോണിക്‌സ് ഉല്‍പ്പന്നങ്ങള്‍, സോപ്പ്, സിഗരറ്റ്, സൗന്ദര്യവര്‍ദ്ധക വസ്തുക്കള്‍, മദ്യം, ബിയര്‍, വൈന്‍, ഫര്‍ണിച്ചറുകള്‍, ടൂത്ത് പേസ്റ്റ്, നോട്ട്ബുക്ക്, ഡിഷ് വാഷ്, ചെരുപ്പ്, പഞ്ചസാര, മിനറല്‍ വാട്ടര്‍, ഐസ്‌ക്രീം, ഹെയര്‍ ഓയില്‍, കണ്ണട, ശീതളപാനീയങ്ങള്‍, സ്‌കൂള്‍ബാഗ്, കാര്‍, ടൂ വിലര്‍ എന്നിവയ്‌ക്കെല്ലാം വില കൂടും.

12 മുതല്‍ 28 ശതമാനം വരെ ജി.എസ്.ടി ഏര്‍പ്പെടുത്തിയിട്ടുള്ള ഉല്‍പ്പന്നങ്ങള്‍ക്ക് രണ്ട് വര്‍ഷത്തേക്ക് ഒരു ശതമാനം പ്രളയ സെസ് ഏര്‍പ്പെടുത്തി. സ്വര്‍ണത്തിനും വെള്ളിക്കും രണ്ട് വര്‍ഷത്തേക്ക് 0.25 ശതമാനം സെസ് ആണ് ഏര്‍പ്പെടുത്തിയത്. അഞ്ച് ശതമാനത്തിന് മുകളില്‍ ജി.എസ്.ടി ഏര്‍പ്പെടുത്തിയ ഉല്‍പ്പന്നങ്ങള്‍ക്ക് 0.55 ശതമാനം സെസ് ആണ് ഏര്‍പ്പെടുത്തിയത്. മദ്യത്തിന് രണ്ട് ശതമാനം സെസ് ചുമത്തും. ചെറുകിട വ്യാപാരികളെ പ്രളയ സെസില്‍ നിന്ന് ഒഴിവാക്കി. ജി.എസ്.ടി രജിസ്‌ട്രേഷന്‍ പരിധി 20 ലക്ഷത്തില്‍ നിന്ന് 40 ലക്ഷമാക്കി ഉയര്‍ത്തി. സര്‍ക്കാര്‍ സേവനങ്ങള്‍ക്കുള്ള നികുതി അഞ്ച് ശതമാനമായി വര്‍ദ്ധിപ്പിച്ചു. ആഢംബര സെസ് ഏര്‍പ്പെടുത്തിയതെന്ന് പറയുമ്പോഴും സാധാരണ ഉപോയഗിക്കുന്ന സോപ്പ്, ടൂത്ത് പേസ്റ്റ്, മൊബൈല്‍ഫോണുകള്‍, ബൈക്കുകള്‍, സ്‌കൂള്‍ബാഗ്, ഐസ്‌ക്രീം, പഞ്ചസാര എന്നിവയ്ക്ക് വില കൂടുന്നത് ഉദാഹരണം.

നിര്‍മാണ മേഖലയ്ക്ക് വലിയതിരിച്ചടിയാണ് ഈ ബജറ്റ് സമ്മാനിക്കുന്നത്. സിമന്റ് അടക്കമുള്ള നിര്‍മാണ സാമഗ്രികള്‍ക്ക് അധിക നികുതി ഏര്‍പ്പെടുത്തി. തകര്‍ന്നിരിക്കുന്ന നിര്‍മാണ മേഖലയ്ക്ക് ഇത് വലിയ തിരിച്ചടിയാണ്. ഫര്‍ണിച്ചറുകള്‍ക്കും വില കൂടും. ഇത് സാധാരണക്കാരന് സാമാന്യം നല്ല വീട് വയ്ക്കാന്‍ പറ്റാത്ത സ്ഥിതിയിലേക്ക് കാര്യങ്ങളെത്തിക്കും. അതുപോലെ സര്‍ക്കാര്‍ സേവനങ്ങള്‍ക്ക് നികുതി വര്‍ദ്ധിപ്പിച്ചത് സാധാരണക്കാരെ ബുദ്ധിമുട്ടിലാക്കും. ജനനമരണ സര്‍ട്ടിഫിക്കറ്റ് മുതല്‍ എല്ലാ സേവനങ്ങള്‍ക്കും ഇനി ഫീസ് വര്‍ദ്ധിക്കും. ഇത് വഴി സാധാരണക്കാരുടെ കുടുംബ ബജറ്റിന്റെ താളം തെറ്റും. മിനറല്‍ വാട്ടറിന്റെ വില കുറയ്ക്കാന്‍ പല കമ്പനികളും തയ്യാറായി മുന്നോട്ട് വന്ന സാഹചര്യത്തിലാണ് അതിന് നികുതി വര്‍ദ്ധിപ്പിച്ച് സര്‍ക്കാര്‍ ഇരുട്ടടി നല്‍കിയിരിക്കുന്നത്.

സ്വര്‍ണത്തിന് സെസ് ഏര്‍പ്പെടുത്തിയത് പാവപ്പെട്ടവരെയും നേരിട്ട് ബാധിക്കും. വിവാഹങ്ങള്‍ക്ക് സ്വര്‍ണം വാങ്ങുക എന്നത് മിഡില്‍ ക്ലാസ് കുടുംബങ്ങള്‍ക്ക് പോലും പ്രയാസമായ കാലമാണ്. പലരും വായ്പയെടുത്തും മറ്റുമാണ് മക്കളുടെ വിവാഹത്തിന് സ്വര്‍ണം വാങ്ങുന്നത്. അവര്‍ക്ക് വലിയ തിരിച്ചടിയാണ് അധിക സെസ്. കാരണം സ്വര്‍ണം ആഢംബരമായി ഉപയോഗിക്കുന്നത് വളരെ കുറച്ച് ആളുകളാണുള്ളത്. സംസ്ഥാനത്തെ പ്രായമായവരടക്കം ധാരാളം പേര്‍ ആയൂര്‍വേദ ചികില്‍സ തേടുന്നവരാണ്. ആയൂര്‍വേദ മരുന്നുകളുടെ വിലക്കയറ്റം അവരെ ആശങ്കയിലാഴ്ത്തുന്നുണ്ട്. നിര്‍മാണ സാമഗ്രികളുടെ വില വര്‍ദ്ധനവ് പ്രളയത്തില്‍ വീടും കടകളും മറ്റ് സ്ഥാപനങ്ങളും നഷ്ടപ്പെട്ടവര്‍ക്ക് വലിയ തിരിച്ചടിയാകുമെന്നതില്‍ സംശയമില്ല.