കര്‍ണാടക കേവലമൊരു സംസ്ഥാനം മാത്രമാണെങ്കിലും നരേന്ദ്ര മോദിയേയും അമിത്ഷായേയും രാഹുല്‍ ഗാന്ധിയേയും സംബന്ധിച്ച് ഒരു അഭിമാന പോരാട്ടമായിരുന്നു. അന്ന് അമിത്ഷായുടെ തന്ത്രങ്ങളെ തോല്‍പ്പിച്ച് കെ.സി വേണുഗോപാലിനെ ഇറക്കി രാഹുല്‍ ഗാന്ധി ജയിച്ചു. കുമാര സ്വാമി മുഖ്യമന്ത്രിയുമായി. പല തവണ അമിത്ഷാ അവസരം കാത്തിരുന്നെങ്കിലും പൂര്‍ണതയിലെത്തിക്കാന്‍ അമിത്ഷായ്ക്കായില്ല. അവസാനം കേന്ദ്രത്തില്‍ വീണ്ടും ബിജെപി അധികാരത്തിലെത്തി. അമിത് ഷാ ആഭ്യന്തര മന്ത്രിയുമായി. ഇതിനിടെ എല്ലാം സ്വസ്ഥമാണെന്ന് കരുതിയിരുന്നപ്പോള്‍ മുഖ്യമന്ത്രി കുമാര സ്വാമി കറങ്ങാനായി അമേരിക്കയിലേക്ക് പോയത്. ഈ അവസരം അമിത് ഷാ ശരിക്കും ഉപയോഗിച്ചു. 13 ഭരണ കക്ഷി എംഎല്‍എമാരെ കൊണ്ട് രാജി വയ്പ്പിച്ചു. അവരെ സുരക്ഷിതമായി പാര്‍പ്പിക്കുകയും ചെയ്തു.


കര്‍ണാടകയില്‍ നിന്ന് മുംബൈയിലെത്തിയ പത്ത് എം.എല്‍.എമാരും മുംബൈയിലെ ഹോട്ടലിലാണ് തുടരുന്നത്. കഴിഞ്ഞദിവസം രാത്രിയോടെ മുംബൈയിലെത്തിയ എം.എല്‍.എമാര്‍ മുംബൈയിലെ സോഫിടെല്‍ ഹോട്ടലിലാണ് താമസം. അതിനിടെ അമേരിക്കന്‍ സന്ദര്‍ശനം വെട്ടിച്ചുരുക്കി മുഖ്യമന്ത്രി എച്ച്.ഡി. കുമാരസ്വാമി ഞായറാഴ്ച ബെംഗളൂരുവിലെത്തും. 

കര്‍ണാടകയിലെ 13 ഭരണകക്ഷി എം.എല്‍.എമാര്‍ അപ്രതീക്ഷിതമായി രാജിസമര്‍പ്പിച്ചതോടെയാണ് സംസ്ഥാനത്ത് വീണ്ടും രാഷ്ട്രീയപ്രതിസന്ധി ഉടലെടുത്തത്. കോണ്‍ഗ്രസ്‌ജെ.ഡി.എസ്. എം.എല്‍.എമാര്‍ കഴിഞ്ഞദിവസം സ്പീക്കറുടെ ഓഫീസിലെത്തിയാണ് രാജിസമര്‍പ്പിച്ചത്. തങ്ങളുടെ രാജിക്ക് പിന്നില്‍ ബി.ജെ.പി. അല്ലെന്ന് വിമത എം.എല്‍.എമാര്‍ വ്യക്തമാക്കിയിരുന്നെങ്കിലും ശനിയാഴ്ച വൈകീട്ട് ഇവര്‍ മുംബൈയിലേക്ക് യാത്ര ചെയ്തത് ബി.ജെ.പി. എം.പിയുടെ വിമാനത്തിലായിരുന്നുവെന്നാണ് വിവരം. 

ബി.ജെ.പിയുടെ രാജ്യസഭാംഗം രാജീവ് ചന്ദ്രശേഖറിന്റെ വിമാനത്തിലാണ് പത്ത് എം.എല്‍.എമാരും മുംബൈയിലെത്തിയതെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തിരുന്നു. എന്നാല്‍ കര്‍ണാടകയിലെ നിലവിലെ സംഭവവികാസങ്ങള്‍ക്ക് പിന്നില്‍ ബി.ജെ.പിയല്ലെന്നായിരുന്നു ബി.എസ്. യെദ്യൂരപ്പയുടെ പ്രതികരണം.

അതേസമയം രാജിവച്ച എംഎല്‍എമാരുടെ രാജിക്കത്ത് ഡി.കെ ശിവകുമാര്‍ വലിച്ചുകീറിയെന്ന ആരോപണവുമായി ബിജെപി നേതാവ് യെദ്യൂരപ്പ രംഗത്തെത്തി.

രാജി സമര്‍പ്പിക്കുന്നതിനായി സ്പീക്കറുടെ ഓഫീലെത്തിയ ചില എംഎല്‍എമാരുടെ രാജിക്കത്ത് ഡി.കെ.ശിവകുമാര്‍ വലിച്ചുകീറിയെന്നാണ് ആരോപണം. സര്‍ക്കാരിനെ സംരക്ഷിക്കുന്നതിനായി നിരവധി എംഎല്‍എമാരുടെ രാജി തടയാന്‍ ഡി.കെ. ശിവകുമാര്‍ നടത്തിയ ശ്രമങ്ങളാണ് പുതിയ പ്രശ്‌നങ്ങള്‍ക്ക് കാരണമെന്നും യദ്യൂരപ്പ പറഞ്ഞു.

എന്നാല്‍ താന്‍ രാജിക്കത്ത് വലിച്ചു കീറിയെന്ന റിപ്പോര്‍ട്ടുകളോട് കടുത്ത ഭാഷയിലാണ് ഡി.കെ.ശിവകുമാര്‍ പ്രതികരിച്ചത്. എന്ത് കൊണ്ട് എനിക്ക് അങ്ങനെ ചെയ്തുകൂടായെന്നും തന്നെ തടങ്കലിലാക്കാന്‍ ആര്‍ക്കെങ്കിലും ആഗ്രഹമുണ്ടെങ്കിലും പോയി പരാതി നല്‍കട്ടേയെന്നും ശിവകുമാര്‍ പറഞ്ഞു. ഞാന്‍ എന്തിനും തയ്യാറാണ്. ഒരു വലിയ ഉത്തരവാദിത്തം ഞാന്‍ ഏറ്റെടുത്തിട്ടുണ്ടെന്നും അദ്ദേഹം പറഞ്ഞു.

ഇതിനിടെയാണ് രാജിസമര്‍പ്പിച്ച കോണ്‍ഗ്രസ് ജെഡിഎസ് എംഎല്‍എമാര്‍ ബെംഗളൂരു എച്ച്.എ.എല്‍ വിമാനത്താവളത്തില്‍ നിന്ന് പ്രത്യേക വിമാനത്തില്‍ ഗോവ വഴി മുംബൈയിലെത്തിയത്. 10 പേരാണ് ഗോവയിലേക്ക് പോയത്. രാമലിംഗ റെഡ്ഡി, എസ്.ടി.സോമശേഖര്‍, മുനിരത്‌ന എന്നിവര്‍ ബെംഗളൂരുവില്‍ തന്നെ തങ്ങും.