ശബരിമല പ്രക്ഷോഭത്തില്‍ ഏറ്റവുമധികം ശ്രദ്ധിക്കപ്പെട്ട രണ്ടുപേരാണ് കെ. സുരേന്ദ്രനും എസ്പി യതീഷ് ചന്ദ്രനും. ബിജെപിയില്‍ തന്നെ ഒതുങ്ങി കഴിഞ്ഞിരുന്ന സുരേന്ദ്രന് ജനകീയ മുഖം കിട്ടിയത് ശബരിമലയിലൂടെയാണ്. അതേസമയം കട്ടയ്ക്ക് നില്‍ക്കുന്ന പോലീസുകാരനെന്ന പരിവേഷം സുരേന്ദ്രന്റെ അറസ്റ്റോടെ യതീഷ് ചന്ദ്രനും ലഭിച്ചു. 

കാലം മാറി എല്ലാവരും എല്ലാം മറന്ന് തുടങ്ങിയ സമയത്താണ് തെരഞ്ഞെടുപ്പ് വന്നത്. ഇതോടെ സുരേന്ദ്രന്‍ വീണ്ടും ശ്രദ്ധിക്കപ്പെട്ടു. കേന്ദ്ര നേതൃത്വം നേരിട്ടിടപെട്ട് പത്തനംതിട്ട സീറ്റ് സുരേന്ദ്രന് തന്നെ ലഭ്യമാക്കി. സുരേന്ദ്രന്‍ പത്തനംതിട്ടയില്‍ കത്തിക്കയറുകയാണ്. അതേസമയം തൃശൂര്‍ പൊലീസ് കമീഷണര്‍ യതീഷ് ചന്ദ്രയും ഹിറ്റിലേക്കുയരുകയാണ്. സിനിമയ്ക്ക് വേണ്ടി തിരക്കഥ എഴുതുന്ന തിരക്കിലാണ് യതീഷ് ചന്ദ്ര. ഉപേക്ഷിക്കപ്പെട്ട അമ്മമാരുടെ കഥ പറയുന്ന ഹ്രസ്വചിത്രം കേരള പൊലീസാണ് ഒരുക്കുന്നത്.

'നല്ലമ്മ' എന്ന് പേരിട്ടിരിക്കുന്ന ചിത്രം സംവിധാനം ചെയ്യുന്നത് കൊടുങ്ങല്ലൂര്‍ തീരദേശ സ്‌റ്റേഷനിലെ സീനിയര്‍ സിവില്‍ പൊലീസ് ഓഫീസറായ സാന്റോ തട്ടിലാണ്.

നടിയും ഡബ്ബിങ് കലാകാരിയുമായ എം തങ്കമണിയാണ് മുഖ്യവേഷം അവതരിപ്പിക്കുന്നത്. കേരളത്തിലെ നവോത്ഥാന പോരാളികളില്‍ പ്രമുഖനായ എംആര്‍ബിയുടെ മകളാണ് തങ്കമണി. സംവിധായകന്‍ തന്നെയാണ് ചിത്രത്തില്‍ മകനായി വേഷമിടുന്നത്. 

അങ്ങനെ യതീഷ് ചന്ദ്ര തിരക്കഥയെഴുതുമ്പോള്‍ താടി വളര്‍ത്തി കറുത്ത ഷര്‍ട്ടണിഞ്ഞ് പത്തനംതിട്ടയില്‍ സുരേന്ദ്രനും തകര്‍ക്കുകയാണ്. കേരളത്തില്‍ ബി.ജെ.പി ഏറ്റവും കൂടുതല്‍ വിജയപ്രതീക്ഷ അര്‍പ്പിക്കുന്ന സ്റ്റാര്‍ കാന്‍ഡിഡേറ്റാണ് സുരേന്ദ്രന്‍. ഏറെ വിവാദങ്ങള്‍ക്കും കാത്തിരിപ്പുകള്‍ക്കുമൊടുവിലാണ് സുരേന്ദ്രന്റെ സ്ഥാനാര്‍ത്ഥിത്വം ബി.ജെ.പി കേന്ദ്ര നേതൃത്വം പ്രഖ്യാപിച്ചത്. കാത്തിരുന്ന പ്രഖ്യാപനം വന്നതോടുകൂടി അണികളും ആവേശഭരിതരാവുകയായിരുന്നു.

സ്ഥാനാര്‍ത്ഥിത്വ പ്രഖ്യാപനം വൈകിയത് പ്രചരണത്തില്‍ ആദ്യമൊക്കെ പിന്നിലാക്കിയെങ്കിലും മികച്ച സ്വീകരണമാണ് സുരേന്ദ്രന് പത്തനംതിട്ടയില്‍ ലഭിച്ചുകൊണ്ടിരിക്കുന്നത്. 

താടി വളര്‍ത്തി കറുപ്പ് ഷര്‍ട്ടണിഞ്ഞ് തന്നെയാണ് സുരേന്ദ്രന്‍ എല്ലായിടത്തും പ്രചരണത്തിനെത്തുന്നത്..ശബരിമല തന്നെയാണ് തങ്ങളുടെ പ്രധാന പ്രചാരണ ആയുധമെന്ന് ബി..ജെ..പി നേരത്തെ തന്നെ വ്യക്തമാക്കിയിരുന്നെങ്കിലും സുരേന്ദ്രന്റെ വേഷവിധാനം അണികളില്‍ കൂടുതല്‍ ആവേശം ചെലുത്തുന്നുണ്ട്.. ശബരിമല സമരനായകനെന്ന പരിവേഷത്തോടെയാണ് സുരേന്ദ്രന്റെ പ്രചരണം..ഈ വീരപരിവേഷവുമായി സുരേന്ദ്രനെ തിരഞ്ഞെടുപ്പ് ഗോദയില്‍ ഇറക്കിയാല്‍ മതിയെന്ന നിര്‍ദേശം തന്നെയാണ് പാര്‍ട്ടിയും നല്‍കിയിരിക്കുന്നത്.. 

സ്ഥാനാര്‍ത്ഥിയായി തിരുവല്ല സ്‌റ്റേഷനില്‍ ട്രെയിനില്‍ വന്നിറങ്ങിയപ്പോഴും വേഷം കറുപ്പ് ഷര്‍ട്ടും വെള്ള മുണ്ടുമായിരുന്നു. സ്വീകരണത്തിനിടെ പ്രവര്‍ത്തകരുടെ ശരണംവിളി ഉയര്‍ന്നു. ഇന്നലെ കോന്നിയിലും അടൂരിലും പന്തളത്തും റോഡ് ഷോയില്‍ പങ്കെടുത്തപ്പോഴും കറുപ്പ് ഷര്‍ട്ടാണ് ധരിച്ചത്. ഇവിടങ്ങളിലും ശരണംവിളി ഉയര്‍ന്നു..ശബരിമല വിഷയത്തില്‍ സംഘപരിവാര്‍ പ്രക്ഷോഭത്തിന്റെ മുന്‍നിരയില്‍ നിന്ന കെ.സുരേന്ദ്രന്‍ വന്നതോടെ ശക്തമായ ത്രകോണപ്പോരിനാണ് പത്തനംതിട്ടയില്‍ കളം ഒരുങ്ങിയത്.