വേലിയില്‍ ഇരുന്ന പാമ്പിനെ എടുത്ത് വേണ്ടാത്തിടത്ത് വച്ച അവസ്ഥ പോലെയായി അബ്ദുള്ള കുട്ടിയെ ബിജെപിയില്‍ എടുത്തതിനെ സംസ്ഥാന ബിജെപിക്കാര്‍ കാണുന്നത്. ബിജെപി ജയിക്കാന്‍ ഏറെ സാധ്യതയുള്ള മഞ്ചേശ്വരം കണ്ണും നട്ടാണ് അബ്ദുള്ളക്കുട്ടി വരുന്നതെന്നാണ് ബിജെപിക്കാര്‍ തന്നെ പറയുന്നത്. അതേ സമയം തന്നെ അബ്ദുള്ളക്കുട്ടിയുടെ മഞ്ചേശ്വരത്തെ സ്ഥാനാര്‍ത്ഥിത്വത്തിന് എതിര്‍പ്പ് അറിയിച്ച് പാര്‍ട്ടി പ്രാദേശിക ഘടകം രംഗത്തുവന്നു. മഞ്ചേശ്വരം ഉപതിരഞ്ഞെടുപ്പില്‍ എന്‍.ഡി.എ സ്ഥാനാര്‍ത്ഥി ആരാകണമെന്നത് സംബന്ധിച്ച് തീരുമാനം ഒന്നും ആയില്ലെങ്കിലും തങ്ങളുടെ നിലപാട് വ്യക്തമാക്കുകയാണ് ബി.ജെ.പി മഞ്ചേശ്വരം മണ്ഡലം പ്രസിഡന്റ് സതീഷ് ചന്ദ്ര ഭണ്ഡാരി.

മഞ്ചേശ്വരം കന്നഡിഗരുടെ നാട്, കന്നട നാട്ടില്‍ ഇവിടത്തുകാര്‍ തന്നെ മത്സരിക്കും, ഇനി പുറത്തുനിന്ന് ആരെങ്കിലും വരുന്നെങ്കില്‍ അത് കെ. സുരേന്ദ്രന്‍ തന്നെയായിരിക്കും. ബി.ജെ.പിയില്‍ ചേര്‍ന്ന അബ്ദുള്ളക്കുട്ടി മഞ്ചേശ്വരം ഉപതിരഞ്ഞെടുപ്പില്‍ സ്ഥാനാര്‍ത്ഥിയാകും എന്ന പ്രചാരണം അദ്ദേഹം തള്ളുകയും ചെയ്തു. 'അബ്ദുള്ളക്കുട്ടി കണ്ണൂരില്‍ പോയി മത്സരിക്കട്ടെ, അദ്ദേഹത്തിന്റെ നാട് അതല്ലേ. മഞ്ചേശ്വരത്ത് വന്ന് സ്ഥാനാര്‍ത്ഥിയായതുകൊണ്ട് പാര്‍ട്ടിക്ക് എന്തെങ്കിലും കൂടുതല്‍ നേട്ടമുണ്ടാകുമെന്ന പ്രതീക്ഷ ഞങ്ങള്‍ക്കില്ല. അബ്ദുള്ളക്കുട്ടി മത്സരിച്ചതുകൊണ്ട് മുസ്‌ലിം വിഭാഗത്തിന്റെ നൂറുവോട്ട് അധികം ബി.ജെ.പിക്ക് കിട്ടാന്‍ പോകുന്നില്ല'.അതേസമയം മഞ്ചേശ്വരം മണ്ഡലത്തിലെ മുസ്‌ലിം വിഭാഗത്തിലെ നേതാവാണ് മത്സരിക്കുന്നതെങ്കില്‍ പാര്‍ട്ടിക്ക് അത് ഗുണം ചെയ്‌തേനെയെന്നും അദ്ദേഹം പറഞ്ഞു. 

അബ്ദുള്ളക്കുട്ടി സ്ഥാനാര്‍ത്ഥിയാകും എന്ന് ഞങ്ങളാരും പറഞ്ഞിട്ടില്ല. അതെല്ലാം മാദ്ധ്യമങ്ങളുടെ സൃഷ്ടിയല്ലേ. മഞ്ചേശ്വരത്ത് അബ്ദുള്ളക്കുട്ടി ബി.ജെ.പിക്കുവേണ്ടി പ്രചാരണം നടത്താനുണ്ടാകുമെന്നും സതീഷ്ചന്ദ്ര ഭണ്ഡാരി പറഞ്ഞു.കേന്ദ്ര നേതൃത്വം തീരുമാനിക്കുംമഞ്ചേശ്വരത്ത് ഇനി മത്സരിക്കാന്‍ ഇല്ലെന്ന് സുരേന്ദ്രന്‍ തന്നെ നേരത്തെ വ്യക്തമാക്കിയതല്ലേ. ഇപ്പോള്‍ അതൊന്നും പറയാറായിട്ടില്ല. സ്ഥാനാര്‍ത്ഥി ആരാണെന്ന് തീരുമാനിക്കുന്നത് പാര്‍ട്ടിയുടെ കേന്ദ്ര നേതൃത്വമാണെന്നും സതീഷ്ചന്ദ്ര ഭണ്ഡാരി പറഞ്ഞു. 

ബി.ജെ.പി നേതൃത്വം മണ്ഡലത്തിന് പുറത്തുനിന്ന് ഒരാളെ മത്സരിപ്പിക്കണമെന്ന് തീരുമാനിച്ചാല്‍ അത് കെ. സുരേന്ദ്രന്‍ തന്നെയായിരിക്കും. ഇന്നത്തെ സാഹചര്യത്തില്‍ മറ്റൊരാളെ പാര്‍ട്ടി പരിഗണിക്കാനിടയില്ല. രവീശ തന്ത്രിക്ക് ഒരവസരം കൂടി നല്‍കുമോയെന്നും പറയാനാവില്ല. അദ്ദേഹം ഭാഷാ ന്യൂനപക്ഷ വിഭാഗത്തിന്റെ പ്രതിനിധി കൂടിയാണ്. മഞ്ചേശ്വരം മണ്ഡലത്തില്‍ മത്സരിച്ചാല്‍ ജയിക്കാനുള്ള എല്ലാ പിന്തുണയും ജനങ്ങള്‍ നല്‍കുകയും ചെയ്യും. രവീശ തന്ത്രി മണ്ഡലത്തില്‍ ക്യാമ്പ് ചെയ്ത് പാര്‍ട്ടിയുടെ പ്രവര്‍ത്തനത്തിന്റെ ചുക്കാന്‍ പിടിക്കുകയാണ്. മഞ്ചേശ്വരം മണ്ഡലം പ്രഭാരിയായി അദ്ദേഹത്തെ പാര്‍ട്ടി നിയോഗിച്ചതാണ്. സംസ്ഥാന കമ്മിറ്റി അംഗമാണ് തന്ത്രി. ബൂത്തുകമ്മിറ്റികള്‍ ഒരുക്കി മണ്ഡലം പിടിക്കാനുള്ള പ്രവര്‍ത്തനമാണ് ഇപ്പോള്‍ പാര്‍ട്ടി നടത്തുന്നത്. 

ലോക്‌സഭാ തിരഞ്ഞെടുപ്പില്‍ യു.ഡി.എഫിന് നേട്ടമുണ്ടാക്കാനായെങ്കിലും മണ്ഡലം ബി.ജെ.പിയെ കൈവിട്ടുവെന്ന് അര്‍ത്ഥമില്ല. നിയമസഭാ ഉപതിരഞ്ഞെടുപ്പില്‍ അതെല്ലാം മാറിമറിയും. യു.ഡി.എഫിന് ലഭിച്ച 5000 ത്തോളം വോട്ടുകള്‍ എന്‍.ഡി.എയ്ക്ക് ലഭിക്കും. സി.പി.എം തോല്‍ക്കണം എന്നുകരുതി രാജ്‌മോഹന്‍ ഉണ്ണിത്താന് വോട്ട് ചെയ്തവരും കേന്ദ്രത്തില്‍ രാഹുല്‍ വരുമെന്ന് കരുതി വോട്ട് നല്‍കിയവരും ഉപതിരഞ്ഞെടുപ്പില്‍ മറിച്ചുകുത്തും. യു.ഡി.എഫിന്റെ 11,000 വോട്ട് ഭൂരിപക്ഷം ബി.ജെ.പി അട്ടിമറിക്കുമെന്നും സതീഷ് ചന്ദ്ര ഭണ്ഡാരി പറഞ്ഞു.