വിയ്യൂര് ജയിലില് നിന്നും പ്ലാസ്റ്റിക്കിന് പുറത്തുവരാന് ആവില്ല!
പരിസ്ഥിതിയെ നശിപ്പിക്കുന്നതിലെ മുഖ്യ വില്ലനായ പ്ലാസ്റ്റിക്കിനെ വിയ്യൂര് ജയില് അധികൃതര് ജയിലിലടച്ചു കഴിഞ്ഞു. നാടുമുഴുവന് പ്ലാസ്റ്റിക് മാലിന്യത്തിനെതിരെയുള്ള പോരാട്ടം നടത്തുമ്പോള് ജയില്വകുപ്പും പ്ലാസ്റ്റിക്കിനെതിരെയുള്ള യുദ്ധത്തില് അണിചേര്ന്നതിന്റെ വിജയലഹരിയിലാണ്.
ഫ്രീഡം ഫുഡ് അടക്കമുള്ളവ വിതരണം ചെയ്യാന് വിയ്യൂര് സെന്ട്രല് ജയിലില് പ്ലാസ്റ്റിക് കാരി ബാഗുകള്ക്ക് പകരം ന്യൂസ് പേപ്പര് കാരി ബാഗുകളാണ് സെയില്സ് കൗണ്ടറില് ഉപയോഗിക്കുന്നത്. കഴിഞ്ഞ ഒരു വര്ഷത്തിനിടെ ആയിരക്കണക്കിന് ന്യൂസ് പേപ്പര് ബാഗുകളാണ് ഈ കൗണ്ടറില് നിന്നും ഫ്രീഡം ഫുഡ് ഉപഭോക്താക്കള്ക്ക് നല്കിയത്.
നിരവധിയാളുകള് രണ്ടു രൂപ നിരക്കില് ലഭിക്കുന്ന ഈ ബാഗുകള് വാങ്ങാനായി മാത്രം ജയില് കൗണ്ടറിലെത്തുന്നുണ്ട്. ജയില് ഭക്ഷ്യോത്പന്നങ്ങളുടെ ഓണ്ലൈന് വില്പനയും ഇത്തരം കവറുകളിലാണ് നല്കുന്നത്.
ഫ്രീഡം പാര്ക്കില് ഭക്ഷണം കഴിക്കാനെത്തുന്നവര്ക്ക് വാഴയിലയിലാണ് ഭക്ഷണം നല്കുന്നത്.ആയിരക്കണക്കിന് പ്ലാസ്റ്റിക് ബാഗുകളുടെ ഉപയോഗം ഈ ഒരു വര്ഷത്തിനിടെ കുറയ്ക്കാന് സാധിച്ചതായി അധികൃതര് ചൂണ്ടിക്കാട്ടുന്നു.
പരമാവധി പ്ലാസ്റ്റിക് മാലിന്യം ഒഴിവാക്കാനാണ് തങ്ങള് ശ്രമിക്കുന്നതെന്നും കാരി ബാഗുകള് പ്ലാസ്റ്റിക്കില് നിന്നും കടലാസാക്കിയത് അതിന്റെ മുന്നോടിയാണെന്നും പ്ലാസ്റ്റിക് ഒഴിവാക്കാന് സാധിക്കുന്നിടത്തെല്ലാം ബദല് മാര്ഗങ്ങള് കണ്ടെത്തി അത് നടപ്പാക്കുമെന്നും ജയില് അധികൃതര് തറപ്പിച്ചു പറയുമ്പോള് വിയ്യൂര് ജയിലിനകത്തെ തടവറയില് നിന്ന് പ്ലാസ്റ്റിക് ഇനി പുറത്തിറങ്ങില്ലെന്നുറപ്പ്, ജാമ്യം പോലും കിട്ടില്ല!
https://www.facebook.com/Malayalivartha
