ശബരിമല സുപ്രീംകോടതി വിധി തിടുക്കപ്പെട്ട് നടപ്പാക്കിയതിലൂടെ വിവാദച്ചുഴിയിലകപ്പെട്ട എല്‍.ഡി.എഫ് സര്‍ക്കാര്‍ കിഫ്ബി ഓഡിറ്റിംഗില്‍ ആടിയുലഞ്ഞ് നില്‍ക്കുമ്പോഴാണ് ആശ്വാസമായി പാലാക്കാരുടെ ജനപിന്തുണ. ശബരിമലയോട് അടുത്ത് കിടക്കുന്ന പാലായിലെ ഉപതെരഞ്ഞെടുപ്പ് വിജയം സര്‍ക്കാരിനും എല്‍.ഡി.എഫിനും സി.പി.എമ്മിനും വലിയ ആശ്വാസമാണ്. സര്‍ക്കാരിനെതിരെ പ്രതിപക്ഷം ആഞ്ഞടിച്ചുകൊണ്ടിരിക്കുന്ന വിഷയങ്ങളില്‍ നിന്ന് ജനശ്രദ്ധതിരിച്ചുവിടാന്‍ പാലായിലെ വിജയം സഹായകമാകും. യു.ഡി.എഫിനും കേരളാ കോണ്‍ഗ്രസിനും മാത്രമല്ല, ബി.ജെ.പിക്കും എന്‍.എസ്.സിനും പാലായിലെ പരാജയം തിരിച്ചടിയാണ്. ശബരിമല വിഷയം സര്‍ക്കാരിനും സി.പി.എമ്മിനും എതിരെ വലിയ പ്രതിരോധം തീര്‍ത്തത് ഇവരായിരുന്നു.

ശബരിമല വിഷയത്തില്‍ സര്‍ക്കാര്‍ സ്വീകരിച്ചനിലപാടാണ് ലോക്‌സഭാ തെരഞ്ഞെടുപ്പിലെ എല്‍.ഡി.എഫിന്റെ ചരിത്രത്തിലെ ഏറ്റവും വലിയ പരാജയത്തിന് കാരണമെന്ന് യു.ഡി.എഫും മാധ്യമങ്ങളും വിമര്‍ശിച്ചപ്പോഴും സി.പി.എം അത് അംഗീകരിച്ചിരുന്നില്ല. ശബരിമല കാരണം കുറച്ച് ഏറെ വോട്ടുകള്‍ നഷ്ടപ്പെട്ടു എന്ന് മാത്രമാണ് അവര്‍ വിലയിരുത്തിയത്. അത് ശരിവയ്ക്കുന്നതാണ് പാലായിലെ തെരഞ്ഞെടുപ്പ് ഫലം. ശബരിമല താല്‍ക്കാലിക പ്രതിഭാസം ആയിരുന്നെന്ന് ഒട്ടേറെ അയ്യപ്പഭക്തരുള്ള പാലായിലെ ജനവിധി വ്യക്തമാക്കുന്നു. യു.ഡി.എഫും ബി.ജെ.പിയും ശബരിമല പ്രചരണ വിഷയമാക്കിയെങ്കിലും ഇത്തവണ അത് ഏശിയില്ല. കഴിഞ്ഞ തവണ 24,000 വോട്ട് ലഭിച്ച ബി.ജെ.പിക്ക് ഇത്തവണ 15,000ത്തിന് താഴെ വോട്ടുകളെ ലഭിച്ചുള്ളൂ.

എല്‍.ഡി.എഫിനും യു.ഡി.എഫിനും എതിരെ ശക്തമായി നിന്ന പൂഞ്ഞാര്‍ എം.എല്‍.എ പി.സി ജോര്‍ജ്ജിനും പാലായില്‍ കാര്യമായി ഒന്നും ചെയ്യാനായില്ല. ഇക്കാര്യം വോട്ടെടുപ്പിന് ശേഷം അദ്ദേഹം നടത്തിയ പ്രതികരണങ്ങളില്‍ നിന്ന് വ്യക്തമായിരുന്നു. ബി.ജെ.പിയുടെ തെരഞ്ഞെടുപ്പ് പ്രചരണം ശക്തമായിരുന്നില്ലെന്നായിരുന്നു പി.സിയുടെ ആക്ഷേപം. കഴിഞ്ഞ തവണ മത്സരിച്ച ഹരി തന്നെയാണ് ഇത്തവണയും മത്സരിച്ചത്. എന്നിട്ടും വോട്ട് വിഹിതം കുറഞ്ഞത് എന്‍.ഡി.എ ക്യാമ്പിനെ ഞെട്ടിച്ചു. കാരണം പി.സി ജോര്‍ജ്ജിനെ കൂടാതെ പി.സി തോമസും അവര്‍ക്കൊപ്പം ഉണ്ടായിരുന്നിട്ടും ന്യൂനപക്ഷമേഖലയില്‍ കാര്യമായ ചലനം സൃഷ്ടിക്കാനായില്ല. മുഖ്യമന്ത്രി പിണറായി വിജയന്‍ അടക്കമുള്ള മന്ത്രിമാരും മറ്റ് എല്‍.ഡി.എഫ് നേതാക്കളും പാലായില്‍ ക്യമ്പ് ചെയ്താണ് പ്രചരണ പ്രവര്‍ത്തനങ്ങള്‍ക്ക് നേതൃത്വം നല്‍കിയത്. അതിന്റെ ഗുണവും കേരളാ കോണ്‍ഗ്രസിലെ തമ്മിലടിയും മാണി സി.കാപ്പന് മുതല്‍ക്കൂട്ടായി.

ശബരിമലയ്ക്ക് പിന്നാലെ അഴിമതിയാരാപണങ്ങളാണ് എല്‍.ഡി.എഫ് സര്‍ക്കാരിനെ പ്രതിസന്ധിയിലാക്കുന്നത്. കിഫ്ബിയിലും കിയാലിലും സി.എ.ജിയുടെ സ്റ്റാറ്റിയൂട്ടറി ഓഡിറ്റിംഗ് നടത്താതെ കോടിക്കണക്കിന് രൂപയുടെ അഴിമതിയാണ് നടക്കുന്നതെന്ന് യു.ഡി.എഫും പ്രതിപക്ഷനേതാവും ആരോപിച്ചുകൊണ്ടിരിക്കുകയാണ്. ഈ സ്ഥാപനങ്ങള്‍ സ്വന്തംനിലയില്‍ ഓഡിറ്റിംഗ് നടത്തുന്നത് വഴി കോടിക്കണക്കിന് രൂപയുടെ പൊതുപണം കൊള്ളയടിക്കുകയാണെന്ന് പ്രതിപക്ഷവും സാമൂഹ്യപ്രവര്‍ത്തകരും ആരോപിക്കുകയാണ്. രണ്ടാഴ്ചയിലധികമായി ഇത് സര്‍ക്കാരിനെ പ്രതിസന്ധിയിലാക്കിയിരിക്കുകയാണ്. അതില്‍ നിന്നെല്ലാം തല്‍ക്കാലം രക്ഷപെടാന്‍ പാലായിലെ വിജയം ആശ്വാസവും വട്ടിയൂര്‍ക്കാവ്, മഞ്ചേശ്വരം, എറണാകുളം, അരൂര്‍, കോന്നി ഉപതെരഞ്ഞെടുപ്പുകളിലെ പ്രചരണത്തിനുള്ള ഊര്‍ജ്ജവും ആകും എന്നതില്‍ സംശയമില്ല.