കന്യാസ്ത്രീയെ ബലാല്സംഗം ചെയ്ത ബിഷപ്പ് ഫ്രാങ്കോ മുളയ്ക്കലിനെതിരായ സമരപരിപാടികള് തുടരുമെന്ന് സിസ്റ്റര് ലൂസി കളപ്പുരയ്ക്കല്, പുറത്താക്കുമെന്ന സഭയുടെ ഭീഷണിക്ക് മുന്നില് വഴങ്ങില്ലെന്നും സിസ്റ്റര്
കന്യാസ്ത്രീയെ ബലാല്സംഗം ചെയ്ത ബിഷപ്പ് ഫ്രാങ്കോ മുളയ്ക്കലിനെതിരായ സമരപരിപാടികള് തുടരുമെന്ന് സിസ്റ്റര് ലൂസി കളപ്പുരയ്ക്കല്. പുറത്താക്കുമെന്ന സഭയുടെ ഭീഷണിക്ക് മുന്നില് വഴങ്ങില്ലെന്നും അവര് വ്യക്തമാക്കി. മദര് സുപ്പീരിയര് ജനറല് നല്കിയ മൂന്നാമത്തെ കത്തിനും വിശദീകരണം നല്കും. സന്ന്യാസിനി പട്ടം ഉപേക്ഷിക്കില്ല. നിരപരാധികളെ സംരക്ഷിക്കേണ്ട സഭ കളങ്കിതനെ സംരക്ഷിക്കുന്നതിനോട് യോജിപ്പില്ല. അതിനാല് അതിനെതിരായ പോരാട്ടം തുടരും. പൊതുസമൂഹവും സഭാവിശ്വാസികളും ഒപ്പമുണ്ടെന്നും അവര് പറഞ്ഞു. സഭാ നടപടികളനുസരിച്ച് മൂന്ന് വിശദീകരണ നോട്ടീസുകള് നല്കുകയും വിശദീകരണം തൃപ്തികരമല്ലെങ്കില് പുറത്താക്കുകയും ചെയ്യും. അതിനാല് സഭയുടെ അടുത്ത നടപടി എന്തായിരിക്കുമെന്ന് പൊതുസമൂഹം ഉറ്റുനോക്കുകയാണ്.
അച്ചടക്കനടപടികള് എടുക്കുന്നെങ്കില് എടുക്കട്ടെ. സഭയ്ക്ക് എന്നെ അങ്ങനെ പറഞ്ഞു വിടാനാവില്ല. കഴിഞ്ഞ വര്ഷം മാത്രമാണ് എന്റെ ശമ്പളം സഭയ്ക്ക് നല്കാഞ്ഞത്. സാമൂഹ്യകാര്യങ്ങള്ക്കാണ് ആ പണം ചെലവഴിച്ചത്. അങ്ങനെ ഉപയോഗിക്കാന് സഭയുടെ പ്രത്യേക അനുമതി വേണം. അതിനായി നിരവധി തവണ സഭാമേലധികാരികളെ സമീപിച്ചെങ്കിലും നിരസിച്ചു. പക്ഷെ, കാരണം വ്യക്തമാക്കിയില്ല. അതിനര്ത്ഥം അത്തരത്തില് പണം ചെലവഴിക്കുന്നത് സഭയ്ക്ക് ഇഷ്ടമല്ലെന്നല്ലേ എന്നും സിസ്റ്റര് ലൂസി ചോദിച്ചു.
സഭയിലെ പുരുഷമേധാവിത്വത്തിനും ചൂഷണത്തിനുമെതിരെ ശക്തമായ പോരാട്ടം തുടരുമെന്നും ലൂസി കളപ്പുര ആവര്ത്തിച്ചു. തനിക്കെതിരെ ദീപികയില് ലേഖനമെഴുതിയ നോബിള് പാറക്കന് സമൂഹമാധ്യമങ്ങളിലൂടെ തന്നെ അപകീര്ത്തിപെടുത്തുന്ന ആളാണെന്നും ഇതു തുടര്ന്നാല് വീണ്ടും പോലീസിനെ സമിപിക്കുമെന്നും സിസ്റ്റര് ആവര്ത്തിച്ചു. സിസ്റ്ററിന് പിന്തുണയുമായി ജോയിന്റ് ക്രിസ്റ്റ്യന് കൗണ്സിലും ചര്ച്ച് ആക്ട് ആക്ഷന് കൗണ്സിലും രംഗത്തുണ്ട്. രണ്ട് സംഘടനകളുടെയും നേതൃത്വത്തില് സിസ്റ്റര് ലൂസിക്ക് പിന്തുണ അറിയിച്ച് ആലുവയില് മുമ്പ് പ്രാര്ത്ഥനാ ധര്ണ നടത്തിയിരുന്നു. സിസ്റ്റര്ക്കെതിരെ നടപടി എടുക്കരുതെന്ന് ഇരുകൂട്ടരും ആവശ്യപ്പെട്ടു. . ആലുവയിലെ ഫ്രാന്സിസ്കന് ക്ലാരിസ്റ്റ് കോണ്ഗ്രിഗേഷന് മുന്നിലാണ് പ്രാര്ത്ഥന യജ്ഞം സംഘടിപ്പിച്ചത്. ഡ്രൈവിംഗ് ലൈസന്സ് എടുക്കുന്നതും കവിതസമാഹാരം പുറത്തിറക്കുന്നതും എങ്ങനെ കനോന് നിയമത്തിന്റെ ലംഘനമാകുന്നത് എങ്ങനെയെന്നും ജോയിന്റ് കിസ്റ്റ്യന് കൗണ്സില് ചോദിക്കുന്നു.
സിസ്റ്റര് ലൂസിക്കെതിരെ സഭയുടെ പത്രമായ ദീപികയില് ലേഖനം വന്നിരുന്നു. സന്യാസ വ്രതം ലംഘിച്ച് വാസ്തവ വിരുദ്ധമായ കാര്യങ്ങള് പ്രസംഗിക്കുകയും പ്രചരിപ്പിക്കുകയും ചെയ്ത് സഭക്ക് ദുഷ്പേരുണ്ടാക്കിയെന്നായിരുന്നു വിമര്ശനം. എന്നാല് ബ്രഹ്മചര്യം അനുഷ്ഠിക്കാത്ത പുരോഹികര്ക്കെതിരെ ആദ്യം നടപടിയെടുക്കണമെന്നാണ് സിസ്റ്റര് അന്ന് പ്രതികരിച്ചത്. അതും സഭയെ ചൊടിപ്പിച്ചിരുന്നു. പുരോഹിതന്മാരെ പോലെ ജിവിക്കാന് കന്യസ്ത്രികള്ക്ക് ആകില്ലെന്നും അത് വൃതങ്ങളുടെ ലംഘനമാണെന്നും പറഞ്ഞാണ് മാനന്തവാടി രൂപത പിആര്ഓ ആയ നോബില് പാറക്കലിന്റെ പേരിലാല് വന്ന ലേഖനം ലേഖനം അവസാനിക്കുന്നത്.
https://www.facebook.com/Malayalivartha
