ദുരിതാശ്വാസ ക്യാമ്പില് പണപ്പിരിവ് നടത്തിയ സി.പി.എം പ്രാദേശികനേതാവിനെ ന്യായീകരിച്ച് ഉന്നത സിവില് സര്വ്വീസ് ഉദ്യോഗസ്ഥന് മംഗളപത്രം എഴുതിയത് ആരുടെ താല്പ്പര്യം സംരക്ഷിക്കാനാണെന്ന് കോണ്ഗ്രസ്
ദുരിതാശ്വാസ ക്യാമ്പില് പണപ്പിരിവ് നടത്തിയ സി.പി.എം പ്രാദേശികനേതാവിനെ ന്യായീകരിച്ച റവന്യൂ സെക്രട്ടറിക്കെതിരെ കെ.പി.സി.സി. പണപ്പിരിവിനെ ന്യായീകരിച്ച് കൊണ്ട് ഒരു ഉന്നത സിവില് സര്വ്വീസ് ഉദ്യോഗസ്ഥന് മംഗളപത്രം എഴുതിയത് ആരുടെ താല്പ്പര്യം സംരക്ഷിക്കാനാണെന്ന് കെ.പി.സി.സി വാര്ത്താ കുറിപ്പില് ചോദിച്ചു. സി.പി.എം നേതൃത്വത്തെ ന്യായീകരിക്കേണ്ട ഉത്തരവാദി ത്തമാണോ, അതല്ല ജനക്ഷേമത്തിന് വേണ്ടി തന്റെ ഭരണ ഘടനാപരമായ ദൗത്യം നിര്വ്വഹിക്കലാണോ തന്റെ കടമയെന്ന് ഈ ഉദ്യോഗസ്ഥന് വിശദീകരിക്കണം. മാറി മാറി വരുന്ന ഭരണാധികാരികളുടെ താളത്തിന് അനുസരിച്ച് ചുവട് വയ്ക്കുന്ന കോമാളികളായി ഉദ്യോഗസ്ഥ മേധാവികള് ചുരുങ്ങുന്നത് പ്രകൃതി ദുരന്തത്തേക്കാള് വലിയ ധാര്മിക ദുരന്തമാണെന്നും വാര്ത്താ കുറിപ്പില് പറയുന്നു.
പ്രളയവുമായി ബന്ധപ്പെട്ട് വ്യാപകമായി അനധികൃത ബക്കറ്റ് പിരിവ് നടക്കുന്നുവെന്ന ആക്ഷേപം ഉയരുന്നത് കേരളീയ സമൂഹത്തിന് ആകെ കളങ്കം ചാര്ത്തുന്നതാണ്. സി.പി.എം. നടത്തുന്ന ഇത്തരം പിരിവുകള്ക്ക് വ്യക്തമായ കണക്കോ രേഖകളോ ഇല്ല. ആലപ്പുഴ ജില്ലയില് ചേര്ത്തല അംബേദ്കര് കമ്മ്യൂണിറ്റി ഹാളിലെ ദുരിതാശ്വാസ ക്യാമ്പില് സി.പി.എമ്മിന്റെ പ്രാദേശിക നേതാവ് പട്ടിണി പാവങ്ങളായ അന്തേവാസികളില് നിന്നും പണപിരിവ് നടത്തുന്നതിന്റെ തെളിവ് സഹിതമുള്ള ദൃശ്യങ്ങള് പുറത്ത് വന്നത് പൊതുപ്രവര്ത്തകര്ക്കാകെ നാണക്കേടാണ്.
രക്ഷാപ്രവര്ത്തനങ്ങളിലും പുനരധിവാസ പ്രവര്ത്തനങ്ങളിലും എങ്ങനെ പ്രവര്ത്തിക്കണമെന്ന ഉജ്ജ്വല മാതൃക കോണ്ഗ്രസും പോഷകസംഘടനകളും സംസ്ഥാനത്ത് എല്ലായിടത്തും കാണിച്ചിട്ടുണ്ട്. സത്യസന്ധവും ആത്മാര്ത്ഥവുമായി പ്രതിബദ്ധത യോടെ ദുരിതാശ്വാസ പ്രവര്ത്തനങ്ങളില് ഏര്പ്പെട്ടുകൊണ്ടിരിക്കുന്ന എല്ലാ കോണ്ഗ്രസ് പ്രവര്ത്തകരേയും അനുമോദിക്കുന്നു. അനധികൃത പിരിവ് നടത്താതെ ദുരിതബാധിതര്ക്കായി സാധന സാമഗ്രികള് ശേഖരിക്കുന്നതിന് കോണ്ഗ്രസ് പ്രവര്ത്തകരുടെ മാതൃക അനുകരണീയമാണ്. പാര്ട്ടിയുടെ അറിവും സമ്മതവുമില്ലാതെ ദുരിതാശ്വാസ പ്രവര്ത്തനങ്ങളുമായി ബന്ധപ്പെട്ട് ഒരു തരത്തിലുമുള്ള പണപ്പിരിവും നടത്താന് പാടില്ലെന്ന് ഒരിക്കല് കൂടി കെ.പി.സി.സി മുന്നറിയിപ്പ് നല്കുന്നു.
കഴിഞ്ഞ പ്രളയകാലത്ത് ഇന്ത്യക്ക് അകത്തും പുറത്തും നിന്നും പ്രവാസികള് അടക്കമുള്ള പൗരന്മാരില് നിന്നും വിദേശ ഏജന്സികളില് നിന്നും സ്വീകരിച്ച പണത്തിന്റെ കണക്ക് പോലും അവതരിപ്പിക്കാന് കഴിയാത്ത സംസ്ഥാന ഭരണകൂടവും സി.പി.എം. നേതൃത്വവും പ്രതിക്കൂട്ടിലാണെന്ന കാര്യം കോണ്ഗ്രസ് പ്രവര്ത്തകര് വിസ്മരിക്കരുതെന്നും പറയുന്നു. ഐജി ഓഫിസ് മാര്ച്ചിനിടെ മൂവാറ്റുപുഴ എം.എല്.എ ഉള്പ്പടെയുള്ള നേതാക്കള്ക്കെതിരെ പോലീസ് നടത്തിയ മര്ദ്ദന മുറയെ ന്യായീകരിക്കുകയും ആരോപണ വിധേയരായ പോലീസുകാര്ക്കെതിരെ നടപടിയെടുക്കാതെ വെള്ളപൂശുകയും ചെയ്ത ഡി.ജി.പിയുടെ നടപടിയെ സി.പി.ഐ. എങ്ങനെ നോക്കി കാണുന്നുവെന്ന് പ്രസിഡന്റ് മുല്ലപ്പള്ളി ചോദിച്ചു.
https://www.facebook.com/Malayalivartha
