ജെർമൻ ഷെപ്പേർ‍ഡ് നായ്‍ക്കളുമായി വന്ന് ബാർ അടിച്ച് തകർത്ത സംഭവത്തിൽ രണ്ടുപ്പേർ പിടിയിൽ . പഴയന്നൂർ രാജ് ബാർ തകർത്ത കേസിൽ പൂങ്കുന്നം വൈശാഖ്, അഞ്ചേരി വൈശാഖ് എന്നിവരാണ് അറസ്റ്റിലായിരിക്കുന്നത്. കഴിഞ്ഞ മാസം 20ന് രാത്രി പത്തേമുക്കാലോടെയായിരുന്നു 4 ജർമൻ ഷെപ്പേർഡ് നായ്ക്കളും വടിവാളുകളുമായി എത്തിയ യുവാക്കൾ പഴയന്നൂർ രാജ് ബാർ ഹോട്ടൽ ബാർ അടിച്ചു തകർത്തത്‌.നായ്ക്കളെ കണ്ടവർ ബാറിൽ നിന്നും ഇറങ്ങി ഓടിയിരുന്നു.

മദ്യപിച്ച ശേഷം ബിൽ ചോദിച്ചപ്പോൾ പണമില്ല എന്ന് യുവാക്കൾ പറഞ്ഞിരുന്നു. 950 രൂപ നൽകാൻ പണമില്ലാത്തതിനാൽ ബാറിലെ സപ്ലയർ 2 യുവാക്കളുടെയും മൊബൈൽ ഫോണുകൾ പിടിച്ചു വച്ചിരുന്നു. ഇതായിരുന്നു യുവാക്കൾ ആക്രമണത്തിനു പ്രകോപിച്ചത്. അപ്പോൾ ബാറിൽ നിന്നും പോയ യുവാക്കള്‍ രാത്രിയിൽ നായ്ക്കളുമായി തിരിച്ചെത്തി അക്രമം നടത്തുകയായിരുന്നു. 4 ജർമൻ ഷെപ്പേർഡ് നായ്ക്കളും കയ്യിൽ വടിവാളുകളുമായി വന്ന അവർ റസ്റ്ററന്റിന്റെ ചില്ലുകൾ അടിച്ചു തകർത്തു. മാത്രമല്ല ലോക്കൽ ബാറിനുള്ളിൽ വടിവാൾ വീശി ആൾക്കാരെ ഓടിച്ചു. കംപ്യൂട്ടറുകളും മറ്റ് ഉപകരണങ്ങളും അടിച്ചുതകർക്കുകയും വധഭീഷണി മുഴക്കുകയും ചെയ്തു.