രാമായണത്തെ കുറിച്ച് ഉപന്യാസം എഴുതാനായി മലയാളം പരീക്ഷയുടെ ചോദ്യത്തിന് ഉത്തരം ഒരു ന്യൂജെന്‍ സിനിമ തിരക്കഥയാക്കി അവതരിപ്പിച്ച വിരുതനാണ് സോഷ്യല്‍ മീഡിയയില്‍ താരമായി മാറുന്നത്. രാമായണത്തെകുറിച്ചുള്ള ചോദ്യത്തിന് സമീപകാലത്തെ വമ്പന്‍ ഹിറ്റുകളായ ബാഹുബലിയും, കെജിഎഫും, പുലിമുരുകനും കൂട്ടിക്കുഴച്ച് തീപ്പോരി സംഭാഷണങ്ങള്‍ കൊണ്ട് ഉത്തരപേപ്പറില്‍ നിറച്ചിരിക്കുകയാണ് ഈ വിദ്വാന്‍. സിനിമാ തിരക്കഥകളെ അനുസ്മരിപ്പിക്കുന്ന ഉത്തരകടലാസ് സിനിമാമേഖലയിലുള്ള നിരവധിപേരാണ് ഫെയ്‌സ്ബുക്കില്‍ പങ്കുവച്ചിരിക്കുന്നത്.

"രാവണൻ സീതയെ പ്രണയിച്ചവൻ അശോകവനത്തിൽ സീതയെ കിട്ടിയിട്ടും ഒരു നോട്ടം കൊണ്ട് പോലും വേദനിപ്പിക്കാതിരുന്നവൻ.. രാവണൻ രാമനോടുള്ള പ്രണയത്തെക്കാൾ സീതയോടുള്ള വൈരാഗ്യമായിരുന്നു രാവണന്റെ മനസ്സിൽ. ഒരുപക്ഷേ രാമൻറെ സ്ഥനത്ത് രാമൻ ആയിരുന്നുവെങ്കിൽ സീതയുടെ ചാരിത്ര്യത്തിൽ സംശയിച്ചവരുടെ തലയാണ് വെട്ടേണ്ടത്.

വാനരസംഘത്തോടൊപ്പം വന്നവനാണ് ഗ്യാങ്സ്റ്റർ. രാവണൻ ഒറ്റയ്ക്കായിരുന്നു മോൺസ്റ്റർ. പത്ത് തലയിൽ ബുദ്ധിയും അതിനൊത്ത ശക്തിയുമുള്ള അറുമുഖനാണവൻ( രാവണൻ) മകൻ മേഘനാഥന്റെ മരണത്തോടെ  രാവണൻ തളർന്നുപോയി. മുറിവേറ്റ സിംഹത്തിനെ ശ്വാസം ഗർജ്ജനത്തെക്കാൾ ഭയാനകമായിരുന്നു. എന്തൊക്കെ പറഞ്ഞാലും രാവണൻ ശിവൻറെ കട്ട ആരാധകനായിരുന്നു. ശിവേട്ടൻ പറഞ്ഞാൽ അവൻ അങ്ങോട്ടും ഇല്ല ഇങ്ങോട്ടും ഇല്ല . ഏതെങ്കിലും 10 രാജാക്കന്മാരെ തല്ലി രാജാവായവനല്ല. രാവണൻ തല്ലിയ പത്തുപേരും രാജാക്കന്മാരായിരുന്നു. ( ഇന്ദ്രൻ, കുബേരൻ..) ലങ്കയുടെ ഒരുവശത്ത് കടലും മറുവശത്ത് രാവണനും ആയിരുന്നു. ഹീ ഈസ് ദി ഗോഡ് ഓഫ് ലങ്ക. ഭീരുക്കൾ ആയിരം തവണ മരിക്കും, ധീരനു മരണം ഒന്നേയുള്ളൂ. അതുകൊണ്ടു രാവണന്റെ ജീവിതം ഒരു പാഴ്‌ചെലവായിരുന്നില്ല"

സീതയുടെ ചാരിത്ര്യത്തെ സംശയിച്ചവരുടെ തലയാണ് വെട്ടേണ്ടത് എന്ന ആമുഖത്തോടെയാണ് തുടങ്ങുന്നത്. വാനര സംഘത്തോടൊപ്പം വന്ന രാമനേയും സംഘത്തേയും ഗ്യാങ്സ്റ്റർ എന്ന് വിശേഷിപ്പിച്ച വിരുതൻ രാവണന് മോൺസ്റ്റർ പട്ടം ചാർത്തി നൽകി കെജിഎഫ് ഡയലോഗിനോട് നീതി പുലർത്തി. പത്തു തലയിൽ ശക്തിയും അതിനൊത്ത ബുദ്ധിയുമുള്ള അറുമുഖനാണ് രാവണണെന്ന ഡയലോഗ് തൊട്ടു പിന്നാലെ. രാവണൻ തല്ലിയ പത്ത് പേരും രാജാക്കൻമാരായിരുന്നു എന്ന ഡയലോഗും ഉപന്യാസത്തിൽ വാലായി എത്തുന്നുണ്ട്.

എന്തായാലും ഈ മാസ് ഡയലോഗും അതെഴുതിയ വിരുതനും സോഷ്യൽ മീഡിയയിൽ ചിരി വിതറുകയാണ്. നിരവധി പേർ ഈ ഉത്തര പേപ്പർ ഷെയർ ചെയ്തു കഴിഞ്ഞു.