സംസ്ഥാനത്ത് യു ഡി എഫ് മുന്നേറ്റമെന്ന മനോരമ സര്‍വേ പുറത്തുവന്നതോടെ കാസര്‍കോട്, ആലത്തൂര്‍ മണ്ഡലങ്ങള്‍ ഉള്‍പ്പെടെ യു ഡി എഫ് ദുര്‍ബലമായ സ്ഥലങ്ങളില്‍ പോലും കോണ്‍ഗ്രസിന്റെ വന്‍ മുന്നേറ്റം ദൃശ്യമാകുന്നു. ഒരിക്കലും ജയിക്കില്ലെന്ന് കരുതിയ രാജ് മോഹന്‍ ഉണ്ണിത്താനും രമ്യാ ഹരിദാസും പോലും ജയത്തിന്റെ കരയ്ക്ക് അടുക്കുകയാണ് .

മനോരമ സര്‍വേ പുറത്തുവന്നതിനൊപ്പം രാഹുല്‍ ഗാന്ധിയുടെ വരവു കൂടിയായപ്പോള്‍ യു ഡി എഫ് പ്രവര്‍ത്തകര്‍ വലിയ ആവേശത്തിലായി. കേരളത്തില്‍ യുഡിഎഫ് വിജയം ഉറപ്പിച്ച മട്ടിലാണ് കാര്യങ്ങള്‍. കുറഞ്ഞത് 19 സീറ്റെങ്കിലും ലഭിക്കാനിടയുണ്ടെന്ന് അവര്‍ വിശ്വസിക്കുന്നു.

ഇതിനൊപ്പം സര്‍ക്കാര്‍ അണക്കെട്ട് തുറന്നു വിട്ട് പ്രളയമുണ്ടാക്കിയെന്ന അമിക്കസ് ക്യൂരി റിപ്പോര്‍ട്ടും സര്‍ക്കാരിന് വലിയ പ്രഹരമായി മാറി. ഹൈകോടതിയില്‍ സമര്‍പ്പിച്ച റിപ്പോര്‍ട്ടിന്റെ ഫലം തെരഞ്ഞടുപ്പില്‍ തീര്‍ച്ചയായും പ്രതിഫലിക്കും. കേന്ദ്രത്തില്‍ യു പി എ അധികാരത്തില്‍ വരുമെന്ന പ്രവചനവും വോട്ടര്‍മാരെ സ്വാധീനിക്കും.

അതേ സമയം ബി ജെ പി പ്രവര്‍ത്തകര്‍ നിരാശരരായി മാറുകയും ചെയ്തു. കേരളത്തില്‍ സാധ്യതയില്ലെന്ന വസ്തുത തിരിച്ചറിഞ്ഞതോടെ പ്രവര്‍ത്തകര്‍ വിഷമത്തിലായി.

ലോക്‌സഭ തെരഞ്ഞെടുപ്പില്‍ കേരളത്തില്‍ യുഡിഎഫിന് വന്‍ മുന്നേറ്റം പ്രവചിച്ചാണ് മനോരമ കാര്‍വി ഇന്‍സൈറ്റ്‌സിനൊപ്പം നടത്തിയ സര്‍വേ പുറത്തു വന്നത് . കേരളത്തിലെ 20 ലോക്‌സഭ മണ്ഡലങ്ങളിലെ 10 എണ്ണത്തിലെ ഫലം പ്രവചിച്ചപ്പോള്‍ എട്ടിടത്തും യുഡിഎഫിന് അനുകൂലം എന്നാണ് സര്‍വേ പറയുന്നത്. ബാക്കിയുള്ള പത്തിലും യു ഡി എഫിന് തന്നെയാണ് മുന്‍തൂക്കം എന്നാണ് സൂചന.

ബുധനാഴ്ച പ്രഖ്യാപിച്ച സര്‍വേയില്‍ രണ്ടു മണ്ഡലങ്ങളിലാണ് എല്‍!ഡിഎഫിന് വ്യക്തമായ മേല്‍ക്കൈ പ്രവചിക്കുന്നത്. ചാലക്കുടിയില്‍ ഇഞ്ചോടിഞ്ച് പോരാട്ടം എന്നാണ് സര്‍വേ വിലയിരുത്തുന്നത്. ആലപ്പുഴ, ആറ്റിങ്ങല്‍ മണ്ഡലങ്ങള്‍ എല്‍ഡിഎഫിനൊപ്പമെന്ന് പറയുന്ന സര്‍വേ യുഡിഎഫിന് ആലത്തൂര്‍, ഇടുക്കി, എറണാകുളം, കണ്ണൂര്‍, കാസര്‍കോട്, കൊല്ലം, കോട്ടയം മണ്ഡലങ്ങള്‍ ലഭിക്കുമെന്ന് പ്രവചിക്കുന്നു.

ആലപ്പുഴയും ആറ്റിങ്ങലും എല്‍ഡിഎഫ് നേടുമെന്നും സര്‍വേ പറയുന്നു. ചാലക്കുടിയില്‍ ഇരു മുന്നണികളും ഫോട്ടോഫിനിഷിലേയ്ക്ക് എന്നാണ് പറയുന്നത്. ചാലക്കുടിയില്‍ യുഡിഎഫിന് 40 ശതമാനം വോട്ടും എല്‍ഡിഎഫിന് 39 ശതമാനം വോട്ടുമാണ് പ്രവചിക്കുന്നത്.

ആറ്റിങ്ങലില്‍ എല്‍ഡിഎഫിന് 44 ശതമാനം വോട്ടും യുഡിഎഫിന് 38 ശതമാനം വോട്ടും എന്‍ഡിഎയ്ക്ക് 13 ശതമാനം വോട്ടുമാണ് പ്രവചിക്കുന്നത്. എറണാകുളത്ത് യുഡിഎഫ് 41 ശതമാനം വോട്ട് നേടും. എല്‍ഡിഎഫ് 39 ശതമാനം വോട്ടും എന്‍ഡിഎ 11 ശതമാനവും. ഇടുക്കിയില്‍ യുഡിഎഫ് 44, എല്‍ഡിഎഫ് 39, എന്‍ഡിഎ ഒമ്പത് ശതമാനം.

കണ്ണൂരും കാസര്‍കോടും യുഡിഎഫ് തിരിച്ചുപിടിക്കുമെന്നാണ് സര്‍വേ പറയുന്നത്. കണ്ണൂര്‍ മണ്ഡലത്തില്‍ യുഡിഎഫ്: 49 ശതമാനം, എല്‍ഡിഎഫ്: 38 ശതമാനം, എന്‍ഡിഎ: 9 ശതമാനം എന്ന രീതിയിലാണ് വോട്ടുനില. കാസര്‍കോട് മണ്ഡലത്തില്‍ യുഡിഎഫ് സ്ഥാനാര്‍ത്ഥി രാജ് മോഹന്‍ ഉണ്ണിത്താന് 43 ശതമാനം വോട്ട് ലഭിക്കും എന്നാണ് സര്‍വേ പറയുന്നത്. എല്‍ഡിഎഫിന് : 35 ശതമാനം വോട്ട് കിട്ടും.

എറണാകുളവും ഇടുക്കിയും യുഡിഎഫ് പിടിക്കും. എറണാകുളത്ത് യുഡിഎഫ് 41 ശതമാനം വോട്ട് നേടും. എല്‍ഡിഎഫ് 33 ശതമാനം വോട്ട് നേടും. എന്‍ഡിഎ വോട്ട് 11 ശതമാനമാണ്. ഇടുക്കിയില്‍ ഡീന്‍ കുര്യക്കോസ് യുഡിഎഫിനായി 44 ശതമാനം വോട്ട് പിടിക്കും. എല്‍ഡിഎഫ് 39 ശതമാനമാണ് വോട്ട് പിടിക്കുക. എന്‍ഡിഎ വോട്ട് ശതമാനം 9 ആയിരിക്കും.

പെരിയ കൊലപാതകം വലിയ ചര്‍ച്ചയായ സമയത്ത് എടുത്ത സര്‍വേയെന്നതാകാം കാസര്‍കോട്ടെ ഫലസൂചനയെ സ്വാധീനിച്ചത് എന്ന് സര്‍വേ പറയുന്നു. കോട്ടയത്ത് അഭിപ്രായ സര്‍വേ ഫലത്തില്‍ യുഡിഎഫിനാണ് മുന്‍തൂക്കം. സംസ്ഥാനത്ത് കടുത്ത പോരാട്ടം നടക്കുന്ന കൊല്ലത്തും യുഡിഎഫിന് മേല്‍ക്കൈയെന്നാണ് സര്‍വേ പറയുന്നത്.

ശബരിമലയും മുഖ്യമന്ത്രിയുടെ ധാര്‍ഷ്ട്യവും ചേര്‍ന്ന് കേരളത്തില്‍ ഇടതുമുന്നണിയെ തറ പറ്റിക്കുമെന്നാണ് കരുതുന്നത്. അക്കാര്യം പിണറായിക്കും അറിയാം എന്നതാണ് വാസ്തവം.