ശബരിമലയില്‍ കയറിയ യുവതികളെക്കുറിച്ചുള്ള ചോദ്യം പി.എസ്.സി. ചെറുതായിട്ടല്ല വട്ടം ചുറ്റിച്ചത്. തെരഞ്ഞെടുപ്പ് അടുത്ത വേളയില്‍ ചോദ്യം ചോദിച്ച പി.എസ്.സി. നടപടി തെറ്റെന്നാണ് പൊതുവേയുള്ള ജനവികാരം. ഇത് ബിജെപിയ്ക്ക് ഗുണം ചെയ്യുമെന്നാണ് പൊതുവേ കണക്കാക്കുന്നത്. അതിനാല്‍ തന്നെ അതിന് ശേഷമുള്ള പിഎസ്.സി. യോഗം അംഗങ്ങളുടെ തര്‍ക്കത്തിനിടയാക്കി. 

ചോദ്യത്തില്‍ പിശകില്ലെന്ന് ഭരണകക്ഷിയംഗങ്ങള്‍ വാദിച്ചപ്പോള്‍ റദ്ദാക്കണമെന്ന് മറ്റുള്ളവരും ആവശ്യപ്പെട്ടു. വിശദ ചര്‍ച്ചയ്ക്കുശേഷം ചോദ്യം റദ്ദാക്കാന്‍ യോഗം തീരുമാനിച്ചു. ചോദ്യകര്‍ത്താവിനെതിരേ വകുപ്പുതല നടപടികള്‍ സ്വീകരിക്കാന്‍ ശുപാര്‍ശ ചെയ്യും. ചോദ്യകര്‍ത്താക്കളുടെ പാനലില്‍നിന്ന് ഇദ്ദേഹത്തെ ഒഴിവാക്കാനും യോഗത്തില്‍ ധാരണയായി.

മെഡിക്കല്‍ വിദ്യാഭ്യാസവകുപ്പില്‍ അസിസ്റ്റന്റ് പ്രൊഫസര്‍ ഇന്‍ സൈക്യാട്രിക്കായി നടത്തിയ ഓണ്‍ലൈന്‍ പരീക്ഷയിലാണ് വിവാദചോദ്യമുണ്ടായത്. ഇംഗ്ലീഷിലായിരുന്നു ചോദ്യം. 2018 സെപ്റ്റംബര്‍ 28ലെ സുപ്രീംകോടതി വിധിയനുസരിച്ച് ശബരിമല അയ്യപ്പക്ഷേത്രത്തില്‍ ആദ്യം പ്രവേശിച്ച 1050 വയസ്സിനിടയിലുള്ള വനിതകള്‍ ആരെന്നായിരുന്നു ചോദ്യം. 

ശരിയേതെന്ന് തിരഞ്ഞെടുക്കാന്‍ നാല് ഉത്തരങ്ങളും നല്‍കിയിരുന്നു. (എ) ബിന്ദു തങ്കം കല്യാണി, സി.എസ്. ലിബി (ബി) ബിന്ദു അമ്മിണി, കനകദുര്‍ഗ (സി) ശശികല, ശോഭ (ഡി) സൂര്യ ദേവാര്‍ച്ചന, പാര്‍വതി എന്നിവയായിരുന്നു ഓപ്ഷനുകളായി നല്‍കിയത്. 

പ്രാഥമിക ഉത്തരസൂചികയില്‍ ബിന്ദു അമ്മിണിയും കനകദുര്‍ഗയും ശരിയുത്തരമായി അംഗീകരിച്ച് പി.എസ്.സി. പ്രസിദ്ധീകരിക്കുകയും ചെയ്തു. ചോദ്യത്തിലും ഉത്തരത്തിലും അവ്യക്തതയും തെറ്റും ഉണ്ടെന്നാണ് യോഗത്തില്‍ പൊതുധാരണയുണ്ടായത്. ഇംഗ്ലീഷിലുള്ള ചോദ്യത്തില്‍ വ്യാകരണപ്പിശകുണ്ട്. മാത്രമല്ല, ഉത്തരത്തിന് ആധികാരികമായ രേഖകളില്ലെന്നും ഭൂരിഭാഗം അംഗങ്ങള്‍ വാദിച്ചു.

യുവതികളുടെ പ്രവേശനം സംസ്ഥാനമുഖ്യമന്ത്രിയും ദേവസ്വം മന്ത്രിയും പൊലീസ് മേധാവിയും സ്ഥിരീകരിച്ചിട്ടുണ്ടെന്ന് ഇടതുപക്ഷാംഗങ്ങളില്‍ ചിലര്‍ അഭിപ്രായപ്പെട്ടു. അതിനാല്‍ ചോദ്യം റദ്ദാക്കരുതെന്നും ഇവര്‍ ആവശ്യപ്പെട്ടു. മുഖ്യമന്ത്രിയും മറ്റുമന്ത്രിമാരും പറയുന്നത് ഔദ്യോഗിക രേഖയായി അംഗീകരിക്കാന്‍ പി.എസ്.സിക്ക് ബാധ്യതയില്ലെന്ന് മറുഭാഗം പറഞ്ഞു. ശബരിമലയില്‍ എത്ര സ്ത്രീകള്‍ പ്രവേശിച്ചെന്ന കാര്യത്തില്‍ത്തന്നെ വിവാദമുണ്ട്. 

അത്തരം വിവാദങ്ങളില്‍ പി.എസ്.സി. ഇടപെടുന്നത് ശരിയല്ലെന്ന നിലപാടില്‍ ഭൂരിഭാഗംപേരും എത്തിയതോടെ ചോദ്യം റദ്ദാക്കി. ചോദ്യങ്ങളുടെ പിഴവുകളില്‍ പി.എസ്.സി.ക്ക് ഉത്തരവാദിത്വമില്ലെന്ന് പരീക്ഷാ കണ്‍ട്രോളര്‍ എന്‍. നാരായണശര്‍മ പത്രക്കുറിപ്പില്‍ വിശദീകരിച്ചു. ചോദ്യകര്‍ത്താവ് തയ്യാറാക്കിയ ചോദ്യങ്ങള്‍ ഉദ്യോഗാര്‍ഥികളാണ് ആദ്യം കാണുന്നത്. പിഴവുകള്‍ പരിഹരിക്കുന്നത് വിദഗ്ധസമിതിയുടെ റിപ്പോര്‍ട്ടിന്റെ അടിസ്ഥാനത്തിലാണെന്നും പരീക്ഷാ കണ്‍ട്രോളര്‍ അറിയിച്ചു.

പി.എസ്.സി. ചോദ്യം റദ്ദ് ചെയ്തതോടെ ശബരിമല വിഷയം അങ്ങനെ വീണ്ടും ചര്‍ച്ചയാകുകയാണ്. സോഷ്യല്‍ മീഡിയയും ഇത് ആഘോഷിക്കുകയാണ്.