പ്രളയദുരിതങ്ങളെ മറികടക്കാന്‍ സര്‍ക്കാര്‍ ഏര്‍പ്പെടുത്തുന്ന അധികനികുതി മരുന്നുവില കൂട്ടുമെന്ന് ഉറപ്പായി. 12 ശതമാനം മുതല്‍ ജി.എസ്.ടി.യുള്ള ഉത്പന്നങ്ങള്‍ക്ക് രണ്ടുവര്‍ഷത്തേക്ക് അധികമായി ഒരുശതമാനം സെസ് ചുമത്താനാണ് തീരുമാനം. വിപണിയിലുള്ള മരുന്നുകളുടെ 77 ശതമാനവും ഈ വിഭാഗത്തിലുള്ളതാണ്. 12 ശതമാനം സ്ലാബിലുള്ള മരുന്നുകളാണ് വിപണിയില്‍ കൂടുതല്‍ വിറ്റുപോകുന്നത്.

ചരക്ക് സേവന നികുതി നടപ്പായപ്പോള്‍ മുതല്‍ മരുന്നു നികുതിനിരക്ക് കുറയ്ക്കുമെന്ന് പറഞ്ഞിരുന്നു. ഉയര്‍ന്ന നിരക്കിലുള്ള മരുന്നുകളുടെ വിശദവിവരം ശേഖരിക്കുകയും ചെയ്തു. എന്നാല്‍ വിരലിലെണ്ണാവുന്നവയ്ക്കു മാത്രമാണ് നികുതികുറച്ചത്.

അയല്‍സംസ്ഥാനങ്ങളിലും മറ്റും 12 ശതമാനം നികുതിക്ക് മരുന്ന് കിട്ടും. വിലയിലെ ഈ വ്യത്യാസം കാരണം മറ്റു സംസ്ഥാനങ്ങളില്‍ നിന്നുള്ള മരുന്നുകടത്ത് തുടങ്ങാന്‍ സാധ്യതയുണ്ട്.  ഇത് വ്യാപാരത്തെ ബാധിക്കുമെന്ന ആശങ്കയിലാണ് ചില്ലറമരുന്ന് വ്യാപാരികള്‍.