കാമുകനൊപ്പം ജീവിക്കാന്‍ നാലുവയസുകാരിയായ മകളെ കൊന്ന റാണി ഇനി വെളിച്ചം കാണില്ല. കേസില്‍ പോസ്‌ക്കോ കോടതി വിധിച്ച ഇരട്ട ജീവപര്യന്തം റദ്ദാക്കണമെന്ന് ആവശ്യപ്പെട്ട് റാണി നല്‍കിയ ഹര്‍ജി ഹൈക്കോടതി തള്ളി. കേസിലെ ഒന്നാം പ്രതിയും റാണിയുടെ കാമുകനുമായ രഞ്ജിത്തിന് വധശിക്ഷയാണ് കോടതി വിധിച്ചത്. രണ്ടാം പ്രതിയായ റാണി, സുഹൃത്ത് തിരുവാണിയൂര്‍ ബേസില്‍ എന്നിവര്‍ക്ക് ഇരട്ട ജീവപര്യന്തം തടവിനുമാണ് എറണാകുളം പോക്‌സോ കോടതി ശിക്ഷിച്ചത്. 2013 ഒക്ടോബര്‍ 29 നായിരുന്നു മനുഷ്യമനസാക്ഷിയെ ഞെട്ടിച്ച കൊലപാതകം നടന്നത്. തന്റെ അവിഗിതബന്ധത്തിന് തടസമാണെന്ന് കരുതിയാണ് മകളെ റാണിയും കാമുകന്‍ രഞ്ജിത്തും ചേര്‍ന്ന് കൊലപ്പെടുത്തിയത്.

കൊലപാതകത്തിന് ശേഷം മകളെ കാണാനില്ലെന്ന് കാട്ടി റാണി പൊലീസില്‍ പരാതി നല്‍കുകയായിരുന്നു. എന്നാല്‍ റാണിയുടെ മൊഴിയിലും ഇടപെടലിലും സംശയം തോന്നിയ പൊലീസ് കൂടുതല്‍ ചോദ്യം ചെയ്തപ്പോഴാണ് കൊലപാതകത്തിന്റെ ചുരുളഴിഞ്ഞത്. രഞ്ജിത്താണ് കുട്ടിയെ കൊലപ്പെടുത്തിയത്. റാണിയുടെ ഭര്‍ത്താവ് കഞ്ചാവ് കേസില്‍ ജയിലിലായിരുന്ന സമയത്താണ് കൊലപാതകം നടന്നത്. റാണിക്ക് വര്‍ഷങ്ങളായി രഞ്ജിത്തുമായി വിവാഹേതരബന്ധം ഉണ്ടായിരുന്നു. അതിനിടെ രഞ്ജിത്തിന്റെ സുഹൃത്തായ ബേസില്‍ റാണിയുടെ സഹോദരന്‍ എന്ന വ്യാജേന വാടക വീട്ടില്‍ കഴിയുകയായിരുന്നു. കൊല്ലപ്പെട്ട കുട്ടിയം ലൈംഗിക പീഡനത്തിനും ഇരയായിട്ടുണ്ടെന്ന് പോസ്റ്റ്‌മോര്‍ട്ടം റിപ്പോര്‍ട്ടില്‍ കണ്ടെത്തിയിരുന്നു.

റാണിയുടെ മകളെ രഞ്ജിത്ത് ഉപദ്രവിക്കാന്‍ ശ്രമിച്ചപ്പോള്‍ ഉറക്കെ കരഞ്ഞു. അതോടെ മുഖം പൊത്തിപ്പിടിച്ച് കഴുത്തില്‍ കൈമുറുക്കിയ ശേഷം എറിയുകയായിരുന്നു. മരണം ഉറപ്പാക്കിയതോടെ റാണിയുടെ നിര്‍ദേശപ്രകാരം മൃതദേഹം ആരക്കുന്നത്ത് കുഴിച്ച് മൂടുകയായിരുന്നു. കേസില്‍ കുറ്റക്കാരനെന്ന് തെളിഞ്ഞതോടെ രഞ്ജിത്ത് ആത്മഹത്യയ്ക്ക് ശ്രമിച്ചിരുന്നു. സംഭവം നടക്കുമ്പോള്‍ റാണിയും ബേസിലും വീട്ടിലുണ്ടായിരുന്നില്ല. അവര്‍ എത്തിയപ്പോള്‍ രഞ്ജിത്ത് മൃതദേഹം ടെറസിന്റെ മുകളില്‍ ഒളിപ്പിച്ചിരുന്നു. പിന്നീട് റാണിയാണ് കുട്ടിയുടെ മൃതദേഹം ആളൊഴിഞ്ഞ പറമ്പില്‍ കുഴിച്ചു മൂടാന്‍ നിര്‍ദേശിച്ചത്.

ഒന്നാം പ്രതിയായ രഞ്ജിത്തിന് എറണാകുളം പോക്‌സോ കോടതി ഇന്ന് വധശിക്ഷ വിധിച്ചിരുന്നു. റാണിക്കും സുഹൃത്ത് തിരുവാണിയൂര്‍ കരിക്കോട്ടില്‍ ബേസിലിനും ഇരട്ട ജീവപര്യന്തം തടവും കോടതി വിധിച്ചു. രഞ്ജിത്ത് 50,000 രൂപയും റാണിയും ബേസിലും 25,000 രൂപ വീതം പിഴയും ഒടുക്കണമെന്നും കോടതി വിധിച്ചിരുന്നു. അതിനെതിരെയാണ് റാണി ഹൈക്കോടതിയെ സമീപിച്ചത്. ലോകത്തൊരമ്മയും മക്കളോട് കാണിക്കാത്ത തരത്തിലുള്ള ക്രൂരതയാണ് റാണി മകള്‍ അക്ഷയോട് കാണിച്ചത്. അതുകൊണ് പോസ്‌ക്കോ കോടതി റാണിയെ ബയോളജിക്കല്‍ മദര്‍ എന്ന് മാത്രം വിശേഷിപ്പിച്ചത്.

തലയോടും വാരിയെല്ലും പൊട്ടിയ ഒരു നാല് വയസ്സുകാരിയുടെ മൃതദേഹം ഒരു വികാരവുമില്ലാതെയാണ് റാണി സമീപിച്ചതെന്ന് നാട്ടുകാര്‍ ആക്ഷേപിച്ചിരുന്നു. മറ്റാരും അറിയാതെ സ്വന്തം കുഞ്ഞിന്റെ മൃതദേഹം മറവ്‌ചെയ്യാനും അതിന് ശേഷം യാതൊരു കൂസലുമില്ലാതെ പൊലീസിന് പരാതി നല്‍കാനും റാണിക്കായി. പെറ്റമകളേക്കാള്‍ പ്രാധാനം രഹസ്യ ബന്ധത്തിന് റാണി നല്‍കിയത് കേരള മന:സാക്ഷിയെ ഞെട്ടിച്ചിരുന്നു. ഇതെല്ലാം കണക്കിലെടുത്താണ് കൊലപാതകം മറച്ചുവെയ്ക്കാന്‍ ശ്രമിച്ച റാണിക്ക് കോടതി ഇരട്ടജീവപര്യന്തം ശിക്ഷിച്ചത്.