അരിയല്ലൂര്‍ ബീച്ചില്‍ കഞ്ചാവ് വില്‍പ്പനയ്ക്കിടെ പിടിയിലായ യുവാവ് രക്ഷപ്പെടാനായി കടലില്‍ ചാടിയെങ്കിലും പിന്നാലെ ചാടിയ എക്‌സൈസുകാര്‍ നാട്ടുകാരുടെ സഹായത്തോടെ പിടികൂടി. പുരക്കല്‍ നൗഷാദ് എന്നയാളാണ് രക്ഷപ്പെടുന്നതിനായി കടലില്‍ ചാടിയത്.വെള്ളിയാഴ്ച രാത്രി ഒന്പതിനു പ്രതിയുടെ വീടിന്റെ പരിസരത്ത് ഇരുട്ടില്‍ മറഞ്ഞിരുന്ന എക്‌സൈസുകാര്‍ പ്രതി കഞ്ചാവ് കൈമാറുന്നതിനിടെ പിടികൂടുകയായിരുന്നു.
എക്‌സൈസുകാര്‍ കഞ്ചാവ് പരിശോധിക്കുന്നതിനിടെ കടല്‍ഭിത്തി ചാടിക്കടന്നു ഇയാള്‍ കടലിലേക്ക് ചാടി. തുടര്‍ന്നു നീന്തി രക്ഷപ്പെടാന്‍ ശ്രമിച്ചെങ്കിലും പിന്തുടര്‍ന്ന എക്‌സൈസുകാര്‍ പുതിയ പാലത്തിനു സമീപം വച്ച് പ്രതിയെ പിടികൂടുകയായിരുന്നു.
പ്രതി നൗഷാദിനും രണ്ട് എക്‌സൈസ് ഉദ്യോഗസ്ഥര്‍ക്കും പരിക്കേറ്റിട്ടുമുണ്ട്. പരിക്കേറ്റവരെ തിരുരങ്ങാടി താലുക്ക് ആശുപത്രിയില്‍ ചികിത്സക്ക് വിധേയരാക്കി.