ഇബ്രാഹിം കുഞ്ഞിനെ അറസ്റ്റ് ചെയ്യാന്‍ സര്‍ക്കാര്‍ തയ്യാറെടുക്കുമ്പോള്‍ യു ഡി എഫിലെ ഉമ്മന്‍ ചാണ്ടി പക്ഷത്തില്‍ അമര്‍ഷം പുകയുന്നു. രമേശ് ചെന്നിത്തല ഒഴികെയുള്ള യു ഡി എഫ് നേതാക്കള്‍ ഇബ്രാഹിം കുഞ്ഞിനെതിരായ നടപടിയില്‍ അമര്‍ഷം കൊള്ളുന്നു. ഇബ്രാഹിം കുഞ്ഞിനെതിരെ നടപടിയെടുക്കുകയാണെങ്കില്‍ ഒറ്റക്കെട്ടായി പ്രതിരോധിക്കണമെന്നാണ് യുഡിഎഫിലെ പൊതു വികാരം.

ഇബ്രാഹിം കുഞ്ഞിന്റെ അറസ്റ്റ് വാര്‍ത്ത കോണ്‍ഗ്രസിലെ ഗ്രൂപ്പ് വഴക്ക് മറ നീക്കി പുറത്തു വന്നു. മുല്ലപ്പള്ളിയും സുധീരനും ഇക്കാര്യത്തില്‍ ഒന്നും മിണ്ടിയിട്ടില്ല. കേരളത്തിലുള്ള ആന്റണിയും പ്രതികരിച്ചിട്ടില്ല.

കേസിലെ പ്രതി പറയുന്നത് കേട്ട് നടപടിയെടുക്കാന്‍ തുടങ്ങിയാല്‍ എന്തു ചെയ്യും എന്നാണ് പി കെ കുഞ്ഞാലിക്കുട്ടി അടക്കമുള്ളവര്‍ ചോദിക്കുന്നത്. അതേസമയം ചെന്നിത്തല സമര്‍ത്ഥമായി കരുനീക്കങ്ങള്‍ നടത്തുന്നുണ്ട്. പാലം നിര്‍മ്മാണത്തില്‍ അഴിമതി ഉണ്ടെങ്കില്‍ കണ്ടുപിടിക്ക് എന്നാണ് ചെന്നിത്തലയുടെ സര്‍ക്കാരിനോടുള്ള വെല്ലുവിളി. കിഫ്ബി, കിയാല്‍ ഓഡിറ്റില്‍ ചെന്നിത്തല സര്‍ക്കാരിനെതിരെ നീക്കം കര്‍ശനമാക്കിയതോടെയാണ് പിണറായി സര്‍ക്കാര്‍ കഴിഞ്ഞ സര്‍ക്കാരിന്റെ കാലത്തെ അഴിമതി കേസുകളില്‍ പിടിമുറുക്കിയത്. രാഷ്ട്രീയക്കാരാകുമ്പോള്‍ സഹവര്‍ത്തിത്തത്തോടെ പോകണമെന്ന അലിഖിത നിയമമാണ് മുന്‍മന്ത്രിക്കെതിരായ നടപടിയിലൂടെ തകര്‍ന്നത്. ഉപതെരഞ്ഞടുപ്പിന് മുമ്പ് അറസ്റ്റ് ചെയ്യാനുള്ള നീക്കമാണ് നടക്കുന്നതെന്നും ഇതിന് ജനം മറുപടി നല്‍കുമെന്നും ചെന്നിത്തല പറഞ്ഞു.

എന്നാല്‍ മുന്‍മന്ത്രിക്കെതിരെ ആവശ്യമായ തെളിവില്ലെന്നാണ് ലീഗിന്റെ വിലയിരുത്തല്‍. ഒരിക്കലും അറസ്റ്റ് ഉണ്ടാകില്ലെന്ന് ലീഗ് നേതാക്കള്‍ കരുതുന്നു. അറസ്റ്റിന് പിന്‍ബലം നല്‍കുന്ന രേഖകള്‍ ലഭ്യമല്ലെന്ന് വിജിലന്‍സില്‍ നിന്നുതന്നെ ലീഗിന് സൂചന ലഭിച്ചിട്ടുണ്ട്. എന്നാല്‍ രാഷ്ട്രീയ പ്രേരിതമായി അറസ്റ്റ് നടക്കാനുള്ള സാധ്യത ലീഗ് തള്ളുന്നില്ല.

അതേസമയം അറസ്റ്റ് ഉണ്ടാകുമെന്ന് തന്നെയാണ് വിജീലന്‍സ് തലത്തില്‍ നിന്നും ലഭ്യമാകുന്ന വിവരം. വിജിലന്‍സ് ആ സ്ഥാനത്ത് അന്വേഷണ ഉദ്യോഗസ്ഥര്‍ യോഗം ചേര്‍ന്നിരുന്നു വിജീലന്‍സ് മേധാവി, ഐ.ജി എന്നിവരുമായി അവര്‍ ചര്‍ച്ച നടത്തി. പ്രോസിക്യൂഷന്‍ മേധാവിയുടെ അഭിപ്രായവും തേടിയിരുന്നു. ചോദ്യം ചെയ്യാന്‍ ഇബ്രാഹിം കുഞ്ഞിന് നോട്ടീസ് നല്‍കും. തുടര്‍ന്ന് അറസ്റ്റ് ഉണ്ടാകും. അദ്ദേഹം ഹാജരായില്ലെങ്കില്‍ മേല്‍ നടപടികള്‍ സ്വീകരിക്കും. ഇബ്രാഹിം കുഞ്ഞ് എവിടെയാണെന്ന് അറിയില്ല. ലീഗ് നേതൃത്വം ഇത് നിഷേധിക്കുന്നു.

മുന്‍മന്ത്രിക്കെതിരെ നടപടി ഉണ്ടായാല്‍ നാളെ തങ്ങളിലേക്ക് മറ്റ് അന്വേഷണങ്ങള്‍ നീങ്ങുമെന്ന് ഉമ്മന്‍ ചാണ്ടിയും മറ്റ് കോണ്‍ഗ്രസ് നേതാക്കളും വിശ്വസിക്കുന്നു. പാലാരിവട്ടം കേസില്‍ ഫയല്‍ അന്നത്തെ മുഖ്യമന്ത്രി കണ്ടോ എന്ന് വ്യക്തമല്ല. ഏതായാലും ഇബ്രാഹിം കുഞ്ഞിനെ ഇല്ലാതാക്കാനുള്ള നീക്കം അനുവദിക്കരുതെന്നാണ് ചാണ്ടി പക്ഷത്തെ കോണ്‍ഗ്രസ് നേതാക്കള്‍ പറയുന്നത്. ചെന്നിത്തലയും മുല്ലപ്പള്ളിയും ഇക്കാര്യത്തില്‍ സ്വീകരിക്കുന്നത് നിഷ്പക്ഷ നിലപാടാണ്. അഴിമതിയുമായി സഖ്യം ചേരാന്‍ അവര്‍ തയ്യാറല്ല. മാത്രവുമല്ല ലീഗ് നേതൃത്വം ഉമ്മന്‍ ചാണ്ടിയുമായി അടുപ്പം പുലര്‍ത്തുന്നവരാണ്. അതു കൊണ്ടു തന്നെ ഉമ്മന്‍ ചാണ്ടി ഗ്രൂപ്പാണ് സര്‍ക്കാരിനെതിരെ അസഹ്യരായി രംഗത്തുള്ളത്.