കോടികളുടെ വൈദ്യുതി ചാര്ജ് കുടിശ്ശിക; 200 കുടുംബങ്ങളെ ഇരുട്ടിലാക്കി വെള്ളൂര് ന്യൂസ് പ്രിന്റ് ഫാക്ടറി ക്വാര്ട്ടേഴ്സിലെ വൈദ്യുതി വിച്ഛേദിച്ചു!
കെഎസ്ഇബിക്ക് വൈദ്യുതി ചാര്ജ് ഇനത്തില് കോടികള് കുടിശികയായതോടെ വെള്ളൂര് ന്യൂസ് പ്രിന്റ് ഫാക്ടറിയിലേക്കുള്ള വൈദ്യുതി ബന്ധം വിഛേദിച്ചു. അതോടെ ക്വാര്ട്ടേഴ്സില് താമസിക്കുന്ന ഇരുന്നൂറോളം കുടുംബങ്ങള് ഇരുട്ടിലായി. ഇന്നലെ ഉച്ചകഴിഞ്ഞ് മുന്നോടെയാണ് കെഎസ്ഇബി വൈക്കം സബ് സ്റ്റേഷന് അസിസ്റ്റന്റ് എന്ജിനിയറുടെ നേതൃത്വത്തില് ഉദ്യോഗസ്ഥരെത്തി വൈദ്യുതി വിച്ഛേദിച്ചത്.
വൈദ്യുതി വിച്ഛേദിക്കുമെന്ന് അറിയിച്ച് കഴിഞ്ഞ ജൂലൈ 29-ന് കമ്പനിക്ക് കെഎസ്ഇബി കത്ത് നല്കിയിരുന്നു. എന്നാല് തൊഴിലാളി സംഘടന നേതാക്കളുടെ ആവശ്യപ്രകാരം മുഖ്യമന്ത്രി ഇടപെട്ട് താത്ക്കാലികമായി നടപടി ഒഴിവാക്കിയിരുന്നു. പലതവണ വൈദ്യുതി കുടിശിക അടയ്ക്കാന് കമ്പനിക്ക് അധികൃതര് നോട്ടീസ് നല്കിയിട്ടും അടയ്ക്കാത്തതിനാലാണ് ഇന്നലെ ഉദ്യോഗസ്ഥരെത്തി വൈദ്യുതിബന്ധം വിച്ഛേദിച്ചത്.
ഇതോടെ കമ്പനി ക്വാര്ട്ടേഴ്സില് താമസിക്കുന്ന ഇരുന്നൂറോളം കുടുംബങ്ങളും ഇരുട്ടിലായി. കമ്പനിയുടെ സമീപ പ്രദേശങ്ങളിലെ നാട്ടുകാര്ക്ക് കുടിവെള്ളം പമ്പ് ചെയ്യുന്നതും ഇതോടെ നിലച്ചു. ആശുപത്രി, എടിഎം കൗണ്ടര്, സൂപ്പര് മാര്ക്കറ്റ്, സഹകരണ ബാങ്ക്, ഭാവന്സ് സെന്ട്രല് സ്കൂള്, പോസ്റ്റ്ഓഫീസ്, ടൗണ്ഷിപ്പിലെ വ്യാപാര സ്ഥാപനങ്ങള്, മുടക്കാരിക്ഷേത്രം തുടങ്ങിയ ഇടങ്ങളിലെ വൈദ്യുതിയും ഇല്ലാതായി.
കമ്പനിയില് നിന്നായിരുന്നു വെള്ളൂര് പോലീസ് സ്റ്റേഷനില് വൈദ്യുതി ലഭിച്ചിരുന്നതെങ്കിലും വൈദ്യുതി വിച്ഛേദിച്ചപ്പോള് തന്നെ വൈദ്യുതി വകുപ്പ് അധികൃതര് പെരുവ സബ് ഡിവിഷനുമായി ബന്ധപ്പെട്ട് സ്റ്റേഷനിലെ വൈദ്യുതി പുനഃസ്ഥാപിച്ചു. കഴിഞ്ഞ ഒരു വര്ഷമായി കമ്പനിയുടെ പ്രവര്ത്തനം നിലച്ചതു മൂലം ജീവനക്കാര്ക്ക് ശമ്പളം ലഭിക്കുന്നില്ല. വരുമാനം മുട്ടിയതോടെ അര്ധ പട്ടിണിയിലായ ജീവനക്കാര്ക്ക് വൈദ്യുതി ബന്ധംകൂടി നിലച്ചത് കനത്ത പ്രഹരമായി.
https://www.facebook.com/Malayalivartha