ഹണിട്രാപ്പ് സംഘങ്ങള്‍ വ്യാപകമായതോടെ അന്വേഷണം ഊര്‍ജിതമാക്കി പൊലീസ്. വ്യവസായികളേയും പ്രവാസികളേയും ലക്ഷ്യമിട്ടാണ് സൗഹൃദം നടിച്ച് പണം തട്ടുന്ന സംഘങ്ങള്‍ പ്രവര്‍ത്തിക്കുന്നത്. ഇരകളെ കുരുക്കാന്‍ സംഘം സമൂഹ മാധ്യമങ്ങളാണ് മറയാക്കുന്നത്. കഴിഞ്ഞ ദിവസം കൊച്ചിയില്‍ നിന്ന് 26 കാരി ഉള്‍പ്പെടെ നാലുപേരെ പൊലീസ് അറസ്റ്റ് ചെയ്തിരുന്നു. കൊല്ലം കടക്കാവൂരില്‍ നിന്നും തിരുവനന്തപുരത്തുനിന്നും സമാന കേസുകള്‍ നേരത്തേ റിപ്പോര്‍ട്ട് ചെയ്തിരുന്നു. പ്രവാസി വ്യവസായിയെ നഗ്‌നദൃശ്യം കാണിച്ച് പണം തട്ടിയെന്ന പേരിലാണ് കൊച്ചിയില്‍ കഴിഞ്ഞ ദിവസം അറസ്റ്റുണ്ടായത്.

ഒരേ മാതൃകയിലാണ് ഇത്തരം തട്ടിപ്പുകളെന്ന് പൊലീസ് പറയുന്നു. ആദ്യം സമ്പന്നനായ ഇരയെ കണ്ടെത്തി വിവരം ശേഖരിക്കും. പിന്നീട് സംഘത്തിലെ സുന്ദരിയായ സ്ത്രീ വഴി ഇരയുമായി ബന്ധം സ്ഥാപിക്കും. നേരിട്ട് വിളിക്കുന്നതിന് പുറമെ ഫേസ്ബുക്ക് വഴിയോ മെസഞ്ചര്‍, വാട്‌സ്ആപ് വഴിയോ സൗഹൃദം സ്ഥാപിക്കും. പിന്നെ, നേരിട്ട് കാണണമെന്ന് ആവശ്യപ്പെടും. സ്വകാര്യനിമിഷങ്ങള്‍ സംഘാംഗങ്ങള്‍ ഒപ്പിയെടുക്കും. ഇങ്ങനെയാണ് കെണിയിലകപ്പെടുത്തുന്നത്. ദൃശ്യങ്ങള്‍ പ്രചരിപ്പിക്കാതിരിക്കാന്‍ ലക്ഷങ്ങളാണ് ആവശ്യപ്പെടുക. അപമാനം ഭയന്ന് ഭൂരിഭാഗം പേരും തുക നല്‍കുകയാണ് പതിവ്. ഒരിക്കല്‍ കുടുങ്ങിയാല്‍ രക്ഷപ്പെടുക പ്രയാസമാണ്.

കൊച്ചി സ്വദേശിയായ ഖത്തര്‍ വ്യവസായിയോട് 50 ലക്ഷമാണ് സംഘം ആവശ്യപ്പെട്ടത്. ആദ്യം ആത്മഹത്യക്കൊരുങ്ങിയ വ്യവസായി, സുഹൃത്തി!ന്റെ ഉപദേശപ്രകാരം പൊലീസിനെ സമീപിക്കുകയായിരുന്നു. മുന്‍പരിചയമില്ലാത്തവര്‍ സമൂഹമാധ്യമങ്ങള്‍വഴി സൗഹൃദം സ്ഥാപിക്കാനൊരുങ്ങുന്നുവെങ്കില്‍ ശ്രദ്ധിക്കണമെന്നാണ് പൊലീസ് നല്‍കുന്ന മുന്നറിയിപ്പ്. സംസ്ഥാനാന്തര പെണ്‍വാണിഭ റാക്കറ്റിലെ മുഖ്യകണ്ണിയായ തളിക്കുളം കണ്ണോത്തുപറമ്പില്‍ സീമ പോലീസ് പിടിയിലായതിന് പിന്നാലെ പുറത്ത് വന്നത് ഞെട്ടിക്കുന്ന റിപ്പോര്‍ട്ടുകളായിരുന്നു. ഇവര്‍ക്കു വിദേശ രാജ്യങ്ങളിലേക്കു വരെ നീളുന്ന പെണ്‍വാണിഭ ബന്ധങ്ങളുണ്ടെന്നാണ് പൊലീസിനു ലഭിച്ച വിവരം. പല സംസ്ഥാനങ്ങളില്‍ നിന്നു പെണ്‍കുട്ടികളെ എത്തിച്ച് ഇടപാടുകാര്‍ക്കു കാഴ്ചവയ്ക്കുന്ന റാക്കറ്റിന്റെ ആസ്ഥാനമായി തൃശൂരിനെ സീമയും സംഘവും മാറ്റിയെന്നും പൊലീസ് കണ്ടെത്തിയിട്ടുണ്ട്.

നഗരത്തിലെ ലോഡ്ജുകളില്‍ വന്‍കിട പെണ്‍വാണിഭം നടത്തിയെന്ന കേസില്‍ തളിക്കുളം കണ്ണോത്തുപറമ്പില്‍ സീമ ചൊവ്വാഴ്ചയാണ് പൊലീസ് മുന്‍പാകെ കീഴടങ്ങിയത്.ഇവരുടെ സംഘത്തില്‍പ്പെട്ട 12 യുവതികളെ പെണ്‍വാണിഭത്തിന് രണ്ടു കേസുകളിലായി പൊലീസ് സംഘം അറസ്റ്റ് ചെയ്തിരുന്നു. സമാന കേസുകളില്‍ മുന്‍പും പിടിയിലായിട്ടുള്ള സീമയ്‌ക്കെതിരെ ഈസ്റ്റ്, വെസ്റ്റ്, നെടുപുഴ സ്‌റ്റേഷനുകളിലായി ഏഴു കേസുകള്‍ നിലവിലുണ്ട്. സീമയെ ചോദ്യം ചെയ്തതില്‍ നിന്ന് വിദേശ രാജ്യങ്ങളിലേക്കു വരെ നീളുന്നതാണ് ഇവരുടെ പെണ്‍വാണിഭ ബന്ധങ്ങളെന്നു വ്യക്തമായി. പിടിക്കപ്പെടുമ്പോഴെല്ലാം ഉന്നത സ്വാധീനത്തിന്റെ മറവില്‍ പിഴയടച്ച് രക്ഷപ്പെടുന്നതാണ് രീതി. തൃശൂരിലെ പ്രമുഖ ഹോട്ടലുകളില്‍ ഇതര സംസ്ഥാന യുവതികളെ എത്തിച്ചു മുറികള്‍ സ്ഥിരവാടയ്‌ക്കെടുത്തു പാര്‍പ്പിച്ചാണ് സീമയും സംഘവും ഇടപാട് നടത്തിയിരുന്നത്.

പഞ്ച നക്ഷത്ര ഹോട്ടലുകളില്‍ പോലീസ് പരിശോധനയ്ക്ക് സാധ്യത കുറവാണെന്ന് മനസിലാക്കിയാണ് ഈ വഴിതന്നെ സീമയും കൂട്ടാളികളും തെരഞ്ഞെടുക്കുന്നത്. ഒരേ സമയം അറുപതോളം യുവതികളെ ഇവര്‍ നഗരത്തിലെ വിവിധ ഹോട്ടലുകളില്‍ പാര്‍പ്പിച്ചിരുന്നതായി പൊലീസ് കണ്ടെത്തി. ഹോട്ടലുകളില്‍ ജോലിക്കെന്ന പേരിലാണ് ഇവര്‍ ഇതര സംസ്ഥാനങ്ങളില്‍ നിന്നു പെണ്‍കുട്ടികളെ റിക്രൂട്ട് ചെയ്തിരുന്നത്. പെണ്‍വാണിഭത്തിനായി ഗള്‍ഫ് രാജ്യങ്ങളിലേക്കു പെണ്‍കുട്ടികളെ കടത്തിയിട്ടുണ്ടോ എന്ന കാര്യം പൊലീസ് പരിശോധിക്കുന്നുണ്ട്.