ശബരിമല തീര്‍ത്ഥാടകര്‍ക്കുവേണ്ടി ദക്ഷിണ പശ്ചിമ റയില്‍വേ രണ്ടു ശബരിമല പ്രീമിയം സ്‌പെഷല്‍ ട്രെയിന്‍ കൂടി അനുവദിച്ചു. കഴിഞ്ഞ മാസം നാലു സര്‍വീസ് നടത്തിയ കന്റോണ്‍മെന്റ് - തിരുവനന്തപുരം ട്രെയിനാണ് ഈ മാസം ഇരുദിശകളിലേക്കുമായി നാലു സര്‍വീസ് കൂടി നടത്തുന്നത്. പക്ഷേ ഈ ട്രെയിന്‍ 21നു സര്‍വീസ് അവസാനിപ്പിക്കുമെന്നതിനാല്‍ ക്രിസ്മസ് അവധിക്കു നാട്ടില്‍ പോകുന്നവര്‍ക്കു പ്രയോജനപ്പെടില്ല.

ശബരിമലയിലേക്കു കര്‍ണാടകയില്‍നിന്നുള്ള കനത്ത തിരക്ക് ഈ മാസം അവസാനമാണെന്നതിനാല്‍ തീര്‍ഥാടകര്‍ക്കും ഇതു പൂര്‍ണ സംതൃപ്തി നല്‍കില്ല. ഈ മാസം 15നും 20നും തിരുവനന്തപുരത്തേക്കും 16നും 21നും അവിടെനിന്നു ബെംഗളൂരുവിലേക്കുമാണു ട്രെയിന്‍ സര്‍വീസ് നടത്തുക. 15നും 20നും വൈകിട്ട് 7.15നു കന്റോണ്‍മെന്റില്‍നിന്നു പുറപ്പെടുന്ന ട്രെയിന്‍ (നമ്പര്‍ 02657) പിറ്റേന്നു രാവിലെ 8.20നു തിരുവനന്തപുരത്തെത്തും.

16നും 21നും തിരുവനന്തപുരത്തുനിന്നു വൈകിട്ട് ഏഴിനു പുറപ്പെടുന്ന മടക്ക ട്രെയിന്‍ (നമ്പര്‍ 02658) ബെംഗളൂരു കന്റോണ്‍മെന്റില്‍ പിറ്റേന്നു രാവിലെ 8.10ന് എത്തും. ഒരു ടു ടിയര്‍ എസി, മൂന്നു 3-ടിയര്‍ എസി, ഒന്‍പതു സ്ലീപ്പര്‍ കോച്ചുകള്‍, രണ്ടു ലഗേജ് കംപാര്‍ട്‌മെന്റ് ഉള്‍പ്പെടെ 15 കോച്ചുകളാണു ട്രെയിനിലുണ്ടാവുക.
അടിസ്ഥാന ടിക്കറ്റ് ചാര്‍ജ് സാധാരണ ട്രെയിനിലേതിനു സമാനമാണെങ്കിലും തിരക്കു കൂടുന്നതനുസരിച്ച് ഈ നിരക്കു നാലിരട്ടിയോളം കൂടുമെന്നതാണു പ്രീമിയം ട്രെയിന്‍ യാത്രയിലെ കല്ലുകടി. 450 രൂപ അടിസ്ഥാന നിരക്കുള്ള സ്ലീപ്പര്‍ ക്ലാസ് ടിക്കറ്റിന് ഏറെ തിരക്കുള്ള ദിവസം 1450 രൂപ വരെയാകും ടിക്കറ്റ് ചാര്‍ജ്.

 അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha