ന്യൂസിലാന്‍ഡിലെ ക്രൈസ്റ്റ് ചര്‍ച്ചിലുണ്ടായതിന് സമാനമായ ആക്രമണങ്ങള്‍ ഇന്ത്യയിലെ ജൂത മേഖലകളില്‍ ഉണ്ടാകാന്‍ സാധ്യതയുണ്ടെന്നാണ് ആഭ്യന്തര മന്ത്രാലയത്തിന് നല്‍കിയ റിപ്പോര്‍ട്ടിലുള്ളത്. കേരളത്തില്‍ ജൂത മത വിശ്വാസികളുള്ള പ്രദേശമാണ് മട്ടാഞ്ചേരിയിലെ ജൂത തെരുവ്. ജൂതപ്പള്ളി അഥവാ സിനഗോഗ് ഫോര്‍ട്ട് കൊച്ചിയുടെ മുഖ്യ ആകര്‍ഷണ കേന്ദ്രമാണ്. നിരവധി ടൂറിസ്റ്റുകല്‍ എത്തുന്ന പ്രദേശമാണ് ഇവിടം. കൂടാതെ രാജ്യത്ത് ജൂത മതസ്ഥാപനങ്ങളും ആരാധനാലയങ്ങളും ഇസ്രായേലി ടൂറിസ്റ്റുകളും ഉള്ള പ്രദേശത്തെല്ലാം ജാ​ഗ്രത പുലര്‍ത്താന്‍ കേന്ദ്ര ആഭ്യന്തര മന്ത്രാലയം എല്ലാ സംസ്ഥാനങ്ങള്‍ക്കും കേന്ദ്രഭരണ പ്രദേശങ്ങള്‍ക്കും മുന്നറിയിപ്പ് നല്‍കിയിട്ടുണ്ട്. ക്രൈസ്റ്റ് ചര്‍ച്ച്‌ ഭീകരാക്രമണത്തിന് സമാനമായി, ഗോവയിലും കേരളത്തിലെ ഫോര്‍ട്ട് കൊച്ചിയിലും ഭീകരാക്രമണ സാധ്യതയെന്നാണ് പുറത്ത് വരുന്ന റിപ്പോർട്ടുകൾ.

രാജ്യത്തെ ജൂത മേഖലകളില്‍ ആക്രമണം നടത്താന്‍ ഭീകര സംഘടന തയ്യാറെടുക്കുന്നതായാണ് കേന്ദ്ര രഹസ്യാന്വേഷണ ഏജന്‍സികളുടെ മുന്നറിയിപ്പ്. ഇതേത്തുടര്‍ന്ന് ഈ പ്രദേശങ്ങളില്‍ കര്‍ശന സുരക്ഷയൊരുക്കണമെന്ന് സംസ്ഥാനങ്ങള്‍ക്ക് കേന്ദ്ര ആഭ്യന്തര മന്ത്രാലയം നിര്‍ദ്ദേശം നല്‍കി. ക്രൈസ്റ്റ് ചര്‍ച്ച്‌ ആക്രമണത്തിന് തിരിച്ചടി നല്‍കാന്‍ അല്‍ഖ്വയ്ദ, ഐഎസ്‌ഐഎസ് എന്നീ ഭീകരസംഘടനകള്‍ തയ്യാറെടുക്കുന്നതായാണ് സൂചന. ജൂതമേഖലകളില്‍ ആക്രമണം നടത്താനാണ് പദ്ധതിയിടുന്നതെന്നാണ് രഹസ്യാന്വേഷണ ഏജന്‍സികള്‍ക്ക് ലഭിച്ച വിവരം.