വ്യക്തി താല്‍പര്യങ്ങള്‍ക്ക് മാത്രം വില നല്‍കിയുള്ള ജീവിത രീതികളാണ് പല ബന്ധങ്ങളുടേയും തകര്‍ച്ചക്ക് കാരണമാകുന്നതെന്ന് വനിതാ കമ്മീഷന്‍ അധ്യക്ഷ എം.സി. ജോസഫൈന്‍. ഇത്തരത്തിലുള്ള പ്രവണത സമൂഹത്തിന് ദോഷകരമായ ഭവിഷ്യത്തുകളാണ് സൃഷ്ടിക്കുകയെന്ന് ആലപ്പുഴയില്‍ മെഗാ അദാലത്തില്‍ പങ്കെടുത്തുകൊണ്ട് ജോസഫൈന്‍ പറഞ്ഞു.

വ്യക്തിപരമായ സ്വാര്‍ഥത മുന്‍നിര്‍ത്തി മറ്റൊരു സ്ത്രീയോടൊപ്പം ജീവിക്കുകയും ഭാര്യക്ക് വിവാഹമോചനം നല്‍കാതിരിക്കുകയും ചെയ്യുന്ന സംഭവങ്ങള്‍ ഇന്ന് കേരളത്തില്‍ ഏറി വരുന്നത് കമ്മീഷന്റെ ശ്രദ്ധയില്‍ പെട്ടിട്ടുണ്ടെന്നും ഇത് യാതൊരു തരത്തിലും ന്യായീകരിക്കാനാവാത്ത പ്രവണതയാണെന്നും അവര്‍ പറഞ്ഞു.

നിയമപരമല്ലാത്ത ബന്ധങ്ങള്‍ ഒരിക്കലും സമൂഹത്തിന് നല്ല സന്ദേശമല്ല നല്‍കുക. വ്യക്തിഗത ജീവിതം വഴിവിട്ടു പോകുന്നതിലൂടെ സംഭവിക്കുന്ന പ്രശ്‌നങ്ങളാണ് മെഗാ അദാലത്തില്‍ വന്ന പരാതികളില്‍ കൂടുതലും. തൊഴിലിടങ്ങളില്‍ സ്ത്രീകള്‍ക്ക് നേരെയുണ്ടാവുന്ന അതിക്രമങ്ങള്‍ കമ്മീഷന്റെ ശ്രദ്ധയില്‍ വന്നിട്ടുണ്ട്.

ഇത്തരം പരാതികളില്‍ സ്‌പോട്ട് ഇന്‍സ്‌പെക്ഷന്‍ അടക്കമുള്ള നടപടികളിലൂടെ തെറ്റുകാരായവര്‍ക്കെതിരെ കടുത്ത ശിക്ഷ തന്നെ കമ്മീഷന്‍ സ്വീകരിക്കുമെന്നും അധ്യക്ഷ കൂട്ടിച്ചേര്‍ത്തു. അമ്പലപ്പുഴ ബ്ലോക്ക് പഞ്ചായത്ത് ഹാളില്‍ നടന്ന മെഗാ അദാലത്തില്‍ 80 പരാതികളാണ് കമ്മീഷന്‍ പരിഗണിച്ചത്. ഇതില്‍ മൂന്ന് പരാതികള്‍ വിവിധ വകുപ്പുകളുടെ വിശദമായ റിപ്പോര്‍ട്ടുകള്‍ക്കായി കൈമാറിയിട്ടുണ്ട്.

അദാലത്തിലെത്തിയ 15 പരാതികള്‍ കമ്മീഷന്‍ തീര്‍പ്പാക്കി. 62 പരാതികള്‍ ഒക്ടോബര്‍ 30-ന് നടക്കുന്ന അടുത്ത അദാലത്തിലേക്കായി മാറ്റിവച്ചിട്ടുണ്ട്. ജില്ലാ പഞ്ചായത്ത് ഹാളിലാണ് അടുത്ത മാസം 30-ന് അദാലത്ത് നടക്കുക. കമ്മീഷന്‍ അധ്യക്ഷയെ കൂടാതെ അംഗങ്ങളായ എം.എസ് താര, ഷിജി ശിവജി, ഇ.എം രാധ, കമ്മീഷന്‍ സി.ഐ. സുരേഷ് കുമാര്‍ എന്നിവരും അദാലത്തില്‍ പങ്കെടുത്തു.