ലക്ഷ്മിപ്രിയയ്ക്കും ഭര്‍ത്താവിനുമെതിരായ അന്‍സിബയുടെ പരാതിയില്‍ വാദം കേള്‍ക്കുന്നത് മാറ്റിവച്ചു
നടി അന്‍സിബ ഹസന്‍ നടി ലക്ഷ്മിപ്രിയ, ഭര്‍ത്താവ് ജയേഷ്, തൃപ്പൂണിത്തുറ വനിതാ സെല്‍ എസ്‌ഐ രേഷ്മ എന്നിവര്‍ക്കെതിരെ നല്‍കിയ പരാതിയില്‍ കോടതി വാദം കേള്‍ക്കുന്നത് മാറ്റിവച്ചു. ഇന്ന് കോടതി കേസ് പരിഗണിച്ചെങ്കിലും പ്രോസിക്യൂട്ടര്‍ അവധിയെടുത്തതിനെത്തുടര്‍ന്ന് തൃപ്പൂണിത്തുറ ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി കേസ് ഈ മാസം 27ലേക്ക് മാറ്റുകയായിരുന്നുവെന്ന് അന്‍സിബയുടെ അഭിഭാഷകന്‍ അഡ്വ. ഫിര്‍ദോസ് പറഞ്ഞു.
അതേസമയം, സംഭവത്തില്‍ കോടതി ആവശ്യപ്പെട്ടിരുന്ന അന്വേഷണ റിപ്പോര്‍ട്ട് പൊലീസ് ഇന്ന് കോടതിയില്‍ ഹാജരാക്കി. എന്നാല്‍ ഈ റിപ്പോര്‍ട്ടിന്റെ കോപ്പി ആവശ്യപ്പെട്ടിട്ടും നല്‍കാന്‍ പൊലീസ് തയ്യാറായില്ലെന്ന് അഡ്വ. ഫിര്‍ദോസ് പറഞ്ഞു. പൊലീസ് റിപ്പോര്‍ട്ടിന്റെ പകര്‍പ്പ് നല്‍കാത്തതിനെതിരെ കോടതിയില്‍ പരാതിപ്പെടുമെന്ന് വ്യക്തമാക്കിയതോടെയാണ് ഉദ്യോഗസ്ഥര്‍ നിലപാട് മാറ്റിയത്. തുടര്‍ന്ന് റിപ്പോര്‍ട്ടിന്റെ കോപ്പി വാട്‌സാപ്പില്‍ പിന്നീട് അയച്ചു തരികയായിരുന്നുവെന്നും അഭിഭാഷകന്‍ കൂട്ടിച്ചേര്‍ത്തു.
തന്നെ പൊലീസ് സ്‌റ്റേഷനില്‍ നിയമവിരുദ്ധമായി തടഞ്ഞുവെച്ചതുമായി ബന്ധപ്പെട്ട് മുന്‍പ് ഹില്‍ പാലസ് എസ്.എച്ച്.ഓയ്ക്ക് അന്‍സിബ പരാതി നല്‍കിയിരുന്നെങ്കിലും പൊലീസ് എഫ്.ഐ.ആര്‍ റജിസ്റ്റര്‍ ചെയ്യാന്‍ തയ്യാറായിരുന്നില്ല.
പരാതിയില്‍ കഴമ്പില്ലെന്ന് കാണിച്ച് പൊലീസ് തള്ളിയതോടെയാണ് അന്‍സിബ കോടതിയെ സമീപിച്ചത്. കേസില്‍ എഫ്.ഐ.ആര്‍ രജിസ്റ്റര്‍ ചെയ്യാന്‍ ഉത്തരവിടാന്‍ മജിസ്‌ട്രേറ്റിന് അധികാരമുണ്ടെന്ന് ചൂണ്ടിക്കാട്ടിയാണ് അന്‍സിബയുടെ നിയമപോരാട്ടം.
https://www.facebook.com/Malayalivartha
