ക്ഷേത്രദര്‍ശനം കഴിഞ്ഞ് മടങ്ങുകയായിരുന്ന തട്ടാന്‍പടി സ്വദേശിനി വസന്തകുമാരിയുടെ മൂന്നര പവന്റെ മാല അപഹരിച്ച് കടന്നുകളഞ്ഞ മോഷണ സംഘത്തെക്കുറിച്ച് വിവരം നൽകുന്നവർക്ക് പാരിതോഷികം പ്രഖ്യാപിച്ച് പൊന്നാനി പോലീസ്. രാവിലെ 9ന് ആണ് മാണൂര്‍ വില്ല റോഡിലൂടെ നടന്നുപോകുകയായിരുന്ന മുഞ്ഞത്ത് നാരായണന്‍ കുട്ടിയുടെ ഭാര്യ ശോഭനയുടെ മാല ബൈക്കിലെത്തിയ മോഷ്ടാക്കള്‍ പൊട്ടിക്കാന്‍ ശ്രമിച്ചത്. പിടിവലിക്കിടെ മാല വേര്‍പെട്ട് റോഡില്‍ വീണതോടെ സംഘം രക്ഷപ്പെട്ടു.

അല്‍പസമയത്തിനുള്ളില്‍ തണ്ടിലത്തും സമാനമായ രീതിയില്‍ മാല പൊട്ടിക്കാന്‍ ശ്രമം നടന്നു. യുവതിയുടെ കരച്ചില്‍കേട്ട് നാട്ടുകാര്‍ ഓടിയെത്തിയപ്പോഴേയ്ക്കും മോഷ്ടാക്കള്‍ സ്ഥലംവിട്ടിരുന്നു. സമീപത്തെ സിസിടിവി ദൃശ്യങ്ങളിലാണ് മോഷ്ടാക്കളുടെ ചിത്രം പതിഞ്ഞത്. ഇതോടെ മാല മോഷ്ടാക്കളെക്കുറിച്ച് വിവരം കൈമാറുന്നവർക്ക് പൊന്നാനി പോലീസ് പാരിതോഷികം പ്രഖ്യാപിക്കുകയായിരുന്നു.

നേരത്തേയും സമാനമായ രീതിയിൽ മാല മോഷണം നടന്നിരുന്നു. അന്നും പാരിതോഷികം പ്രഖ്യാപിച്ച് അന്വേഷണം വ്യാപിപ്പിക്കുകയും ചെയ്തു. ഇതിന്റെ അടിസ്ഥാനത്തിൽ ലഭിച്ച വിവരത്തിന്റെ അടിസ്ഥാനത്തിൽ പ്രതികളെ പിടികൂടിയിരുന്നു. സൂചന നൽകുന്നവരുടെ വിവരങ്ങൾ രഹസ്യമായി സൂക്ഷിക്കുമെന്നും സിഐ അറിയിച്ചു.