സംസ്ഥാനം പ്രളയത്തില്‍ നിന്നും ഇനിയും കരകയറിയിട്ടില്ല. അതിനിടെ വെള്ളാപ്പള്ളി ദേവസ്വം പ്രസിഡന്റായ കണിച്ചുകുളങ്ങര ക്ഷേത്രത്തിന് കോടികളുടെ സര്‍ക്കാരിന്റെ സഹായം വിവാദമാകുന്നു. ഒരു കാര്യവുമില്ലാതെ പാവപ്പെട്ടവര്‍ക്ക് നല്‍കേണ്ട പണം ഇങ്ങനെ വെള്ളാപ്പള്ളിയെ സുഖിപ്പിക്കാന്‍ നല്‍കണമോയെന്നാണ് ചോദ്യം.

വെള്ളാപ്പള്ളി നടേശന്റെ ക്ഷേത്രത്തെ സ്വദേശി ദര്‍ശനില്‍ നിന്നും ഒഴിവാക്കിയതിന് പിന്നാലെ കോടികളുടെ സഹായവുമായാണ് സംസ്ഥാന സര്‍ക്കാര്‍ എത്തിയത്. വെള്ളാപ്പള്ളി ദേവസ്വം പ്രസിഡന്റായ കണിച്ചുകുളങ്ങര ക്ഷേത്രത്തിനാണ് സര്‍ക്കാരിന്റെ മൂന്നര കോടിയുടെസഹായം ലഭിച്ചിരിക്കുന്നത്.

ക്‌ഷേത്രത്തിന്റെ ബഹുനിലകെട്ടിടത്തിന്റെ നിര്‍മ്മാണത്തിനായാണ് സംസ്ഥാന ടൂറിസം വകുപ്പ് മൂന്നരക്കോടി രൂപ നല്‍കിയത്. ഈ മാസം 25ന് മുഖ്യമന്ത്രി പിണറായി വിജയന്‍ കെട്ടിടത്തിന്റെ ഉദ്ഘാടനം നിര്‍വഹിക്കും. ചടങ്ങില്‍ മന്ത്രിമാരായ തോമസ് ഐസക്, ജി സുധാകരന്‍ എന്നിവര്‍ സംബന്ധിക്കും.

എന്നാല്‍ പിണറായി സര്‍ക്കാര്‍ അധികാരമേറ്റതിന് പിന്നാലെ ഇടതുനിലപാട് സ്വീകരിക്കുന്നതിന്റെ ഭാഗമായാണ് വെള്ളാപ്പള്ളി നടേശന് സഹായം ലഭിച്ചതെന്നാണ് ആരോപണം ഉയര്‍ന്നിട്ടുണ്ട്. പ്രളയ ദുരിതത്തിന് ശേഷം കഷ്ടപ്പെടുന്ന കേരളത്തില്‍ ഇത്തരത്തില്‍ കോടികള്‍ ഒരു സ്വകാര്യ ക്ഷേത്രത്തിന് നല്‍കുന്നതിനെതിരെയും വിമര്‍ശനങ്ങള്‍ ഉയരുന്നുണ്ട്.

ചെങ്ങന്നൂര്‍ ഉപതെരഞ്ഞെടുപ്പോടെയാണ് വെള്ളാപ്പള്ളി നടേശന്‍ ഇടതപക്ഷത്തോട് ചേര്‍ന്നത്. ഇടത് നേതാവിനെ വിജയിപ്പിക്കണമെന്ന നിര്‍ദ്ദേശവും വെള്ളാപ്പള്ളി സമുദായാംഗങ്ങള്‍ക്ക് നല്‍കുകയും ചെയ്തിരുന്നു. പിന്നീട് സര്‍ക്കാര്‍ പ്രതിരോധത്തിലാകുന്ന ഏതൊരു വിഷയങ്ങള്‍ക്കും പിന്തുണയുമായി വെള്ളാപ്പള്ളി രംഗത്തുവന്നിരുന്നു.ഇതിനിടയിലാണ് വെള്ളാപ്പള്ളി നടേശന്‍ ദേവസ്വം പ്രസിഡണ്ടായ കണിച്ചുകുളങ്ങര ക്ഷേത്രത്തിന് വേണ്ടി ടൂറിസം വകുപ്പ് കെട്ടിടം നിര്‍മ്മിച്ച് കൊടുക്കുക്കാന്‍ തീരുമാനിച്ചത്.

തുഷാര്‍ വെള്ളാപ്പള്ളി മല്‍സരിക്കണമെന്നു ബി.ജെ.പി കേന്ദ്ര നേതൃത്വം വാശി പിടിക്കുന്ന സമയത്താണ് സര്‍ക്കാരിന്റെ ഈ തീരുമാനം എന്നതും ശ്രദ്ധേയമാണ്. വെള്ളാപ്പള്ളി നടേശന്റെ ബിജെപി വിരുദ്ധ പ്രസ്താവനകള്‍ക്കു തടയിടുകയാണ് തുഷാറിനെ മല്‍സരിപ്പിക്കുന്നതിലൂടെ പാര്‍ട്ടി ലക്ഷ്യം വെയ്ക്കുന്നത്. തിരുവനന്തപുരം,പത്തനംതിട്ട, തൃശൂര്‍ ഒഴികെയുള്ള ഏതു മണ്ഡലവും വിട്ടുനല്‍കാന്‍ തയ്യാറാണെന്നു ബിജെപി സംസ്ഥാന നേതൃത്വം കേന്ദ്ര നേതൃത്വത്തെ അറിയിച്ചു.

തുഷാര്‍ വെള്ളാപ്പള്ളി എന്‍.ഡി.എയുടെ സ്ഥാനാര്‍ഥി പട്ടികയിലുണ്ടാകണമെന്നാണ് ബിജെപി കേന്ദ്ര നേതൃത്വത്തിന്റെ ആവശ്യം. ബിഡിജെഎസിനെ ഇതിനോടകം തന്നെ ഇക്കാര്യം പാര്‍ട്ടി അറിയിച്ചു കഴിഞ്ഞു. ഈ മാസം അവസാനമോ അടുത്ത മാസം ആദ്യമോ സംസ്ഥാനത്ത് എത്തുന്ന ദേശീയ അധ്യക്ഷന്‍ അമിത്ഷാ ഇക്കാര്യം നേരിട്ട് തുഷാറിനോടു ആവശ്യപ്പെടും.

ആറ്റിങ്ങല്‍, കൊല്ലം, ആലപ്പുഴ മണ്ഢലങ്ങളിലൊന്നില്‍ തുഷാര്‍ മല്‍സരിക്കുന്നത് നന്നായിരിക്കുമെന്നാണ് ബിജെപി സംസ്ഥാന നേതൃത്വം കേന്ദ്ര നേതൃത്വത്തെ അറിയിച്ചിരിക്കുന്നത്. ചെങ്ങന്നൂര്‍ ഉപതെരഞ്ഞെടുപ്പ്, ശബരിമല വിഷയം തുടങ്ങി നിര്‍ണായക സമയങ്ങളില്‍ വെള്ളാപ്പള്ളി നടേശന്റെ പ്രസ്താവനകള്‍ ബിജെപിയെ പ്രതിസന്ധിയിലാക്കിയിട്ടുണ്ട്. വരുന്ന ലോക്‌സഭാ തെരഞ്ഞെടുപ്പിലും ബിജെപി ഇക്കാര്യം ഭയക്കുന്നു. തുഷാര്‍ മല്‍സരരംഗത്തെത്തുന്നതോടെ വെള്ളാപ്പള്ളി പ്രതിരോധത്തിലാകുമെന്നും എസ്.എന്‍.ഡി.പി ബിജെപിക്ക് ഒപ്പം നില്‍ക്കാന്‍ നിര്‍ബന്ധിതരാകുമെന്നുമാണ് പാര്‍ട്ടി കരുതുന്നത്. ഇക്കാര്യങ്ങള്‍ കണക്കിലെടുത്താണ് ബിജെപി കേന്ദ്ര നേതൃത്വത്തിന്റെ നീക്കം. ഇതു മുന്‍കൂട്ടി കണ്ടാണ് തുഷാര്‍ മല്‍സരിക്കേണ്ടെന്നു വെള്ളാപ്പള്ളി കഴിഞ്ഞ ദിവസം പറഞ്ഞതെന്നാണ് സൂചന. അതിന് പിന്നാലെയാണ് സര്‍ക്കാരിന്റെ ധനസഹായവും.