ബിജെപി നിയന്ത്രണത്തിലുള്ള ജനം ടി വിക്ക് ഹൈപ്പ് നല്‍കാന്‍ വീണ്ടും പിണറായി സര്‍ക്കാര്‍. ശബരിമല വിവാദം കത്തിനില്‍ക്കെ റേറ്റിംഗില്‍ ഒന്നാമതെത്തിയ ചാനല്‍ പിന്നീട് നാലാമതായിരുന്നു. നാലാമതായ ചാനലിനെ ഒന്നാമത് എത്തിക്കാനാണ് സര്‍ക്കാര്‍ ശ്രമം .

ജനം ടിവി റിപ്പോര്‍ട്ടര്‍ക്കെതിരെ ജാമ്യമില്ലാ വകുപ്പ് പ്രകാരം കേസെടുത്താണ് പുതിയ സഹായം നല്‍കിയിരിക്കുന്നത്. പത്തനംതിട്ട റിപ്പോര്‍ട്ടര്‍ സി.ജി.ഉമേഷിനെതിരെയാണ് പോലീസ് കേസെടുത്തത്. ശബരിമല യുവതീ പ്രവേശനവുമായി ബന്ധപ്പെട്ട് വാര്‍ത്ത റിപ്പോര്‍ട്ട് ചെയ്തതിനാണ് കേസ്. പോലീസിന്റെ കൃത്യനിര്‍വ്വഹണം തടസ്സപ്പെടുത്തിയെന്നാരോപിച്ചാണ് നടപടി. പൈങ്കുനി ഉത്ര സമയത്ത് ശബരിമലയില്‍ എസ്പിയായിരുന്ന പോലീസു ഉദ്യോഗസ്ഥനാണ് അറസ്റ്റിന് ഉത്തരവിട്ടത്. എസ്പിയുടെ ഉത്തരവിന് പിന്നാലെ പത്തനംതിട്ടയിലെ ജനം ടിവി ഓഫീസ് പോലീസ് നിരീക്ഷണത്തിലായി. പ്രത്യേക പോലീസ് സംഘത്തെയാണ് ഉമേഷിനെ അറസ്റ്റ് ചെയ്യാന്‍ നിയോഗിച്ചിട്ടുള്ളത്.

നേരത്തെ പൈങ്കുനി ഉത്രം മഹോത്സവത്തിനിടെ എസ്പി അയ്യപ്പഭക്തനെ മര്‍ദ്ദിച്ചത് ഉമേഷ് റിപ്പോര്‍ട്ട് ചെയ്തിരുന്നു. അയ്യപ്പഭക്തനായ ഗണേഷനെ എസ്പി മുട്ട് കയറ്റി അടിവയറ്റില്‍ ഇടിച്ചത് ഉമേഷ് മൊബൈല്‍ ക്യാമറയില്‍ പകര്‍ത്തി. ഇത് ഡിലീറ്റ് ചെയ്യാന്‍ എസ്പി ആവശ്യപ്പെട്ടെങ്കിലും ഉമേഷ് വഴങ്ങിയില്ല. അന്ന് വാര്‍ത്ത പുറത്ത് വരാതിരിക്കാന്‍ എസ്പി ജനം ടിവി റിപ്പോര്‍ട്ടറോടും മാനേജ്‌മെന്റിനോടും സംസാരിച്ചിരുന്നു. എന്നാല്‍ വാര്‍ത്ത പുറത്ത് വന്നതിന് പിന്നാലെ ഉമേഷിനെ എസ്പി ഭീഷണിപ്പെടുത്തുകയും കേസെടുക്കുമെന്ന് മുന്നറിയിപ്പ് നല്‍കുകയും ചെയ്തു.

അതേസമയം മാധ്യമപ്രവര്‍ത്തകനെതിരെ കേസെടുത്തിട്ടും കെയുഡബ്ല്യുജെ ഇതുവരെ പ്രതികരിച്ചിട്ടില്ല. ലീഗ് സിപിഎം അനുഭാവികള്‍ എന്നിവരാണ് കെയുഡബ്ല്യുജെ തലപ്പത്തുള്ളതെന്നാണ് ജനത്തിന്റെ ആക്ഷേപം. ഇതിനിടെ തൊഴില്‍ തടസ്സപ്പെടുത്തുകയും കള്ളക്കേസെടുക്കുകയും ചെയ്ത എസ്പിയ്‌ക്കെതിരെ ഹൈക്കോടതിയെ സമീപിക്കാന്‍ ഒരുങ്ങുകയാണ് ഉമേഷ്.

പൊതു തെരഞ്ഞടുപ്പ് നടക്കുമ്പോള്‍ ശബരിമല പോലുള്ള വിഷയങ്ങളില്‍ സര്‍ക്കാരുകളൊന്നും പക്ഷം ചേരാറില്ല. തെറ്റുകള്‍ അധികമില്ലാത്ത വിധം ഭരിച്ചു കൊണ്ടിരുന്ന പിണറായിയെ അനഭിമതനാക്കിയ വിഷയമാണ് ശബരിമല. ബിജെപിയെ കേരളത്തില്‍ വളര്‍ത്തിയതും ശബരിമല തന്നെയാണ്. ഇതൊക്കെയായിട്ടും തെരഞ്ഞടുപ്പിന്റെ ഉച്ചസ്ഥായിയില്‍ നില്‍ക്കുമ്പോള്‍ ശബരിമലയെ വീണ്ടും വിവാദത്തിലാക്കുന്നത് തീര്‍ച്ചയായും മണ്ടത്തരം തന്നെയാണ്. അതുകൊണ്ട് തന്നെ ജനം ചാനലിന് സര്‍ക്കാര്‍ ഒരു കൈ സഹായം നല്‍കുകയാണെന്ന് കരുതേണ്ടി വരുന്നത്. അഥവാ സര്‍ക്കാര്‍ ഇക്കാര്യം അറിഞ്ഞില്ലെങ്കില്‍ ഉദ്യോഗസ്ഥനെ വിലക്കുകയാണ് വേണ്ടത്.