പാലായില്‍ കഴിഞ്ഞതവണ ബി.ജെ.പി സ്ഥാനാര്‍ത്ഥിയായ എന്‍.ഹരിക്കും എന്‍.ഡി.എയ്ക്കും 24,000 വോട്ടാണ് കിട്ടിയത്, ഇത്തവണ അത് 18,044 ആയി കുറഞ്ഞു. ആറായിരത്തോളം വോട്ട് എവിടെപ്പോയി? അതിന് വ്യക്തമായ സൂചന നല്‍കിയത് യു.ഡി.എഫ് കണ്‍വീനര്‍ ബെന്നി ബെഹാനാണ്. പാലായില്‍ എന്‍.സി.പി നേതാവും എല്‍.ഡി.എഫ് സ്ഥാനാര്‍ത്ഥിയുമായ മാണി സി. കാപ്പന്‍ ആരുമായാണ് പാലം പണിതതെന്ന് സി.പി.എം അന്വേഷിക്കുന്നത് നന്നായിരിക്കും. എന്നിട്ടവര്‍ പൊതുസമൂഹത്തിന് മറുപടി നല്‍കണമെന്നും അദ്ദേഹം ആവശ്യപ്പെട്ടു. പാലായിലേത് യു.ഡി.എഫിന്റെ രാഷ്ട്രീയ പരാജയമല്ലെന്നും മുന്നണിയിലെ പാര്‍ട്ടികള്‍ തമ്മിലുള്ള പോര് പ്രശ്‌നമായെന്നും കണ്‍വീനര്‍ പ്രതികരിച്ചു. അതിനര്‍ത്ഥം ബി.ജെ.പി വോട്ട് മാണി സി.കാപ്പന് ലഭിച്ചതും പി.ജെ ജോസഫും ജോസ് കെ.മാണിയും തമ്മിലുള്ള പടലപ്പിണക്കവുമാണ് യു.ഡി.എഫിന്റെ പരാജയമെന്ന് വ്യക്തമാണ്.

ബി.ജെ.പിയില്‍ തുടക്കം മുതലേ പ്രശ്‌നങ്ങളുണ്ടായിരുന്നെന്ന് എന്‍.ഡി.എയിലെ ഘടകക്ഷിയായ പി.സി ജോര്‍ജ്ജ് എം.എല്‍.എ ആരോപിച്ചിരുന്നു. പി.സി തോമസിനെ കൂടാതെ പി.സി ജോര്‍ജ്ജ് കൂടി എന്‍.ഡി.എയ്‌ക്കൊപ്പം അണിനിരന്നതോടെ വോട്ട് വിഹിതം കൂടുമെന്നാണ് ബി.ജെ.പി കരുതിയിരുന്നത്. എന്നാല്‍ അവരുടെ പ്രാദേശിക നേതാക്കള്‍ തമ്മിലുള്ള അഭിപ്രായവ്യത്യാസം തിരിച്ചടിയായി. അങ്ങനെ ആറായിരത്തോളം വോട്ട് കുറഞ്ഞു. ഈ വോട്ട് യു.ഡി.എഫ് പാളയത്തിലേക്ക് പോയിട്ടില്ല. പിന്നെ എവിടെ പോയി? വോട്ടെടുപ്പിന് ഏതാനും ദിവസങ്ങള്‍ക്ക് മുമ്പ് സി.പി.എം ഉയര്‍ത്തിയ പ്രധാന ആരോപണം യു.ഡി.എഫ്- ബി.ജെ.പി വോട്ട് കച്ചവടം നടന്നെന്നായിരുന്നു. ഈ ആരോപണം ഉന്നയിച്ചത് പുകമറ സൃഷ്ടിക്കാനായിരുന്നെന്നാണ് തെരഞ്ഞെടുപ്പ് ഫലം നല്‍കുന്ന സൂചന. മുത്താലി, മീനച്ചല്‍ പഞ്ചായത്തുകളില്‍ മാത്രമാണ് യു.ഡി.എഫിന് ലീഡ് നിലനിര്‍ത്താനായത്.

മൂവായിരം വോട്ടിന്റെ ഭൂരിപക്ഷത്തിന് വിജയിക്കുമെന്ന് മാണി സി.കാപ്പന്‍ വോട്ടെടുപ്പിന് ശേഷം പ്രതികരിച്ചത് വ്യക്തമായ കണക്ക് കൂട്ടലോടെയായിരുന്നെന്ന് ജനപക്ഷം നേതാവും പൂഞ്ഞാര്‍ എം.എല്‍.എയുമായ പി.സി ജോര്‍ജ്ജ് പറയുന്നു. 2,943 വോട്ടിന്റെ ഭൂരിപക്ഷം ലഭിച്ചു. അതിനര്‍ത്ഥം അവരുടെ കണക്ക് കൂട്ടല്‍ ശരിയായിരുന്നെന്നാണ്. ബി.ജെ.പിക്കാരില്‍ പലരും വോട്ട് മാറി കുത്തിയതെന്നും പി.സി ജോര്‍ജ്ജ് ഒരു ചാനലിനോട് പ്രതികരിച്ചു. താനും പി.സി തോമസും ഷോണ്‍ ജോര്‍ജ്ജും കിണഞ്ഞ് പരിശ്രമിച്ചിരുന്നു. ബി.ജെ.പി നേതാക്കളും പ്രവര്‍ത്തകരും ഒപ്പം നില്‍ക്കാമെന്ന് പറഞ്ഞതല്ലാതെ ഒന്നും നടന്നില്ല. കാപ്പന് വോട്ട് മാറ്റി കുത്തിയിരുന്നെങ്കില്‍ അദ്ദേഹത്തിന്റെ ഭൂരിപക്ഷം 16,000 കടക്കുമായിരുന്നെന്നും പി.സി ജോര്‍ജ്ജ് ആരോപിച്ചു.

പാലായില്‍ ബി.ജെ.പി വോട്ട് കച്ചവടം നടത്തിയെന്നും അതേക്കുറിച്ച് പിന്നീട് പ്രതികരിക്കാം, എന്‍.ഡി.എ നേതാക്കളെ ഇക്കാര്യം അറിയിച്ചിട്ടുണ്ടെന്നും പി.സി ജോര്‍ജ്ജ് പറഞ്ഞു. എന്നാല്‍ ഉമ്മന്‍ചാണ്ടിയും ജോസ് കെ.മാണിയും പ്രതികരിച്ചത് ബി.ജെ.പി വോട്ട് എവിടെ പോയെന്നാണ്. അതാണ് യു.ഡി.എഫിന്റെ പരാജയകാരണമെന്ന് അവര്‍ പ്രാഥമികമായി വിലയിരുത്തുന്നു. ബി.ജെ.പിയുടെ പാലാ മണ്ഡലം തെരഞ്ഞെടുപ്പ് നേതാവ് ജോസ് ടോമിന് വോട്ട് ചെയ്യണമെന്നാണ് നിര്‍ദ്ദേശിച്ചിരുന്നെന്ന് സി.പി.എം സംസ്ഥാന സെക്രട്ടറിയേറ്റ് അംഗം ആനത്തലവട്ടം ആനന്ദന്‍ ആരോപിച്ചു. ഇക്കാര്യം തന്നെയാണ് പി.സി ജോര്‍ജ്ജ് ചൂണ്ടിക്കാണിച്ചതെന്നും ആനത്തലവട്ടം പറഞ്ഞു. അതേസമയം ബി.ഡി.ജെ.എസിന്റെ വോട്ട് കാപ്പന് കിട്ടിയില്ലെന്ന് പറയാനും അദ്ദേഹം തയ്യാറായില്ല. എസ്.എന്‍.ഡി.പിയുടെ പിന്തുണ മാണി .സി കാപ്പനാണെന്ന് ആദ്യമേ പ്രഖ്യാപിച്ചിരുന്നു. എന്നാല്‍ ബി.ജെ.പിയിലെ വോട്ട് ചോര്‍ച്ച വരും ദിവസങ്ങളില്‍ ചര്‍ച്ചയാകും എന്നതില്‍ സംശയമില്ല. അത് എല്‍.ഡി.എഫിലേക്കോ, യു.ഡി.എഫിലേക്കോ എന്ന് കാത്തിരുന്ന് കാണാം.