അഴിമതിക്കാരെ വച്ച് പൊറുപ്പിക്കില്ലെന്ന കര്‍ശന നിലപാടാണ് പ്രധാനമന്ത്രി നരേന്ദ്ര മോദി സ്വീകരിച്ചത്. അധികാരമേറ്റയുടനെ എല്ലാ മന്ത്രിമാര്‍ക്കും കര്‍ശന നിര്‍ദേശമാണ് മോദി നല്‍കിയത്. അതിനി ഉദ്യോഗസ്ഥരാണെങ്കിലും വെറുതേ വിടേണ്ടെന്ന കര്‍ശന നിലപാടിലാണ് മോദി.

ഈ പാത പിന്തുടരുന്ന മോദി സര്‍ക്കാര്‍ തൃശൂരില്‍ പത്തു ലക്ഷം രൂപ കോഴ വാങ്ങി പിടിയിലായ ആദായ നികുതി അസിസ്റ്റന്റ് കമ്മിഷണര്‍മാര്‍ അടക്കം അഴിമതിക്കേസില്‍ കുടുങ്ങിയ 15 ഉന്നത ഉദ്യോഗസ്ഥരെയാണ് പിരിച്ചുവിട്ടത്.

കഴിഞ്ഞ ജൂണില്‍ ഇത്തരത്തിലുള്ള 12 ഉന്നത ഉദ്യോഗസ്ഥരെ ആദായ നികുതി വകുപ്പില്‍ നിന്നും പിരിച്ചുവിട്ടിരുന്നു. തൃശൂര്‍ ആദായനികുതി ഓഫീസിലെ അസിസ്റ്റന്റ് കമ്മിഷണര്‍മാരായ ജോസ് കുഞ്ഞിപ്പാലു, വിന്‍സെന്റ് ജോസഫ് എന്നിവര്‍ അടക്കമുള്ളവരെയാണ് പിരിച്ചുവിട്ടത്. പത്തു ലക്ഷം രൂപ കോഴ വാങ്ങുന്നതിനിടെ, 2014 ല്‍ ഇവരെ താമസിച്ചിരുന്ന ഫഌറ്റില്‍ നിന്നും സി.ബി.ഐ പിടികൂടിയിരുന്നു. സസ്‌പെന്‍ഷനിലായെങ്കിലും സ്വാധീനം ചെലുത്തി സര്‍വീസില്‍ തിരിച്ചെത്തി.

കോഴ വാങ്ങിയ രണ്ട് ഉദ്യോഗസ്ഥര്‍ക്കുമെതിരെ കേസുകള്‍ കോടതിയില്‍ തുടരുകയാണ്. ഇക്കാര്യങ്ങള്‍ ചൂണ്ടിക്കാട്ടി കാനന്‍ ഗ്രാനൈറ്റ്‌സ് ഉടമ സൈമണ്‍ കെ. ഫ്രാന്‍സിസ് പ്രധാനമന്ത്രി നരേന്ദ്രമോദിക്കും ധനമന്ത്രി നിര്‍മല സീതാരാമനും പരാതി നല്‍കിയിരുന്നു. ഈ പരാതി കിട്ടിയതോടെ മോദി പ്രശ്‌നത്തിലിടപെടുകയും കര്‍ശന നടപടി സ്വീകരിക്കാനും നിര്‍ദേശം നല്‍കിയിരുന്നു. ഇതുകൂടി പരിഗണിച്ചാണ് ഉദ്യോഗസ്ഥരെ പിരിച്ചുവിട്ടത്.

പത്തു ലക്ഷം രൂപ കോഴ വാങ്ങാന്‍ 2014 ല്‍ അമ്പതു ലക്ഷം രൂപ കൂടി ആദായ നികുതിയായി അടയ്ക്കണമെന്ന് ഈ ഉദ്യോഗസ്ഥര്‍ ആവശ്യപ്പെട്ടിരുന്നു. മുപ്പതു ലക്ഷത്തോളം രൂപ ആദായനികുതി അടച്ചിട്ടുണ്ടെന്നും കണക്കു കൃത്യമാണെന്നും കാനന്‍ ഗ്രാനൈറ്റ്‌സ് മറുപടി നല്‍കി. ഉദ്യോഗസ്ഥര്‍ സമ്മതിച്ചില്ല. പത്തു ലക്ഷം രൂപ കോഴ തന്നാല്‍ 50 ലക്ഷം രൂപ ചുമത്തുന്നത് ഒഴിവാക്കാമെന്നു പറഞ്ഞു. ഇതനുസരിച്ച് പണം കൈമാറുന്നതിനിടയിലാണ് രണ്ട് ഉദ്യോഗസ്ഥരും സി.ബി.ഐ ഉദ്യോഗസ്ഥരുടെ പിടിയിലായത്.

അതേസമയം പ്രതിമാസ റേഡിയോ പരിപാടിയായ 'മന്‍ കി ബാത്തി'ല്‍ മോദി കേരളത്തെ പരാമര്‍ശിച്ചത് പ്രത്യേകം ശ്രദ്ധനേടി. മലയാളി കന്യാസ്ത്രീയായ സിസ്റ്റര്‍ മറിയം ത്രേസ്യയ്ക്ക് മോദി ആദരമര്‍പ്പിച്ചു. വരുന്ന ഒക്ടോബര്‍ 13ന് ഫ്രാന്‍സിസ് മാര്‍പ്പാപ്പ മറിയം ത്രേസ്യയെ വിശുദ്ധയായി പ്രഖ്യാപിക്കുമെന്നും താന്‍ തന്റെ ക്രൈസ്തവ സഹോദരീ സഹോദരന്മാര്‍ക്ക് അഭിനന്ദനം അറിയിക്കുന്നുവെന്നുമാണ് മോദി പറഞ്ഞത്. നവതിയാഘോഷികുന്ന ഭാരതത്തിന്റെ വാനമ്പാടി ലതാ മങ്കേഷ്‌ക്കറിന് മോദി ആശംസകള്‍ പകരുകയും ചെയ്തു. താന്‍ ലതാജിക്ക് ജന്മദിനാശംസകള്‍ നല്‍കുന്നതിന്റെ ഫോണ്‍ റെക്കോഡിങ്ങും മോദി 'മന്‍ കി ബാത്തി'ലൂടെ പങ്കുവച്ചു.

ദീപാവലി ആഘോഷിക്കുമ്പോള്‍ നാടിന് കീര്‍ത്തി നേടിത്തന്ന പെണ്‍കുട്ടികളെ നമ്മള്‍ ആദരിക്കുകയാണ് വേണ്ടതെന്ന് മോദി പറഞ്ഞു. ഭാരതത്തിന്റെ ലക്ഷ്മിമാരെ നമ്മള്‍ ബഹുമാനിക്കണമെന്നും നാരി ശക്തിയുടെ ഗുണത്തെയും കരുത്തിനെയും കുറിച്ച് നമ്മുക്ക് ബോധമുണ്ടാകണമെന്നും പ്രധാനമന്ത്രി പറഞ്ഞു.

പ്രിയ സഹോദരീസഹോദരന്മാരെ, സമ്പത്തിന്റെ ദേവതയായ ലക്ഷ്മിയെ, ഭാഗ്യത്തിന്റെ രൂപത്തിലും, സമ്പത്തിന്റെ രൂപത്തിലും നമ്മള്‍ എല്ലാ വീട്ടിലും കുടിയിരുത്തിയിട്ടുണ്ട്. തീര്‍ച്ചയായും ലക്ഷ്മീദേവിയെ നമ്മള്‍ സ്വീകരിക്കണം. ഗ്രാമങ്ങളിലും നഗരങ്ങളിലും പട്ടണങ്ങളിലുമുള്ള നമ്മുടെ പെണ്‍കുട്ടികളെ വിവിധ പദ്ധതികളിലൂടെ നമ്മുക്ക് സഹായിക്കേണ്ടേയെന്നും മോദി ചോദിച്ചു.