ശബരിമല വിഷയത്തിൽ പൊലീസിനെതിരെ രൂക്ഷ വിമർശനവുമായി ഹൈക്കോടതി. ശബരിമലയിൽ പൊലീസ് നടത്തിയ അതിക്രമത്തില്‍ അന്വേഷണം പൂര്‍ത്തിയാക്കത്തതിനെതിരെയാണ് ഹൈക്കോടതി വിമർശനമുന്നയിച്ചിരിക്കുന്നത്.

പൊലീസിന്റെ ഉദാസീനത അപലപനീയമാണെന്ന് കോടതി നിരീക്ഷിച്ചു. പൊലീസ് അക്രമം നടത്തിയെന്നും വാഹനങ്ങളും ബൈക്കുകളുടെ ഹെല്‍മെറ്റുകളും അടിച്ച്‌ തകര്‍ത്തുവെന്നുമുള്ള കാര്യങ്ങള്‍ ചൂണ്ടിക്കാണിച്ച്‌ സമര്‍പ്പിക്കപ്പെട്ട ഹര്‍ജിയില്‍ വാദം കേള്‍ക്കുകയായിരുന്നു കോടതി.

അക്രമത്തിനു മുതിർന്ന മൂന്നു പൊലീസുകാരെ തിരിച്ചറിഞ്ഞു ചോദ്യം ചെയ്തെന്നും ബാക്കിയുള്ളവർ വ്യത്യസ്ത ബറ്റാലിയനിൽനിന്നു വന്നു മടങ്ങിയതിനാൽ തിരിച്ചറിയേണ്ടതുണ്ടെന്നും സർക്കാർ അറിയിച്ചു.
തെരഞ്ഞെടുപ്പായതിനാല്‍ ഇവരെ സ്ഥലം മാറ്റിയിട്ടുണ്ടാവാനും സാധ്യതയുണ്ടെന്നും അറിയിച്ചു.

എന്നാല്‍ ഈ വാദം വിശ്വസിക്കാന്‍ ബുദ്ധിമുട്ടുണ്ടെന്ന് പറഞ്ഞ കോടതി അന്വേഷണ ഉദ്യോഗസ്ഥര്‍ കാര്യശേഷിയുള്ളവരാണോ എന്ന മറുചോദ്യമാണ് ഉന്നയിച്ചത്. തിരിച്ചറിഞ്ഞതായി പറയുന്ന മുന്നു പൊലീസുകാർക്ക് എതിരെയുള്ള അച്ചടക്ക നടപടിയുടെ കാര്യം സർക്കാർ പറയുന്നില്ലെന്ന് കോടതി ചൂണ്ടിക്കാട്ടി. ശബരിമലയിലെ മതനിരപേക്ഷ സംവിധാനത്തിനു പോറൽ വരുത്താൻ ആരും മുതിരരുതെന്നും വാദത്തിനിടെ പറഞ്ഞു.