വയനാട് സീറ്റിൽ രാഹുൽ ഗാന്ധി വന്നില്ലെങ്കിൽ സി പി ഐ സ്ഥാനാർത്ഥി സുനീറിന് വിജയ സാധ്യതയെന്ന് സി പി എം. രാഹുലിനെ വയനാട്ടിൽ നിന്നു തടയാനും സുനീറിനെ ജയിപ്പിക്കാനുമാണ് സി പി എം ലക്ഷ്യമിടുന്നത്. സി പി ഐ സ്ഥാനാർത്ഥിയാണെന്ന യാഥാർത്ഥ്യം മറന്ന് സുനീറിന്റെ വിജയത്തിനായി ഒറ്റക്കെട്ടായി രംഗത്തിറങ്ങാനാണ് നൽകിയിരിക്കുന്ന നിർദ്ദേശം.

അതിനിടെ കർണാടകവും രാഹുലിന് വേണ്ടി കളത്തിൽ സജീവമാണ്. രണ്ടാം ഘട്ട തെരഞ്ഞടുപ്പ് നടക്കുന്ന കർണാടകത്തിൽ രാഹുൽ മത്സരിക്കുമെന്നാണ് പി സി സി അധ്യക്ഷൻ പറഞ്ഞത്.

രാഹുൽ ഗാന്ധിയുടെ കാര്യത്തിൽ ചെവ്വാഴ്ചയും തീരുമാനമായിട്ടില്ല. രണ്ട് സീറ്റിൽ മതിസരിക്കണമോ എന്ന കാര്യത്തിൽ രാഹുൽ തീരുമാനം എടുത്തിട്ടില്ലെന്നാണ് എ ഐ സി സി പറയുന്നത്. ഏതായാലും അമേഠിയിൽ മതസരിക്കുമെന്നും എ ഐ സി സി വ്യത്തങ്ങൾ അറിയിച്ചു. കർണാടകത്തിലും തമിഴ്നാട്ടിലും രാഹുൽ ഗാന്ധി മത്സരിക്കാൻ സാധ്യതയുണ്ടെന്ന കാര്യവും എ ഐസി സി തള്ളികളഞ്ഞില്ല. അതായത് വയനാട് രാഹുൽ മത്‌സരിക്കാനുള്ള സാധ്യത വിരളമാണ്.

രാഹുൽ വയനാട്ടിൽ നിന്നും മത്സരിക്കുകയാണെങ്കിൽ കേന്ദ്ര ഭരണത്തിൽ പങ്കാളിയാവുന്ന കാര്യത്തിൽ ആലോചന വേണ്ടി വരുമെന്ന സി പി എം നിലപാടിലാണ് എ ഐ സി സി പേടിച്ചു പോയത്. വയനാട് വേണോ കേന്ദ്രഭരണം വരണോ എന്ന കാര്യത്തിൽ കേന്ദ്രഭരണം മതി എന്ന തീരുമാനത്തിൽ രാഹുൽ എത്തുമെന്നാണ് കരുതുന്നത്.

രാഹുൽ മത്‌സര രംഗത്തില്ലെങ്കിൽ സിദ്ധിഖ് കോൺഗ്രസ് സ്ഥാനാർത്ഥിയാവും. വയനാട് യു ഡി എഫിന്റെ ഉറച്ച കോട്ടയാണെന്ന് പറയുന്നുണ്ടെങ്കിലും അക്കാര്യത്തിൽ ഒരുറപ്പ് കോൺഗ്രസ്സുകാർ പോലും പറയുകയില്ല. മുസ്ലീം ലീഗിന്റെയും മറ്റും ഇടപെടലുകൾ ഇക്കാര്യത്തിൽ നിർണായകമാണ്. കോട്ടയവും മലപ്പുറവും പോലൊരു ഉറച്ച സീറ്റല്ല വയനാട്.

രാഹുൽ ഗാന്ധിയെ പ്രതീക്ഷിച്ചാണ് വയനാട് ജനത കാത്തിരിക്കുന്നത്. യു ഡി എഫിന് വിജയം നൽകിയിട്ടും പറയത്തക്ക വികസനങ്ങളൊന്നും വന്നെത്താത്ത സ്ഥലമാണ് വയനാട്. ഒരു പ്രളയമുണ്ടായാൽ ജില്ല വേർപ്പെട്ട് പോകുന്ന അവസ്ഥ. രാഹുലിനെ പോലൊരാൾ എത്തിയാൽ പിന്നാക്കാവസ്ഥക്ക് മാറ്റം ഉണ്ടാകുമെന്ന് കരുതുന്നവർ ഉണ്ട്. അത് സംഭവിക്കാതിരുന്നാൽ ജനങ്ങൾ എതിരാകുമെന്നത് സ്വാഭാവികം. അത്തരമൊരു സാധ്യതയാണ് സി പി എം പ്രതീക്ഷിക്കുന്നത്. രാഹുൽ വന്നില്ലെങ്കിൽ അത് കോൺഗ്രസ് വിരുദ്ധ തരംഗമാക്കി മാറ്റാൻ സി പി എം ശ്രമിക്കും.

തിരുവനന്തപുരത്തെ നേമത്ത് നിന്നും പണ്ട് കെ. കരുണാകരൻ രാജിവച്ചപ്പോൾ പിന്നീട് നേമം യു ഡി എഫിന്റെ കൈയിൽ നിന്നും പോയി. രാഹുൽ വരുമെന്ന് പറഞ്ഞ് പറ്റിച്ചാൽ വയനാട്ടിലും ഇതേ അവസ്ഥ വന്നുചേരാം. അതാണ് ഇടതു മുന്നണിയുടെ നീക്കം. രാഹുൽ മത്സരിക്കാൻ വന്നില്ലെങ്കിൽ അതിനെ കോൺഗ്രസ് വിരുദധ തരംഗമാക്കി മാറ്റാനാണ് ഇടതു മുന്നണിയുടെ ശ്രമം

കോൺഗ്രസിലെ ഗ്രൂപ്പ് വഴക്കും തങ്ങൾക്ക് നേട്ടമായി മാറുമെന്ന് ഇടത് വൃത്തങ്ങൾ കരുതുന്നു. സിദ്ധിഖ് എ ഗ്രൂപ്പുകാരനാണ്. ഐ ഗ്രൂപ്പിന്റെ സീറ്റാണ് വയനാട് . രമേശ് വയനാടിന് വേണ്ടി വാദിച്ചിരുന്നു. എന്നാൽ അത് നൽകാൻ ഉമ്മൻ ചാണ്ടി തയ്യാറായില്ല. രാഹുൽ വന്നില്ലെങ്കിൽ അതിന്റെ പ്രത്യാഘാതം വയനാട്ടിൽ സംഭവിക്കുമെന്ന് ഇടതു മുന്നണി കരുതുന്നു.