കോൺഗ്രസ് അധ്യക്ഷൻ രാഹുൽ ഗാന്ധി വയനാട്ടിൽ മത്സരിക്കാൻ വരുമെന്ന് തന്നെയാണ് പ്രതീക്ഷയെന്ന് കെപിസിസി പ്രസിഡന്‍റ് മുല്ലപ്പള്ളി രാമചന്ദ്രൻ. രാഹുലിന്‍റെ സ്ഥാനാർത്ഥിത്വത്തിൽ ചില നടപടിക്രമങ്ങൾ പൂർത്തിയാകാനുണ്ടെന്നും അതുണ്ടായാൽ പ്രഖ്യാപനം ഉടൻ ഉണ്ടാകുമെന്നും മുല്ലപ്പള്ളി വ്യക്തമാക്കി.

രാഹുൽ ഗാന്ധി വയനാട്ടിലേക്ക് വരാതിരിക്കാൻ ദില്ലിയിൽ ചില പ്രസ്ഥാനങ്ങൾ ഗൂഢാലോചന നടത്തുന്നുണ്ട്, ഇത് വരും ദിവസങ്ങളിൽ വെളിപ്പെടുമെന്നും മുല്ലപ്പള്ളി പറഞ്ഞു. രാഹുൽ വരുന്നതോടെ ഇടതുപക്ഷത്തിന്‍റെ ഉറക്കം കെട്ടിരിക്കുകയാണ് മുല്ലപ്പള്ളി ആഞ്ഞടിച്ചു. രാഹുല്‍ ഗാന്ധി വയനാട്ടില്‍ മല്‍സരിക്കരുതെന്നാണ് സി.പി.എം ആഗ്രഹിച്ചത്. രാഹുൽ കേരളത്തിൽ മത്സരിക്കാൻ വരരുതെന്ന് പറയാൻ മുഖ്യമന്ത്രിക്ക് എന്താണ് അവകാശം? ഇങ്ങനെയൊരു പ്രസ്താവന നടത്തിയതെന്തിനെന്ന് മുഖ്യമന്ത്രി വിശദീകരിക്കണമെന്നും മുല്ലപ്പള്ളി ആവശ്യപ്പെട്ടു. രാഹുലിനെ കോണ്‍ഗ്രസില്‍ ആരും തടഞ്ഞിട്ടില്ല. കേരളനേതൃത്വമാണ് രാഹുല്‍ മല്‍സരിക്കണമെന്ന് ആവശ്യപ്പെട്ടത്. ഇനി രാഹുലിന്റേതാണ് അന്തിമതീരുമാനമെന്നും മുല്ലപ്പളളി രാമചന്ദ്രന്‍ കോഴിക്കോട്ട് പറഞ്ഞു.

രാഹുൽ വരുമെന്ന് പറഞ്ഞിട്ടില്ലെന്ന് ഉമ്മൻചാണ്ടി പറഞ്ഞതിനെക്കുറിച്ച് അറിയില്ല ന്നും മുല്ലപ്പള്ളി വ്യകതമാക്കി. ഉമ്മൻചാണ്ടി അങ്ങനെ പറയാൻ സാധ്യതയില്ല. എല്ലാ യുഡിഎഫ് പ്രവർത്തകരും ഒറ്റക്കെട്ടായാണ് രാഹുൽ വരണമെന്ന് ആവശ്യപ്പെട്ടതെന്നും മുല്ലപ്പള്ളി വ്യക്തമാക്കി.

അതേസമയം രാഹുൽ വരുമെന്നതിൽ തീരുമാനം വൈകുമ്പോൾ വയനാട്ടിൽ പ്രവർത്തകർ നിരാശയിലാണെന്ന് വടകരയിലെ യുഡിഎഫ് സ്ഥാനാ‍ർത്ഥി കെ മുരളീധരൻ പ്രതികരിച്ചു. വടകരയിലെ പ്രഖ്യാപനം വൈകുന്നതിൽ ആശങ്കയില്ല. എണ്ണയിട്ട യന്ത്രം പോലെ വടകരയിൽ പ്രചാരണം മുന്നേറുകയാണെന്നും മുരളീധരൻ വ്യക്തമാക്കി.