ഇന്ത്യ ശ്രീലങ്ക മത്സരത്തില്‍ ഇന്ത്യ ജയിച്ച് കയറിയതിന് പിന്നാലെ മറ്റൊരു വാര്‍ത്തയാണ് ക്രിക്കറ്റ് ലോകം ചര്‍ച്ച ചെയ്യുന്നത്. ഇന്ത്യാ ശ്രീലങ്ക മത്സരത്തിനിടെ സ്‌റ്റേഡിയത്തിനു മുകളിലൂടെ ഇന്ത്യാ വിരുദ്ധ പോസ്റ്ററുകള്‍ ഉയര്‍ത്തി വിമാനം പറന്നതാണ് കാര്യങ്ങള്‍ മാറി മറിഞ്ഞത്. ഇതില്‍ ആശങ്കയുയര്‍ത്തി ബിസിസിഐ രംഗത്തെത്തി. മത്സരത്തിനിടെ ഇന്ത്യാ വിരുദ്ധ ബാനറുകള്‍ ഉയര്‍ത്തി വിമാനം പറന്നത് അസ്വീകാര്യമാണെന്ന് ചുണ്ടിക്കാട്ടി ഇന്ത്യന്‍ താരങ്ങളുടെ സുരക്ഷയില്‍ ആശങ്കയറിയിച്ച് ബിസിസിഐ ഐസിസിക്ക് പരാതി നല്‍കി.

ലീഡ്‌സില്‍ ശനിയാഴ്ച നടന്ന ഇന്ത്യശ്രീലങ്ക മത്സരം തുടങ്ങി നിമിഷങ്ങള്‍ക്കമാണ് 'കശ്മീരിന് നീതി ലഭ്യമാകണം' എന്ന ബാനര്‍ ഉയര്‍ത്തി ആദ്യ വിമാനം സ്‌റ്റേഡിയത്തിനു മുകളിലുടെ പറന്നത്. തുടര്‍ന്ന് അരമണിക്കൂറിനശേഷം സമാനമായ വിമാനം സ്‌റ്റേഡിയത്തിനു മുകളിലൂടെ വീണ്ടും പറന്നു.. രണ്ടാം തവണ വ്യത്യസ്ത ബാനര്‍ ഉയര്‍ത്തിയാണ് വിമാനം പറന്നത്. 'ഇന്ത്യ കൂട്ടക്കുരുതി അവസാനിപ്പിക്കുക, കശ്മീരിനെ സ്വതന്ത്രമാക്കുക' എന്ന ബാനര്‍ ഉയര്‍ത്തിയാണ് രണ്ടാം തവണ വിമാനം വട്ടമിട്ടത്. പിന്നാലെ ഇന്ത്യ വിജയലക്ഷ്യം പിന്തുടരുന്നതിനിടെയാണ് മൂന്നാമത് വിമാനം സ്‌റ്റേഡിയത്തിനു മുകളില്‍ വട്ടമിട്ട് പറന്നത്. 'കൂട്ടക്കുരുതി അവസാനിപ്പിക്കാന്‍ സഹായിക്കുക' എന്നതായിരുന്നു ബാനറില്‍ ഉയര്‍ത്തിയത്.

ഇത് തികച്ചും അസ്വീകാര്യമാണ്. ഇതുസംബന്ധിച്ച് ഐസിസിക്ക് കത്തെഴുതിയതായും ബിസിസിഐ വ്യക്തമാക്കി. ഇതേ സംഭവം സെമി ഫൈനലിലും ആവര്‍ത്തിച്ചെങ്കിലോ? അത് ദൗര്‍ഭാഗ്യകരമാണ്. ഇന്ത്യന്‍ താരങ്ങളുടെ സുരക്ഷ എന്നതാണ് അതിപ്രധാനമെന്നും ബിസിസിഐ കൂട്ടിച്ചേര്‍ത്തു. നേരത്തെ പാക്കിസ്ഥാന്‍അഫ്ഗാനിസ്ഥാന്‍ മത്സരത്തിനിടെയിലും സമാന സംഭവമുണ്ടായിരുന്നു.

സംഭവം നടന്നതിനു പിന്നാലെ ഐസിസി അതൃപ്തി രേഖപ്പെടുത്തി പത്രക്കുറിപ്പ് ഇറക്കിയിരുന്നു. ഇത്തരം കാര്യങ്ങളെ പിന്തുണയ്ക്കുന്നില്ലെന്നും, തടയുന്നതിനായി പോലീസുമായി ബന്ധപ്പെട്ടിട്ടുണ്ടെന്നും പത്രക്കുറിപ്പില്‍ ഐസിസി വ്യക്തമാക്കിയിരുന്നു. 

അതേസമയം അവസാന ഗ്രൂപ്പ് മത്സരത്തില്‍ ശ്രീലങ്കയെ കശക്കിയ ഇന്ത്യ ലോകകപ്പ് ക്രിക്കറ്റിന്റെ പോയന്റ് പട്ടികയില്‍ ഒന്നാം സ്ഥാനത്തെത്തി. ഒന്നാം സ്ഥാനത്തോടെ ആദ്യം സെമി ഫൈനലില്‍ ഇടം പിടിച്ച നിലവിലെ ചാമ്പ്യന്മാരായ ഓസ്‌ട്രേലിയ അവസാന മത്സരത്തില്‍ ദക്ഷിണാഫ്രിക്കയോട് തോറ്റു. ഇതോടെ ഇന്ത്യ ആതിഥേയരായ ഇംഗ്ലണ്ടുമായി സെമി ഫൈനല്‍ ഒഴിവാക്കി. ഗ്രൂപ്പ് ഘട്ടത്തില്‍ ഇന്ത്യയുടെ ഏക തോല്‍വി ഇംഗ്ലണ്ടിനോടായിരുന്നു. ഇന്ത്യയും ന്യൂസിലാന്റും തമ്മിലാണ് സെമി. 

ഇന്ത്യന്യൂസിലാന്റ് ഗ്രൂപ്പ് മത്സരം മഴ കാരണം ഉപേക്ഷിക്കുകയായിരുന്നു.
ഓസ്‌ട്രേലിയ ഇംഗ്ലണ്ടുമായാണ് സെമി ഫൈനല്‍ കളിക്കുക. ഗ്രൂപ്പ് ഘട്ടത്തില്‍ ഇംഗ്ലണ്ടിനെ ഓസ്‌ട്രേലിയ തോല്‍പിച്ചിരുന്നു. 
ഗ്രൂപ്പ് ഘട്ടത്തിലെ ഒമ്പത് മത്സരങ്ങളില്‍ ഒരെണ്ണം മാത്രം തോറ്റ ഇന്ത്യക്ക് 15 പോയന്റാണ്. രണ്ടു കളി തോറ്റ ഓസ്‌ട്രേലിയക്ക് 14 പോയന്റും. ഇംഗ്ലണ്ടിന് പന്ത്രണ്ടും ന്യൂസിലാന്റിന് 11 പോയന്റുമാണ്. പാക്കിസ്ഥാനും 11 പോയന്റുണ്ടെങ്കിലും റണ്‍റെയ്റ്റ് കുറഞ്ഞതിനാല്‍ പുറത്തായി. 
ഇന്ത്യന്യൂസിലാന്റ് സെമി ഫൈനല്‍ ചൊവ്വാഴ്ചയാണ്. ഓസ്‌ട്രേലിയ ഇംഗ്ലണ്ട് സെമി വ്യാഴാഴ്ചയും. ഞായറാഴ്ചയാണ് ഫൈനല്‍. ആ ഫൈനലിനായി കാത്തിരിക്കുകയാണ് എല്ലാവരും.