സ്ഥാനാര്‍ത്ഥി നിര്‍ണയത്തെ ചൊല്ലിയുള്ള ചക്കളത്തിപ്പോര് കോണ്‍ഗ്രസിന് പുതുമയുള്ള വിഷയമല്ലെങ്കിലും യു.ഡി.എഫ് കോട്ടയായിരുന്ന പാലായില്‍ തോറ്റമ്പി ഓടിയതിന്റെ നാണക്കേടില്‍ നിന്ന് രക്ഷപെടാന്‍ കെ.പി.സി.സി നേതൃത്വം നട്ടെല്ല് നിവര്‍ത്തി കോന്നിയിലെ ഇടഞ്ഞകൊമ്പനായ അടൂര്‍പ്രകാശിനെ തളച്ചു. തന്റെ നോമിനിയായ റോബിന്‍ പീറ്ററെ സ്ഥാനാര്‍ത്ഥിയാക്കാത്തതിലുള്ള കലിപ്പിലായിരുന്നു അടൂര്‍പ്രകാശ്. കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രനും പ്രതിപക്ഷനേതാവ് രമേശ് ചെന്നിത്തലയും കടുത്തനിലപാടിലേക്ക് കടക്കുമെന്ന് മുന്നറിയിപ്പ് നല്‍കിയതോടെയാണ് അടൂര്‍പ്രകാശ് മനസില്ലാമനസ്സോടെ തെരഞ്ഞെടുപ്പ് കണ്‍വെന്‍ഷന് എത്തിയത്. പ്രവര്‍ത്തകര്‍ അദ്ദേഹത്തെ തോളിലേറ്റി സ്വീകരിച്ചെങ്കിലും വഞ്ചി ഇപ്പോഴും തിരുനക്കരെ തന്നെയെന്നാണ് സൂചന.

23 വര്‍ഷം അടൂര്‍പ്രകാശ് കോന്നിയില്‍ എം.എല്‍.എയായിരുന്നത് എസ്.എന്‍.ഡി.പി യോഗത്തിന്റെ ശക്തമായ പിന്തുകൊണ്ടാണ്. അവരെ പോലും ധിക്കരിച്ച് റോബിനെ സ്ഥാനാര്‍ത്ഥിയാക്കണമെന്ന് വാശിപിടിച്ചതോടെ വെള്ളാപ്പള്ളി നടേശന്‍ അരയും തലയും മുറുക്കി രംഗത്തെത്തി. അതോടെ അപകടം മണത്ത കോണ്‍ഗ്രസ് നേതൃത്വം പി. മോഹന്‍രാജിനെ സ്ഥാനാര്‍ത്ഥിയാക്കുകയായിരുന്നു. പാലായില്‍ എസ്.എന്‍.ഡി.പിയും ബി.ഡി.ജെ.എസും എല്‍.ഡി.എഫിനെ സഹായിച്ചത് കൊണ്ടാണ് മാണി സി.കാപ്പന്‍ ജയിച്ചത്. ആ നീക്കം കോന്നിയിലും ആവര്‍ത്തിച്ചാല്‍ യു.ഡി.എഫിന് ജനപിന്തുണ ഇല്ലാതായെന്ന് മുഖ്യമന്ത്രി പിണറായി വിജയനും എല്‍.ഡി.എഫ് നേതാക്കള്‍ക്കും ആവര്‍ത്തിക്കാനാകും. അത് ഒഴിവാക്കാനാണ് മോഹന്‍രാജിനെ കളത്തിലിറക്കിയത്.

പാര്‍ട്ടി തീരുമാനത്തിന് അടൂര്‍ പ്രകാശ് വഴങ്ങിയെങ്കിലും അടിയൊഴുക്കുകള്‍ സംഭവിക്കുമെന്നാണ് അറിയാന്‍ കഴിയുന്നത്. റോബിനെ ഡി.സി.സി വൈസ്പ്രസിഡന്റ് ആക്കിയെങ്കിലും അതിലൊന്നും കാര്യങ്ങള്‍ തീരില്ല. പത്തനംതിട്ട പ്രമാടം പഞ്ചായത്ത് പ്രസിഡന്റാണ് റോബിന്‍ പീറ്റര്‍. ഡി.സി.സി പ്രസിഡന്റ് ബാബു ജോര്‍ജ്ജ് തനിക്കും റോബിനും എതിരെ വ്യക്തിപരമായി നടത്തിയ പരാമര്‍ശങ്ങളില്‍ അടൂര്‍പ്രകാശ് അതൃപ്തനാണ്. ഇക്കാര്യം ചൂണ്ടിക്കാട്ടി കെ.പി.സി.സി.ക്ക് പരാതിയും നല്‍കിയിട്ടുണ്ട്. കോന്നിയില്‍ സാമൂഹ്യസന്തുലിതാവസ്ഥ നിലനിര്‍ത്തണം എന്നാണ് ബാബു ജോര്‍ജ്ജ് ആവശ്യപ്പെട്ടത്. അതിനര്‍ത്ഥം ഈഴവ സ്ഥാനാര്‍ത്ഥി തന്നെ വരണമെന്നാണ്. എന്നാല്‍ മതേതരത്വം നിലനിര്‍ത്തണമെന്നാണ് അടൂര്‍ പ്രകാശ് വാദിച്ചത്. ഇതേതുടര്‍ന്ന് , അഠൂര്‍ പ്രകാശ് സ്വന്തം തന്തയെ പോലും മറന്നാണ് സംസാരിക്കുന്നതെന്ന് വെള്ളാപ്പള്ളി നടേശന്‍ രൂക്ഷമായി പ്രതികരിച്ചു.

പത്രികാ സമര്‍പ്പണത്തിന്റെ അവസാനദിനമായ ഇന്ന് അടൂര്‍പ്രകാശിനെ അനുനയിപ്പിച്ചത് കോണ്‍ഗ്രസ് നേതൃത്വത്തിന്റെ നേട്ടമാണ്. പ്രചാരണരംഗത്ത് പങ്കെടുക്കുമോ എന്ന് മാധ്യമപ്രവര്‍ത്തകര്‍ ചോദിച്ചപ്പോള്‍ ആറ്റിങ്ങലാണ് തന്റെ മണ്ഡലം എന്നാണ് അടൂര്‍പ്രകാശ് പ്രതികരിച്ചത്. അതിനാല്‍ കോന്നി മണ്ഡലത്തിന്റെ മുക്കുംമൂലയും അറിയാവുന്ന അടൂര്‍പ്രകാശ് പ്രചരണരംഗത്ത് സജ്ജീവമാകുമോ എന്നത് ഏറെ നിര്‍ണായകമാണ്. ഒപ്പം റോബിന്‍പീറ്ററുടെ പിന്തുണയും മോഹന്‍രാജിന് വേണം. അങ്ങനെയെങ്കില്‍ കാര്യങ്ങള്‍ നന്നായി പോകും. വെള്ളാപ്പള്ളിയുടെ എതിര്‍പ്പ് അടൂര്‍ പ്രകാശ് ഇടപെട്ടാല്‍ തീരാവുന്നതേയുള്ളൂ. അതിന് അടൂര്‍ പ്രകാശ് തയ്യാറാകുമെന്നാണ് കരുതുന്നത്. 54 വര്‍ഷം അടക്കിഭരിച്ചിരുന്ന പാലായിലെ പാലം തകര്‍ന്നതിന് പിന്നാലെ കാല്‍നൂറ്റാണ്ടിനടുത്ത് കോട്ടയാക്കി കൊണ്ടുനടക്കുന്ന കോന്നി കൂടെ പോയാല്‍ പിന്നെ തലേല്‍ മുണ്ടിട്ട് നടന്നാലും തീരില്ല നാണക്കേട്.