ദ്വിദിന സന്ദര്ശനത്തിനായി നെതര്ലന്ഡ്സ് രാജാവും രാജ്ഞിയും കൊച്ചിയില് എത്തി
നെതര്ലാന്ഡ്സ് രാജാവ് വില്യം അലക്സാണ്ടറും രാജ്ഞി മാക്സിമയും രണ്ടു ദിവസത്തെ കേരള സന്ദര്ശനത്തിനു തുടക്കം കുറിച്ചുകൊണ്ട് കൊച്ചിയില് എത്തി. കേരളീയ പരമ്പരാഗത ശൈലിയിലുള്ള വരവേല്പ്പാണു രാജാവിനും രാജ്ഞിക്കും വിമാനത്താവളത്തില് ഒരുക്കിയിരുന്നത്. സ്വീകരണങ്ങള് ഏറ്റുവാങ്ങിയശേഷം കൊച്ചി വിമാനത്താവളത്തില് നിന്ന് റോഡ്മാര്ഗം അവര് മട്ടാഞ്ചേരിയിലേക്ക് പോയി.
ഇന്നലെ ഉച്ചയ്ക്ക് കൊച്ചി രാജ്യാന്തര വിമാനത്താവളത്തിലെത്തിയ നെതര്ലാന്ഡ്സ് രാജാവിനെയും രാജ്ഞിയെയും ഗവര്ണര് ആരിഫ് മുഹമ്മദ് ഖാനും പത്നി രേഷ്മ ആരിഫ് മുഹമ്മദ് ഖാനും സംസ്ഥാന വിദ്യാഭ്യാസ വകുപ്പ് മന്ത്രി പ്രഫ. സി രവീന്ദ്രനാഥും ചേര്ന്നു സ്വീകരിച്ചു.
ചീഫ് സെക്രട്ടറി ടോം ജോസ്, സംസ്ഥാന പോലീസ് മേധാവി ലോക്നാഥ് ബെഹ്റ, പൊതുഭരണ വകുപ്പ് സെക്രട്ടറി വിശ്വനാഥ് സിന്ഹ, എറണാകുളം ജില്ലാ കലക്ടര് എസ്. സുഹാസ്, ജില്ലാ പോലീസ് മേധാവി കാര്ത്തിക്. കെ എന്നിവര് സന്നിഹിതരായിരുന്നു.
മന്ത്രി കടന്നപ്പള്ളി രാമചന്ദ്രന്റെയും കൊച്ചി മേയര് സൗമിനി ജയിന്റെയും നേതൃത്വത്തിലാണ് ഡച്ച് വാസ്തുവിദ്യയില് നവീകരിച്ച കൊട്ടാരത്തിലേക്ക് രാജാവിനെയും രാജ്ഞിയെയും സ്വീകരിച്ചത്.
കൊട്ടാരത്തിലെ സ്വീകരണശാല, കിരീടധാരണശാല, മഹാരാജാക്കന്മാരുടെ ഉറക്കറ, പല്ലക്ക് തുടങ്ങിയവ രാജദമ്പതികള് വീക്ഷിച്ചു. കൊട്ടാരത്തിന്റെ ഘടന, വാസ്തുവിദ്യ, കൊത്തുപണി എന്നിവയില് രാജാവ് വിസ്മയം പ്രകടിപ്പിച്ചു. 'ഇന്ത്യയും നെതര്ലന്ഡ്സും: ഇന്നലെ, ഇന്ന്, നാളെ' എന്ന വിഷയത്തില് കൊട്ടാരത്തിലെ ഛായാചിത്ര ഹാളില് നടന്ന സെമിനാറില് ഇരുവരും പങ്കെടുത്തു. കേരളത്തില് ഡച്ച് അധിനിവേശത്തിന്റെ സംഭാവനകള് അടിസ്ഥാനമാക്കി സംസ്ഥാന പുരാവസ്തു വകുപ്പ് തയാറാക്കിയ ഡോക്യുമെന്ററി ഇരുവരും കണ്ടു.
നൂറ്റാണ്ടുകള്ക്കു മുമ്പ് ഡച്ചുകാര് തയാറാക്കിയ കേരള ഭൂപടത്തിന്റെ പ്രദര്ശനം കൊട്ടാരത്തില് വില്യം രാജാവ് ഉദ്ഘാടനം ചെയ്തു. രാജസന്ദര്ശനത്തിന്റെ ഭാഗമായി കൊട്ടാരത്തിലെ ഡച്ച് ഗാലറിയില് നെതര്ലാന്ഡ്സ് നാഷണല് ആര്ക്കൈവ്സ് മുന്കൈയെടുത്താണ് ഭൂപടങ്ങള് സ്ഥാപിച്ചത്.
വ്യാപാരബന്ധങ്ങളുടെ ഭാഗമായി ഇരുരാജ്യങ്ങളുടെയും കൈവശമുള്ള പുരാരേഖകള് പരസ്പരം കൈമാറുന്നതിനുള്ള ധാരണാപത്രത്തില്ഇരു രാജ്യങ്ങളും ഒപ്പിട്ടു. കേരള ആര്ക്കൈവ്സ് ഡയറക്ടര് ജെ. രജികുമാര്, നെതര്ലാന്ഡ്സ് നാഷണല് ആര്ക്കൈവ്സ് ഡയറക്ടര് ഡി.ജി. മറെന്സ് ഏഞ്ചല്ഹാഡ് എന്നിവരാണ് ധാരണാപത്രത്തില് ഒപ്പിട്ടത്. രാജാവും രാജ്ഞിയും അതിന് സാക്ഷ്യം വഹിച്ചു. പരസ്പര സഹകരണത്തിന്റെ പാതയിലൂടെയുള്ള നെതര്ലന്ഡ്സിന്റേയും ഇന്ത്യയുടേയും പ്രയാണം തുടരുമെന്ന് നെതര്ലാന്ഡ്സ് രാജാവ് വില്യം അലക്സാണ്ടര് പറഞ്ഞു.
മട്ടാഞ്ചേരിയിലെ കൊട്ടാരത്തില് ഇരുരാജ്യങ്ങളും ധാരണാപത്രം ഒപ്പിടുന്ന ചടങ്ങില് മന്ത്രി സി. രവീന്ദ്രനാഥ്, വിദേശകാര്യ മന്ത്രാലയ സ്പെഷല് ഓഫീസര് മന്ജീത് സിങ്, പൊതുഭരണ വകുപ്പ് സെക്രട്ടറി വിശ്വനാഥ് സിന്ഹ, ഐ.ജി. വിജയ് സാക്കറേ, ഡെപ്യൂട്ടി പോലീസ് കമ്മിഷണര് ജി.പൂങ്കുഴലി, അസി. കലക്ടര് എം.എസ്. മാധവിക്കുട്ടി, സംസ്ഥാന പുരാവസ്തു വകുപ്പ് പ്രിന്സിപ്പല് സെക്രട്ടറി ഡോ.വി.വേണു, അഡീ.സെക്രട്ടറി കെ.ഗീത, ഡച്ച് സന്ദര്ശനത്തിന്റെ പ്രോജക്ട് ലീഡര് പെട്ര സ്മള്ഡേഴ്സ്, പ്രോഗ്രാം ഡയറക്ടര്മാരായ ജിന്ന സ്മിത്ത്, പോള് മൂര്സ്, പ്രോഗ്രാം മാനേജര് ജോന് വാന് ലെന്ഗന്, ആര്ക്കിയോളജിക്കല് സര്വേ ഓഫ് ഇന്ത്യ ജോയന്റ് ഡയറക്ടര് ഡോ.എം. നമ്പിരാജന്, സൂപ്രണ്ട് കെ.പി. മോഹന്ദാസ് തുടങ്ങിയവര് പങ്കെടുത്തു.
https://www.facebook.com/Malayalivartha
