തിരുവനന്തപുരം വിമാനത്താവളത്തില്‍ വനിത പൈലറ്റിനോട് മോശമായി പെരുമാറിയ കാര്‍ ഡ്രൈവര്‍ അറസ്റ്റില്‍. മണക്കാട് സ്വദേശി ഉണ്ണികൃഷ്ണനെയാണ് അറസ്റ്റ് ചെയ്തത്. ഇന്നലെ രാത്രി 11.15 ഹോട്ടലിലേക്ക് വാഹനം കാത്തു നില്‍ക്കുകയായിരുന്ന പൈലറ്റിനോടാണ് ഇയാള്‍ അശ്ലീല വാക്കുകള്‍ പറഞ്ഞത്. തിരുവനന്തപുരം രജിസ്ട്രേഷന്‍ കാര്‍ ഓടിച്ച ഡ്രൈവറാണ് പൈലറ്റിനെ അപമാനിച്ചതെന്നും ഇയാള്‍ക്കായി അന്വേഷണം ഊര്‍ജ്ജിതമാക്കിയതായും നേരത്തെ പൊലീസ് വിശദമാക്കിയിരുന്നു.

ദില്ലിയില്‍ നിന്ന് തിരുവനന്തപുരത്തെത്തിയ എയര്‍ ഇന്ത്യ വിമാനത്തിലെ സഹ പൈലറ്റായ 26കാരി ഹോട്ടലിലേക്ക് പോകാനായി അറൈവല്‍ ഭാഗത്ത് വാഹനം കാത്ത് നില്‍ക്കുമ്ബോഴായിരുന്നു പൊടുന്നനെ കാര്‍ ഡ്രൈവറുടെ അതിക്രമം. കെഎല്‍ 01 എഎസ് 9909 എന്ന കാറിലെത്തിയ ഡ്രൈവര്‍ അടുത്തെത്തി ഇംഗ്ളീഷില്‍ അശ്ളീല ചുവയോടെ സംസാരിക്കുകയായിരുന്നു. നടുങ്ങിപ്പോയ പൈലറ്റ് ഉടനടി എയര്‍ ഇന്ത്യ ഓഫീസില്‍ വിവരമറിയിച്ചു.

എയര്‍ ഇന്ത്യ അധികൃതര്‍ ഉടനടി വലിയതുറ പൊലീസിന് വിവരം കൈമാറി. ആദ്യം ഈ മെയില്‍ വഴി പരാതി അയച്ച പൈലറ്റ് ഇന്ന് പൊലീസിന്‍റെ നിര്‍ദ്ദേശാനുസരണം ഉച്ചയോടെ എയര്‍ ഇന്ത്യ അധികൃതര്‍ക്കൊപ്പമെത്തി വലിയതുറ സ്റ്റേഷനിലെത്തി രേഖാമൂലം പരാതി നല്‍കിയിരുന്നു. IPC 354 A പ്രകാരം അശ്ലീല ചുവയോടെ സ്ത്രീകളെ അപമാനിക്കുന്ന കുറ്റം ചുമത്തിയാണ് ഡ്രൈവര്‍ക്കെതിരെ പൊലീസ് കേസെടുത്തത്. പൈലറ്റിനെ ഇയാള്‍ അപമാനിക്കുന്ന ദൃശ്യങ്ങള്‍ എയര്‍പോര്‍ട്ടിലെ സിസിടിവി ക്യാമറയില്‍ പതിഞ്ഞിരുന്നു. അതീവസുരക്ഷാ മേഖലയായ വിമാനത്താവളത്തിലുണ്ടായ അതിക്രമം എയര്‍പോര്‍ട്ട് അധികൃതരെയും പൊലീസിനെയും ഒരുപോലെ ഞെട്ടിച്ചിരുന്നു.