പീഡനശ്രമത്തിൽ നിന്ന് പെൺകുട്ടി സ്വയം രക്ഷപെട്ടത് സ്വയ രക്ഷയ്ക്കായി പഠിച്ച ആയോധന വിദ്യയിലൂടെ. പ്രായപൂർത്തിയാകാത്ത പെൺകുട്ടിയെ പീഡിപ്പിക്കാൻ ശ്രമിച്ച രാമങ്കരി ബ്ലോക്ക് നമ്പർ 77ൽ സനീഷ്കുമാറിനെ (35) അറസ്റ്റ് ചെയ്തു. കഴിഞ്ഞ ഒക്ടോബറിലാണ് കേസിന് ആസ്പദമായ സംഭവം നടന്നത്. പ്രതിയുടെ വീട്ടിലെത്തിയ കുട്ടിയെ പീഡിപ്പിക്കാൻ ശ്രമിക്കുകയായിരുന്നു. പെൺകുട്ടി കരാട്ടെ പഠിച്ചിട്ടുള്ളതിനാൽ കുതറി രക്ഷപ്പെട്ട് ഓടി.

എന്നാൽ പീഡിപ്പിക്കാൻ ശ്രമിച്ച ദൃശ്യങ്ങൾ ഫോണിൽ പകർത്തിയിട്ടുണ്ടെന്നു പറഞ്ഞു പ്രതി നിരന്തരം കുട്ടിയെ ഭീഷണപ്പെടുത്തിയിരുന്നു.കഴിഞ്ഞ ഞായർ രാത്രി രണ്ടോടെ പ്രതി പെൺകുട്ടിയെ ഫോണിൽ വിളിച്ച് ഇറങ്ങി വരാൻ ആവശ്യപ്പെടുകയും വന്നില്ലെങ്കിൽ അച്ഛനെയും സഹോദരനെയും കൊല്ലുമെന്നു ഭീഷണിപ്പെടുത്തുകയും ചെയ്തു.

കുട്ടി അമ്മാവനോടു കാര്യം പറഞ്ഞതോടെയാണു വിവരം വീട്ടുകാർ അറിയുന്നത്. തുടർന്നു വീട്ടുകാർ രാമങ്കരി സ്റ്റേഷനിലെത്തി പരാതി നൽകി. രാമങ്കരി എസ്ഐ ആനന്ദ് ബാബുവിന്റെ നേതൃത്വത്തിൽ പ്രതിയെ കിടങ്ങറയിൽ നിന്ന് ഇന്നലെ അറസ്റ്റു ചെയ്‌തു. ഇയാളെ റിമാൻഡ് ചെയ്തു.