കാലപ്പഴക്കമുള്ള ഇരുനില കെട്ടിടത്തില്‍ വന്‍ തീപിടിത്തം. പൂര്‍ണമായി കത്തിനശിച്ച കെട്ടിടം തകര്‍ന്നുവീണു. താഴത്തെ പാറയിലെ ബി.ബി.ഐ ബുക്ക് കമ്പനിക്കാണ് തീ പിടിച്ചത്. ഞായറാഴ്ച രാത്രി ഒമ്പതോടെയാണ് സംഭവം. ചൊവ്വന്നൂര്‍ അയ്യപ്പത്ത് റോഡില്‍ കുത്തൂര്‍ അപ്പു കുഞ്ഞന്റെ ഉടമസ്ഥതയിലുള്ളതാണ് കമ്പനി. കുന്നംകുളം ചെറുവത്തൂര്‍ സി.വി. പോളിന്‍േറതാണ് കെട്ടിടം. ഓടിട്ട ഇരുനില കെട്ടിടത്തിന്റെ പിറകുവശത്തുനിന്ന് തീ ഉയരുന്നതാണ് ആദ്യം ശ്രദ്ധയില്‍പ്പെട്ടത്. നിമിഷങ്ങള്‍ക്കകം കെട്ടിടം തകര്‍ന്നു വീണു. വഴിയാത്രക്കാരും സമീപവാസികളും ഓടിയെത്തുമ്പോഴേക്കും തീ പടര്‍ന്നു. കെട്ടിടത്തിന്റെ ഭാഗങ്ങള്‍ റോഡിലേക്ക് വീണു.

സംഭവ സമയം അതുവഴി പോയ ഇരുചക്രവാഹനങ്ങള്‍ തലനാരിഴക്കാണ് രക്ഷപ്പെട്ടത്. ലക്ഷക്കണക്ക് രൂപയുടെ പുസ്തകങ്ങളും കടലാസുകളും കത്തിനശിച്ചു. ഫയര്‍ഫോഴ്‌സ് ഉദ്യോഗസ്ഥരും പൊലീസും ഏറെ ശ്രമിച്ചാണ് തീ നിയന്ത്രണവിധേയമാക്കിയത്. രാത്രി ഏറെ വൈകിയും തീ പൂര്‍ണമായി അണക്കാനുള്ള ശ്രമം തുടരുകയാണ്. അവധി ദിനവും രാത്രിയുമായതിനാല്‍ വന്‍ ദുരന്തം ഒഴിവായി.

സംഭവത്തെ തുടര്‍ന്ന് കുറെ സമയം ഗതാഗതം തടസ്സപ്പെട്ടു. വൈദ്യുതി ബന്ധം പൂര്‍ണമായും നിലച്ചു