മുനമ്പത്തെ മനുഷ്യക്കടത്ത് കേസില്‍ പ്രതികള്‍ക്കെതിരെ മനുഷ്യക്കടത്ത് വകുപ്പ് ചുമത്തി. ഹൈക്കോടതി നിർദ്ദേശച്ചതിനെ തുടർന്നാണ് പ്രതികൾക്കതിരെ ഈ വകുപ്പ് ചുമത്തിയിരിക്കുന്നത് . കേസിലെ മുഖ്യപ്രതി സെല്‍വനടക്കം ആറുപേരുടെ അറസ്റ്റും പൊലീസ് രേഖപ്പെടുത്തി. ഇവരെ ഇന്ന് കോടതിയില്‍ ഹാജരാക്കും. നേരത്തേ അറസ്റ്റിലായ മൂന്ന് പ്രതികളുടെ പേരിലും മനുഷ്യക്കടത്ത് ചുമത്തും. കോടതിയില്‍ ഇത് സംബന്ധിച്ച റിപ്പോര്‍ട്ട് നൽകാൻ തീരുമാനമായി.

തമിഴ്നാട്ടില്‍ നിന്നും ശ്രീലങ്കയില്‍ നിന്നുമാണ് പ്രതികളെ അറസ്റ്റ് ചെയ്തത്. മനുഷ്യക്കടത്തിന് നേതൃത്വം നല്‍കിയ ആളുകള്‍ ഇനിയും പിടിയിലാകാനുണ്ടെന്നാണ് അന്വേഷണ ഉദ്യോ​ഗസ്ഥര്‍ പറയുന്നത്.

എന്നാല്‍ മുനമ്പം കേസ് മനുഷ്യക്കടത്താണ് എന്നതില്‍ ഒരു തര്‍ക്കവും ഇല്ലെന്നും അന്വേഷണം കേന്ദ്ര ഏജന്‍സിക്ക് കൈമാറണമെന്നും കോടതി കഴിഞ്ഞ ദിവസം വിധിച്ചിരുന്നു. മുനമ്പം വഴി കടല്‍മാര്‍​ഗം കടത്തിക്കൊണ്ട് പോയവരെ കുറിച്ച്‌ യാതൊരു വിവരവും പിന്നീട് പുറത്ത് വന്നിട്ടില്ല. ഇവരാരും വീടുകളുമായി ബന്ധപ്പെട്ടിട്ടുമില്ല. സംഭവത്തില്‍ ദുരൂഹതയുണ്ടെന്നും ഹൈക്കോടതി കഴിഞ്ഞ ദിവസം പറഞ്ഞിരുന്നു.