കര്‍ഷകരുടെ എല്ലാ കടങ്ങള്‍ക്കും ഡിസംബര്‍ 31 വരെ മൊറട്ടോറിയം നീട്ടുന്നതിനുള്ള മന്ത്രിസഭാ തീരുമാനം സംബന്ധിച്ച ഫയല്‍ മുഖ്യ തെരഞ്ഞെടുപ്പ് ഓഫീസര്‍ ടിക്കാറാം മീണ മടക്കി. ചീഫ് സെക്രട്ടറിക്കാണ് ഫയല്‍ തിരിച്ചയച്ചത്. ഉത്തരവ് അടിയന്തരമായി ഇറക്കേണ്ട സാഹചര്യവും കാരണവും വിശദമാക്കണമെന്ന് ടിക്കാറാം മീണ ചീഫ് സെക്രട്ടറിയോട് ആവശ്യപ്പെട്ടു. മന്ത്രിസഭ ആവശ്യപ്പെട്ടിട്ടും എന്തുകൊണ്ട് സമയബന്ധിതമായി ഉത്തരവിറക്കിയില്ലെന്നും ടിക്കാറാം മീണ ചോദിച്ചു

മൊറട്ടോറിയം നീട്ടി ഉത്തരവിറക്കാന്‍ റവന്യൂ വകുപ്പിന് അനുമതി നല്‍കണമെന്നാവശ്യപ്പെട്ട് മീണയ്ക്കു കഴിഞ്ഞ ദിവസം ചീഫ് സെക്രട്ടറി കത്ത് അയച്ചിരുന്നു. തെരഞ്ഞെടുപ്പു കമ്മിഷന്റെ അനുമതി തേടാത്തതിന്റെ പേരില്‍ കഴിഞ്ഞ മന്ത്രിസഭാ യോഗത്തില്‍ ചീഫ് സെക്രട്ടറിക്കെതിരെ വിമര്‍ശനം ഉയര്‍ന്നിരുന്നതിന്റെ പശ്ചാത്തലത്തിലായിരുന്നു ഇത്. മൊറട്ടോറിയം ദീര്‍ഘിപ്പിച്ച് ഉത്തരവിറക്കാന്‍ തെരഞ്ഞെടുപ്പു കമ്മിഷന്റെ അനുമതി തേടണമെന്നു റവന്യൂ മന്ത്രി ഇ.ചന്ദ്രശേഖരനായിരുന്നു നിര്‍ദേശിച്ചിരുന്നത്. ചീഫ് സെക്രട്ടറിക്കെതിരെ മുഖ്യമന്ത്രിയും കൃഷിമന്ത്രിയുമെല്ലാം രൂക്ഷമായ വിമര്‍ശനം നടത്തിയിരുന്നു.