വടക്കഞ്ചേരി, പന്തലാംപാടം പനംങ്കുറ്റി വാല്‍ക്കുളമ്പ് മലയോരപാതയില്‍ കാട്ടാനയിറങ്ങുന്ന പനംങ്കുറ്റി പോത്തുചാടി ഭാഗത്ത് വനംവകുപ്പ് സ്ഥാപിച്ചിട്ടുള്ള മുന്നറിയിപ്പു ബോര്‍ഡിനുനേരെ സാമൂഹ്യവിരുദ്ധരുടെ പരാക്രമം. പനംങ്കുറ്റി ഭാഗത്തെ മുന്നറിയിപ്പു ബോര്‍ഡ് കരിഓയില്‍ ഒഴിച്ച് നശിപ്പിച്ചു.

ആനയുടെ പടം കാണിക്കുന്ന ഭാഗം കാണാത്തവിധമാണ് കരിഓയില്‍ അഭിഷേകം. കാട്ടാനകളുടെ സാന്നിധ്യമുള്ള പ്രദേശം എന്നതും മായ്ച്ചിട്ടുണ്ട്. സ്ഥിരമായി ആനയിറങ്ങി വാഹനങ്ങള്‍ക്കുനേരെ ആക്രമണം ഉണ്ടായപ്പോഴാണ് ഇവിടെ പീച്ചി വന്യമൃഗ സംരക്ഷണകേന്ദ്രം പാതയോരത്ത് രണ്ടിടത്തായി മാസങ്ങള്‍ക്കുമുന്പ് ബോര്‍ഡ് സ്ഥാപിച്ചത്.

രാത്രികാലങ്ങളില്‍  കാട്ടാനക്കൂട്ടം റോഡു മുറിച്ചുകടന്നാണ് സ്വകാര്യ കൃഷിയിടങ്ങളിലേക്ക് ഇറങ്ങുന്നത്. ആനയിറങ്ങി വിളകളെല്ലാം നശിപ്പിക്കുമ്പോഴും വനംവകുപ്പ് നടപടി സ്വീകരിക്കുന്നില്ലെന്ന പരാതി കര്‍ഷകര്‍ക്കുണ്ട്.പോത്തുചാടി വാച്ചര്‍ഷെഡ് മുതല്‍ പനംങ്കുറ്റി ക്രഷര്‍ വരെ ഒന്നരകിലോമീറ്റര്‍ ദൂരം ആളൊഴിഞ്ഞ ഉയര്‍ന്ന പ്രദേശമാണ്.

ഇതിനാല്‍ മദ്യപസംഘങ്ങളും ഇവിടം താവളമാക്കുന്നുണ്ട്. ബോര്‍ഡ് നശിപ്പിച്ചവരെ കണ്ടെത്താന്‍ രഹസ്യാന്വേഷണം പുരോഗമിക്കുകയാണെന്ന് വനംവകുപ്പ് അധികൃതര്‍ പറഞ്ഞു.