കൂടത്തായി കൊലപാതക പരമ്പര കേസിന് നിറം പിടിക്കുകയാണ്. ജോളിയുടെ യാത്രകളാണ് ഇപ്പോള്‍ ചര്‍ച്ചയാകുന്നത്. മാത്യുവിനും ബിഎസ്എന്‍എല്‍ ജീവനക്കാരന്‍ ജോണ്‍സണും പുറമേ ജോളിയുടെ സൗഹൃദ പട്ടികയിലേക്ക് ഒരു അദ്ധ്യാപകന്‍ കൂടി എത്തിയതോടെ ഇവരുടെ കേരളത്തിന് പുറത്തേക്കുള്ള യാത്രകളും പോലീസ് അന്വേഷിക്കുകയാണ്.

സുഹൃത്തായ അദ്ധ്യാപകനും ബന്ധു എംഎസ് മാത്യുവിനും ഒപ്പം ജോളി നിരവധി തവണ കോയമ്പത്തൂരിലേക്കും ചെന്നൈയിലേക്കും യാത്ര ചെയ്തിരുന്നതായി കണ്ടെത്തിയിട്ടുണ്ട്. പതിനൊന്നു തവണ ഇങ്ങിനെ യാത്ര ചെയ്ത ജോളി ഇവിടെ താമസിക്കുകയും ചെയ്തു. അദ്ധ്യാപക പരിശീലനത്തിനെന്ന് പറഞ്ഞായിരുന്നു എത്തിയിരുന്നത്. അദ്ധ്യാപകവൃത്തിയുടെ ഭാഗമായിട്ടുള്ള അനിവാര്യയാത്ര എന്നു പറഞ്ഞ് വീട്ടുകാരെ തെറ്റിദ്ധരിപ്പിക്കുകയും ചെയ്തിരുന്നു. ഈ സാഹചര്യങ്ങളില്‍ വീട്ടുകാര്‍ക്ക് ഫോണ്‍ വിളിക്കുന്നതിന് പോലും നിയന്ത്രണവും ജോളി വെച്ചിരുന്നു. വസ്ത്രങ്ങള്‍ വാങ്ങുക, സ്ഥലം കാണുക എന്നിവയായിരുന്നു തങ്ങളുടെ ലക്ഷ്യമെന്നാണ് ജോളിയുടെ മൊഴി.

11 യാത്രകളില്‍ രണ്ടു തവണ ചെന്നൈയിലെ സുഹൃത്തായ അദ്ധ്യാപകന്‍ കൂടെയുണ്ടായിരുന്നു. രണ്ടു തവണ മാത്യൂവും ജോളിക്കൊപ്പം യാത്ര ചെയ്തു. യാത്രയ്ക്ക് രണ്ടു ദിവസം പരിശീലനത്തിന് രണ്ടു ദിവസം എന്ന രീതിയില്‍ വിശ്വസിപ്പിച്ചായിരുന്നു യാത്രകള്‍. ഇതിന് പുറമേയാണ് ബിഎസ്എന്‍എല്‍ ജീവനക്കാരന്റെ കുടുംബാംഗങ്ങള്‍ക്ക് ഒപ്പം ഊട്ടിയിലും കൊടൈക്കനാലിലും പോയത്. അതേസമയം സ്ഥലം കാണല്‍, വസ്ത്രവും സൗന്ദര്യവസ്തുക്കള്‍ വാങ്ങലും ആയിരുന്നു ഇതിന്റെ ലക്ഷ്യമെന്ന ജോളിയുടെ മൊഴി പോലീസ് വിശ്വസിച്ചിട്ടില്ല.

അതേസമയം വെറും യാത്രയ്ക്ക് അപ്പുറത്ത് കൂടുതല്‍ സൗഹൃദങ്ങളോ മറ്റെന്തെങ്കിലും ലക്ഷ്യമോ ജോളിക്ക് ഉണ്ടായിരുന്നതായി പോലീസ് പരിശോധിക്കുന്നുണ്ട്്. സംഭവത്തില്‍ ജോളി കൊലപ്പെടുത്തിയ ആറു പേരുടെ മരണവുമായി ബന്ധപ്പെട്ട് വ്യത്യസ്ത കേസുകളാണ് പോലീസ് റജിസ്റ്റര്‍ ചെയ്തിരിക്കുന്നത്. ഇതില്‍ റോയിയുടെ മരണവുമായി ബന്ധപ്പെട്ട കേസിലെ അന്വേഷണം മാത്രമാണ് നടന്നിട്ടുള്ളത്. മറ്റുള്ള കേസുകളിലും ജോളി പ്രതിയാണെന്ന് കണ്ടെത്തിയിരിക്കുന്നതിനാല്‍ ഇതിലെല്ലാം ജോളിയെ വീണ്ടും കസ്റ്റഡിയില്‍ വാങ്ങാന്‍ തടസ്സമുണ്ടാകില്ല. ഒരു കേസ് തീരുന്ന മുറയ്ക്ക് അടുത്ത കേസില്‍ അറസ്റ്റു ചെയ്ത് കസ്റ്റഡിയില്‍ വാങ്ങും. അതിനിടയില്‍ ചോദ്യം ചെയ്യലിനോട് ജോളി നിസഹകരണം കാട്ടുകയും ചെയ്തു.

ഇന്നലെ നടന്ന ചോദ്യം ചെയ്യലില്‍ തനിക്ക് ശാരീരിക ബുദ്ധിമുട്ടുണ്ടെന്ന് ഇവര്‍ പറഞ്ഞതിനെ തുടര്‍ന്ന് ഇവരെ വൈദ്യ പരിശോധനയ്ക്ക് വിധേയമാക്കി. എന്നാല്‍ പരിശോധനയില്‍ കാര്യമായ പ്രശ്‌നം കണ്ടെത്തിയില്ല. ഇതോടെ ശാരീരിക ബുദ്ധിമുട്ട് പറഞ്ഞ് ചോദ്യം ചെയ്യലില്‍ നിന്നും ഒഴിഞ്ഞു നില്‍ക്കാനുള്ള ശ്രമമാണ് ജോളി നടത്തുന്നതെന്ന് പോലീസ് കണ്ടെത്തിയിരിക്കുകയാണ്.

അതേസമയം പ്രതികളായ ജോളി, എംഎസ് മാത്യൂ, പ്രജികുമാര്‍ എന്നിവരെ ഇന്ന് വൈകിട്ട് താമരശ്ശേരി കോടതിയില്‍ ഹാജരാക്കും. മൂന്ന് പ്രതികളുടെയും കസ്റ്റഡി കാലാവധി ഇന്ന് അവസാനിക്കും. പ്രതികളില്‍ നിന്നും കൂടുതല്‍ കാര്യങ്ങള്‍ വ്യക്തമാകേണ്ടതുണ്ടെന്നും ഇതിനായി കൂടുതല്‍ ചോദ്യം ചെയ്യല്‍ നടത്തേണ്ടതുണ്ടെന്നുമാണ് പോലീസ് വ്യക്തമാക്കിയിരിക്കുന്നത്. ജോളിയെ പരമാവധി ദിവസം കസ്റ്റഡിയില്‍ വെയ്ക്കാനുള്ള നിയമപരമായ നീക്കമാണ് അന്വേഷണ സംഘം നടത്തുന്നത്.