മുസ്ലിം ലീഗ്എസ്.ഡി.പി.ഐ. രഹസ്യ കൂടിക്കാഴ്ചയോടെ വിവാദമായ പൊന്നാനി മണ്ഡലത്തിലെ മത്സരരംഗത്തേക്കു പി.ഡി.പിയും. പൊന്നാനിയടക്കം ആറു മണ്ഡലങ്ങളിലാണു മത്സരിക്കുക. സ്ഥാനാര്‍ഥികളെ ഇന്നു പാര്‍ട്ടി ചെയര്‍മാന്‍ അബ്ദുള്‍ നാസര്‍ മഅദനി പ്രഖ്യാപിക്കും.

2004ലെ ലോക്‌സഭാ തെരഞ്ഞെടുപ്പില്‍ പി.ഡി.പി. 47,720 വോട്ട് നേടിയ പൊന്നാനിയില്‍ സ്ഥാനാര്‍ഥിയാകണമെന്ന അഭ്യര്‍ഥനയുമായി പാര്‍ട്ടി നേതാക്കള്‍ കഴിഞ്ഞ ദിവസം ബംഗളുരുവിലെത്തി മഅദനിയെ കണ്ടിരുന്നു. ബംഗളുരു സ്‌ഫോടനക്കേസില്‍ ഉപാധികളോടെ ജാമ്യം ലഭിച്ച മഅദനി ബംഗളുരുവിലാണു താമസം. നഗരത്തിനു പുറത്തുപോകണമെങ്കില്‍ കോടതിയുടെ അനുമതി വേണം. കുറ്റക്കാരനാണെന്നു കോടതി കണ്ടെത്തിയിട്ടില്ലെന്നു ചൂണ്ടിക്കാട്ടിയാണ് മത്സരിക്കാന്‍ മഅദനിയെ പാര്‍ട്ടി നേതാക്കള്‍ നിര്‍ബന്ധിപ്പിച്ചത്. തെരഞ്ഞെടുപ്പു മത്സരത്തിനില്ലെന്ന നിലപാടില്‍ മാറ്റമില്ലെന്ന് അദ്ദേഹം വ്യക്തമാക്കി.

നിലവിലെ രാഷ്ട്രീയ സാഹചര്യം കണക്കിലെടുത്തും, പ്രവര്‍ത്തകരുടെ അഭ്യര്‍ഥന മാനിച്ചും പാര്‍ട്ടിക്ക് വേരോട്ടമുള്ള മണ്ഡലങ്ങളില്‍ മത്സരിക്കണമെന്നു മഅദനി നിര്‍ദേശിച്ചു. രാഷ്ട്രീയമായി ശ്രദ്ധിക്കപ്പെടുന്ന പൊന്നാനിയില്‍ ശക്തനായ സ്ഥാനാര്‍ഥിയെ മത്സരിപ്പിക്കാനും തീരുമാനിച്ചു. പൂന്തുറ സിറാജ്, മഹിന്‍ ബാദുഷ മൗലവി, വര്‍ക്കല രാജ്, ഇബ്രാഹിം തിരൂരങ്ങാടി എന്നിവരിലൊരാളാകും സ്ഥാനാര്‍ഥിയെന്നാണു സൂചന. തന്റെ തീരുമാനം ഇന്നു മലപ്പുറത്തു നടക്കുന്ന കണ്‍വന്‍ഷനില്‍ ശബ്ദസന്ദേശത്തിലൂടെ മഅനി അറിയിക്കും.

പി.ഡി.പി. ജനറല്‍ സെക്രട്ടറി യു. കുഞ്ഞുമുഹമ്മദാണ് 2004ല്‍ പൊന്നാനിയില്‍ മത്സരിച്ചത്. 2009ല്‍ സി.പി.എമ്മുമായി കൂട്ടുകെട്ടുണ്ടാക്കി. തുടര്‍ന്നു പൊന്നാനിയില്‍ മഅദനിയും പിണറായി വിജയനും വേദിപങ്കിട്ടത് വന്‍വിവാദമായി. പക്ഷേ, എല്‍.ഡി.എഫിന്റെ പരാജയം ബന്ധത്തിന് അവസാനം കുറിച്ചു. പൊന്നാനിക്കു പുറമേ മലപ്പുറം, തൃശൂര്‍, എറണാകുളം, ആലപ്പുഴ, മാവേലിക്കര മണ്ഡലങ്ങളിലാകും പി.ഡി.പി. മത്സരിക്കുക.