പ്രളയം: റവന്യൂവകുപ്പ് വിജ്ഞാപനം പുറപ്പെടുവിക്കുന്ന മുറയ്ക്ക് ആശ്വാസ നടപടികള് ഉണ്ടാകുമെന്ന് ബാങ്കുകള്
പ്രളയബാധിത വില്ലേജുകള് ഏതൊക്കെയെന്ന് അടയളപ്പെടുത്തി റവന്യൂവകുപ്പ് വിജ്ഞാപനം പുറപ്പെടുവിച്ചാല് ആ മേഖലകളില് ബാങ്കുകളുടെ ആശ്വാസനടപടികളുണ്ടാകുമെന്ന് സംസ്ഥാന തല ബാങ്കേഴ്സ് സമിതി. റവന്യൂവകുപ്പ് വിജ്ഞാപനം പുറപ്പെടുവിക്കുന്ന മുറക്ക് പ്രത്യേക ബാങ്കേഴ്സ് സമിതി യോഗം (എസ്.എല്.ബി.സി) ചേര്ന്ന് തീരുമാനമെടുക്കുമെന്ന് ചെയര്മാന് ആര്.എ ശങ്കരനാരായണന്, കണ്വീനര് ജി.കെ മായ എന്നിവര് വാര്ത്താസമ്മേളനത്തില് അറിയിച്ചു.
കഴിഞ്ഞ തവണ 1259 വില്ലേജുകളെയാണ് പ്രളയബാധിത വില്ലേജുകളായി റവന്യൂവകുപ്പ് വിജ്ഞാപനം ചെയ്തത്. പ്രളയത്തെ തുടര്ന്ന് ഏര്പ്പെടുത്തിയ മൊറേട്ടാറിയത്തിന്റെ കാലയളവില് വീണ്ടും പ്രളയമുണ്ടാകുന്നതും വായ്പ പുനക്രമീകരിക്കേണ്ട സാഹചര്യമുണ്ടാകുന്നതും പുതിയ അനുഭവമാണ്. രണ്ടാമതും പ്രളയമുണ്ടായ സാഹചര്യത്തില് കാര്ഷിക വായ്പകള്ക്ക് ഒരു വര്ഷം കൂടി മൊറട്ടോറിയം നീട്ടുന്നതിന് റിസര്വ്വ് ബാങ്ക് അനുമതി വേണം. പ്രളയമുണ്ടായതിനാല് വായ്പ പുനക്രമീകരണത്തിനും ആനുകൂല്യത്തിനും അവസരം ഉണ്ടാകണം. പക്ഷേ ഇക്കാര്യത്തില് കൂട്ടായ കൂടിയാലോചനകള്ക്ക് ശേഷമേ തീരുമാനമെടുക്കാനാകുവെന്ന് എസ്.എല്.ബി.സി ചെയര്മാന് പറഞ്ഞു.
സ്വര്ണ്ണപണയ വായ്പക്ക് ബാങ്കുകള് ഇതുവരെ നിയന്ത്രണം ഏര്പ്പെടുത്തിയിട്ടില്ല. സ്വര്ണ്ണത്തിന്മേലുള്ള കാര്ഷിക വായ്പക്ക് കിസാന് ക്രഡിറ്റ് കാര്ഡും നിര്ബന്ധമാക്കിയിട്ടില്ല. സ്വര്ണപണയ വായ്പ അവസാനിപ്പിക്കുന്നത് സംബന്ധിച്ച് കേന്ദ്രത്തില് നിന്ന് രേഖാമൂലമുള്ള നിര്ദേശമൊന്നും ലഭിച്ചിട്ടില്ല. നാല് ശതമാനം പലിശ നിരക്കില് വായ്പ തുടരും. വായ്പാ മാനദണ്ഡങ്ങള് പാലിക്കുന്നവര്ക്ക് മൂന്ന് മൂന്ന് ലക്ഷം രൂപ വരെ വായ്പ ലഭിക്കുന്നതിന് തടസങ്ങളില്ല. ബാങ്കും ഇടപാടുകാരും തമ്മിലുള്ള വിശ്വാസത്തിന്റെ അടിസ്ഥാനത്തിലാണ് വായ്പ അനുവദിക്കുന്നത്. സംസ്ഥാനത്ത് 17 ലക്ഷം മുദ്രാ ബാങ്ക് അക്കൗണ്ടുകളാണുള്ളത്. 10428 കോടി രൂപയാണ് ഇതുവരെ മുദ്രവായ്പയായി നല്കിയിട്ടുള്ളതെന്നും ഇരുവരും പറഞ്ഞു. കാനറ ബാങ്ക് എക്സിക്യൂട്ടീവ് ഡയറക്ടര് എ.മണിമേഖലയും വാര്ത്താസമ്മേളനത്തില് പങ്കെടുത്തു.
https://www.facebook.com/Malayalivartha
