പ്രവചനാതീതമായ പോരാട്ടത്തിന്റെ വീറും വാശിയും അതേ അളവില്‍ പ്രകടമാക്കി ലോക്സഭാ തിരഞ്ഞെടുപ്പിന്റെ പരസ്യപ്രചാരണം അവസാനിച്ചു. ഇന്ന് നിശ്ശബ്ദ പ്രചരണത്തിനു ശേഷം നാളെ വിധിയെഴുത്തിലേക്കു നീങ്ങുമ്പോള്‍ ആകാംക്ഷയുടെ മുള്‍മുനയിലാണ് രാഷ്ട്രീയകേരളം.

സംഘര്‍ഷാവസ്ഥയിലേക്കു വരെ കാര്യങ്ങളെത്തിക്കുമാറ് കൊട്ടിക്കലാശത്തില്‍ പലേടത്തും പ്രവര്‍ത്തകരുടെ അണപൊട്ടിയ ആവേശം വോട്ടിംഗില്‍ എന്തു പ്രതിഫലനമുണ്ടാക്കുമെന്നതാണ് അറിയേണ്ടത്. തീക്ഷ്ണമായ ത്രികോണപ്പോരിനു വേദിയായ തിരുവനന്തപുരം, പത്തനംതിട്ട, തൃശൂര്‍, പാലക്കാട് മണ്ഡലങ്ങളില്‍ ജയം ആര്‍ക്കെന്നതിനൊപ്പം മൂന്നാം സ്ഥാനത്തേക്ക് ആരു തള്ളപ്പെടും എന്നതും ആകാംക്ഷയുണര്‍ത്തുന്ന ചോദ്യം. 2.61 കോടി വോട്ടര്‍മാരാണ് വിധിനിര്‍ണയിക്കേണ്ടത്. വിധിയെഴുതിക്കഴിഞ്ഞാലും ഫലമറിയാന്‍ ഒരു മാസം കാത്തിരിക്കണം.

നീണ്ട 43 ദിവസത്തെ പ്രചാരണ കാലയളവില്‍ മുഖ്യ അജന്‍ഡയായി കളമടക്കി വാണത് ദേശീയ രാഷ്ട്രീയമാണെങ്കിലും കൊഴുപ്പിക്കാന്‍ ശബരിമല ഉള്‍പ്പെടെ സംസ്ഥാനത്തെ പൊള്ളിച്ച രാഷ്ട്രീയ വിവാദങ്ങളുമുണ്ടായി. എന്‍.ഡി.എയ്ക്കായി പ്രചാരണത്തിനെത്തിയ പ്രധാനമന്ത്രി നരേന്ദ്രമോദിയാണ് അത് ഊതിക്കത്തിച്ചത്. ശബരിമല വിവാദത്തിന്റെ കേന്ദ്രസ്ഥാനമായ പത്തനംതിട്ടയില്‍ ബി.ജെ.പി അദ്ധ്യക്ഷന്‍ അമിത് ഷാ ഏറ്റവുമൊടുവില്‍ നടത്തിയ റോഡ്‌ഷോ വരെ ശബരിമലയിലെ രാഷ്ട്രീയമുതലെടുപ്പ് നീണ്ടു. അമിത് ഷായുടെ റോഡ് ഷോ ബി.ജെ.പി- എന്‍.ഡി.എ അണികളിലുണ്ടാക്കിയ ആവേശം ചെറുതായിരുന്നില്ല.

ബി.ജെ.പി വര്‍ഗീയ ധ്രുവീകരണത്തിനു ശ്രമിച്ചെന്ന മുഖ്യമന്ത്രി പിണറായി വിജയന്റെ ആരോപണം ഇതിനു പിന്നാലെയെത്തി. ശബരിമലയില്‍ വിശ്വാസികള്‍ക്കൊപ്പമെന്ന് പ്രഖ്യാപിച്ചു നിന്ന യു.ഡി.എഫ്, തിരഞ്ഞെടുപ്പ് പ്രചാരണവേളയില്‍ ഇത് കാര്യമായി ഉപയോഗിച്ചില്ലെങ്കിലും ശബരിമല രാഷ്ട്രീയത്തിന്റെ ഗുണഫലം അവരും പ്രതീക്ഷിക്കുന്നു. തുടക്കത്തിലേ പ്രത്യക്ഷസമരം നയിച്ചും തിരഞ്ഞെടുപ്പില്‍ മുഖ്യ അജന്‍ഡയാക്കിയും നടത്തിയ കരുനീക്കങ്ങളിലൂടെ ബി.ജെ.പി പ്രതീക്ഷിക്കുന്നത് വലിയ നേട്ടം. എന്നാല്‍, ബി.ജെ.പി തീവ്രഹൈന്ദവവികാരം ഇളക്കിവിടുന്ന നിലയിലേക്ക് കാര്യങ്ങളെത്തിച്ചുവെന്ന തോന്നല്‍ മതന്യൂനപക്ഷങ്ങളിഷ എന്തു ചലനമുണ്ടാക്കുമെന്നതും പത്തനംതിട്ടയിലും തിരുവനന്തപുരത്തുമടക്കം കാത്തിരുന്നു കാണേണ്ടതാണ്. ശബരിമലയുടെ ഗുണഫലം ബി.ജെ.പി ഏറ്റവുമധികം പ്രതീക്ഷിക്കുന്നത് ഈ രണ്ടിടത്തുമാണ്.