തിരുവനന്തപുരത്തെ ബിജെപി സ്ഥാനാര്‍ത്ഥി കുമ്മനം രാജശേഖരന്‍ മലയാളി വാര്‍ത്തയുടെ ശാസ്തമംഗലത്തെ ഓഫീസ് സന്ദര്‍ശിച്ചു. നിലവിലെ രാഷ്ട്രീയ സാഹര്യങ്ങള്‍ കുമ്മനം മലയാളി വാര്‍ത്തയുമായി പങ്കുവച്ചു.

കേരളത്തില്‍ ബിജെപിക്ക് അനുകൂലമായ രാഷ്ട്രീയ സാഹചര്യമാണുള്ളത്. 20ല്‍ 20 സീറ്റ് ജയിക്കാനുള്ള അവസ്ഥയാണ് സംജാതമായിരിക്കുന്നത്. മാറിവരുന്ന സ്ഥിതിഗതികളെല്ലാം ബിജെപിയ്ക്ക് അനുകൂലമായി കൊണ്ടിരിക്കുകയാണ്.

രാഹുല്‍ ഗാന്ധി കേരളത്തില്‍ വന്ന് മത്സരിക്കുന്നത് തോല്‍വി ഭയന്നിട്ടാണ്. പക്ഷെ ഇവിടേയും തോല്‍ക്കാനാണ് സാധ്യത. സ്മൃതി ഇറാനി വരുമോയെന്ന് അറിയില്ല. അത് നിശ്ചയിക്കുന്നത് കേന്ദ്ര തെരഞ്ഞെടുപ്പ് കമ്മിറ്റിയാണ്.

ന്യൂനപക്ഷങ്ങളെ ഇളക്കാനാണ് കോലീബി സഖ്യവുമായി സിപിഎം വരുന്നത്. ശരിക്കും കോമാലി സഖ്യമാണുള്ളത്. അതിപ്പോള്‍ കോമാളി പോലെയായി. കോണ്‍ഗ്രസുമായി ഒരു നീക്കുപോക്കുമില്ല. കോണ്‍ഗ്രസാണ് മുഖ്യ എതിരാളികള്‍.

കഴിഞ്ഞ ദിവസത്തെ മുഖ്യമന്ത്രി പിണറായി വിജയന്റെ പ്രസ്താവന കോണ്‍ഗ്രസും സിപിഎമ്മും തമ്മിലുള്ള സഖ്യം തുറന്നു പറയുന്നതാണ്. മാത്രമല്ല രാഹുല്‍ ആരോടാണ് മത്സരിക്കുന്നതെന്നാണ് പിണറായി ചോദിക്കുന്നത്. ഇതോടെ എന്താണ് ഉള്ളിലിരുപ്പെന്ന് വ്യക്തമായെന്നും കുമ്മനം പറഞ്ഞു.