ലോക്‌സഭാ തെരഞ്ഞെടുപ്പിന്റെ പടിവാതില്‍ക്കല്‍ എത്തിനില്‍ക്കുമ്പോഴും ശബരിമല യുവതീപ്രവേശനത്തില്‍ നിലപാട് കടുപ്പ് സംസ്ഥാന സര്‍ക്കാര്‍. യുവതികള്‍ എത്തിയാല്‍ ശബരിമല അയ്യപ്പന്റെ ബ്രഹ്മചര്യത്തെ ബാധിക്കില്ല. 10 വയസുള്ള പെണ്‍കുട്ടികള്‍ എത്തിയാല്‍ അയ്യപ്പന്റെ ബ്രഹ്മചര്യത്തെ ബാധിക്കുമെന്ന വാദം സ്ത്രീകളുടെ അന്തസിനെ ഹനിക്കുന്നതാണ്. 2007 വരെ തിരുവിതാംകൂര്‍ ദേവസ്വം ബോര്‍ഡില്‍ 35 വയസ് വരെയുള്ള സ്ത്രീകള്‍ അംഗമായിരുന്നു. യുവതികള്‍ക്ക് ബോര്‍ഡ് അംഗമാകാമായിരുന്നെങ്കില്‍ അവര്‍ക്ക് ദര്‍ശനം നത്തുന്നതിനും തടസമില്ലെന്നും സര്‍ക്കാര്‍ കോടതിയെ അറിയിച്ചു. പുനപ്പരിശോധനാ ഹര്‍ജികളിലെ നിലപാട് കോടതിയില്‍ എഴുതി നല്‍കിയപ്പോഴാണ് ഇക്കാര്യങ്ങള്‍ വ്യക്തമാക്കിയത്. യുവതീപ്രവേശന വിഷയത്തില്‍ തുടക്കം മുതല്‍ സ്വീകരിച്ച് വന്ന നിലപാടില്‍ നിന്ന് അണുകിട വ്യതിചലിക്കില്ലെന്ന വ്യക്തമായ സൂചനയാണ് സര്‍ക്കാര്‍ നല്‍കുന്നത്.

സ്ത്രീകളുടെ അന്തസിനെയും അഭിമാനത്തെയും ഹനിക്കുന്ന ഒരു ആചാരവും അനുവദിക്കരുതെന്നും രാജ്യത്തെ മറ്റ് അയ്യപ്പക്ഷേത്രങ്ങളില്‍ യുവതികള്‍ പ്രവേശിക്കുന്നുണ്ടെന്നും സര്‍ക്കാര്‍ അറിയിച്ചു. യുവതികളെ വിലക്കുന്നത് ശബരിമലയിലെ പ്രധാന ആചാരമല്ല. അതിനാല്‍ അഞ്ചംഗ ഭരണഘടനാ ബെഞ്ചിന്റെ വിധി പുനപ്പരിശോധിക്കരുതെന്നും സര്‍ക്കാര്‍ എഴുതി നല്‍കി. കുംഭമാസ പൂജകള്‍ക്ക് നടതുറന്നിരിക്കുന്ന സാഹചര്യത്തിലാണ് സര്‍ക്കാരിന്റെ നിലപാട് പുറത്ത് വന്നിരിക്കുന്നത്. ഇത് ബി.ജെ.പിയേയും ശബരിമല കര്‍മസമിതിയേയും എന്‍.എസ്.എസിനേയും ചൊടിപ്പിച്ചിരിക്കുകയാണ്. യുവതീപ്രവേശനം അനുവദിച്ച വിധി സ്വാഗതം ചെയ്യുന്നെന്ന ദേവസ്വം ബോര്‍ഡിന്റെ നിലപാടിനെതിരെ വ്യാപക പ്രതിഷേധം ഉയരുന്നതിനിടെയാണ് സര്‍ക്കാര്‍ നിലപാട് പുറത്തായത്.

യുവതീപ്രവേശന വിഷയത്തിലല്ല, സഹായഹര്‍ജിയിന്‍മേലുള്ള നിലപാടാണ് വ്യക്തമാക്കേണ്ടിയിരുന്നതെന്ന് പറഞ്ഞ ദേവസ്വം ബോര്‍ഡ് പ്രസിഡന്റ്് എ.പത്മകുമാറിന് പാര്‍ട്ടി ശക്തമായ താക്കീത് നല്‍കിയതോടെ അദ്ദേഹം നിലപാട് മാറ്റി. അതും പ്രതിഷേധങ്ങള്‍ക്കിടയാക്കി. സര്‍ക്കാര്‍ ദേവസ്വം ബോര്‍ഡിനെ ഹൈജാക്ക് ചെയ്തിരിക്കുകയാണെന്നാണ് പന്തളം കൊട്ടാരം ഉള്‍പ്പെടെ ആക്ഷേപിക്കുന്നത്. ഭക്തരെ ബോര്‍ഡ് കൈവെടിഞ്ഞെന്ന് പന്തളം കൊട്ടാരം നിര്‍വാഹകസമിതി അംഗം ശശികുമാര വര്‍മയും ആരോപിച്ചു. എന്ത് വില കൊടുത്തും സുപ്രീംകോടതി വിധി പുനപ്പരിശോധിക്കാതിരിക്കാനുള്ള എല്ലാ രേഖകളും സര്‍ക്കാര്‍ സുപ്രീംകോടതിയില്‍ ഹാജരാക്കുകയും അതിനായി വാദിക്കുകയും ചെയ്തു.