മരടിലെ ഫ്‌ലാറ്റുകള്‍ ഒഴിയാന്‍ സര്‍ക്കാര്‍ അനുവദിച്ച സമയപരിധി ഇന്നു വൈകിട്ട് അഞ്ചു മണിക്ക് അവസാനിച്ചെങ്കിലും രാത്രി 12 മണിവരെ നീട്ടി. അതുവരെ ഫ്‌ലാറ്റുകളിലെ വൈദ്യുതിയും വെള്ളവും വിച്ഛേദിക്കില്ലെന്ന് അധികൃതര്‍ അറിയിച്ചു. അതേസമയം പുനരധിവാസത്തിന് സര്‍ക്കാര്‍ ഒരുകോടി അനുവദിച്ചിട്ടുണ്ട്.

സര്‍ക്കാര്‍ കണക്കുകള്‍ പ്രകാരം, 328 അപ്പാര്‍ട്ട്‌മെന്റുകളില്‍ നിന്ന് 103 കുടുംബങ്ങള്‍ മാത്രമാണ് ഒഴിഞ്ഞത്. 205 അപ്പാര്‍ട്ട്‌മെന്റുകള്‍ ഇനിയും ഒഴിയാനുണ്ട്. ഫ്‌ലാറ്റ് ഒഴിയാന്‍ കൂടുതല്‍ സമയം ഇനി അനുവദിക്കാനാവില്ലെന്ന് സബ് കളക്ടര്‍ അറിയിച്ചുണ്ട്. എന്നാല്‍ ഇപ്പോള്‍ നീട്ടിയ സമയം മതിയാകില്ലെന്നും കൂടുതല്‍ സമയം വേണമെന്നും ഫ്‌ലാറ്റ് ഉടമകള്‍ ആവശ്യപ്പെട്ടു. ഫ്‌ലാറ്റുകള്‍ ഒഴിയാതെ രക്ഷയില്ലെന്ന് മരട് നഗരസഭയും അറിയിച്ചു.