വറ്റിവരണ്ട തലയോട്ടിയില്‍ നിന്ന് എന്ത് ഭരണപരിഷ്‌കാരമാണ് ഈ രാജ്യത്ത് വരേണ്ടതെന്ന് മുന്‍മുഖ്യമന്ത്രി വി.എസ് അച്യൂതാനന്ദനെ അധിക്ഷേപിച്ച കെ.പി.സി.സി വര്‍ക്കിങ് പ്രസിഡന്റ് കെ.സുധാകരനെതിരെ വ്യാപക പ്രതിഷേധം. വി.എസിനെതിരെ നടത്തിയ വ്യക്തി അധിക്ഷേപം കോണ്‍ഗ്രസിന്റെ രാഷ്ട്രീയ നെറികേടാണെന്ന് ഡി.വൈ.എഫ്.ഐ സംസ്ഥാന സെക്രട്ടറിയേറ്റ് പ്രസ്താവനയില്‍ പറഞ്ഞു.

ഇത് തികച്ചും അപലപനീയമാണ്. ഇന്ത്യയിലെ തല മുതിര്‍ന്ന രാഷ്ട്രീയ നേതാക്കളില്‍ ഒരാളാണ് വി.എസ്. കോണ്‍ഗ്രസ്സ് ദേശീയ നേതാവ് രാഹുല്‍ ഗാന്ധി പോലും അദ്ദേഹത്തിനെതിരെ അധിക്ഷേപ പരാമര്‍ശം നടത്താനിടയില്ല. കേരളത്തിലെ കോണ്ഗ്രസ്സ് നേതാക്കളെ ബാധിച്ചിരിക്കുന്ന അഹങ്കാരവും ധാര്‍ഷ്ട്യവുമാണ് സുധാകരന്റെ പ്രസംഗത്തില്‍ പ്രതിഫലിക്കുന്നത്. ഇടതുപക്ഷ സ്ഥാനാര്‍ഥികളെയും ഇടതു നേതാക്കളെയും വ്യക്തിപരമായി അധിക്ഷേപിക്കുക എന്ന നയമാണ് ഉപതെരെഞ്ഞെടുപ്പുമായി ബന്ധപ്പെട്ട് ആദ്യഘട്ടം മുതല്‍ കൊണ്‌ഗ്രെസ്സ് സ്വീകരിച്ച് വരുന്നത്.

ഇതിന്റെ തുടര്‍ച്ചയാണ് സഖാവ് വി.എസ് നെതിരെ നടത്തിയ പരാമര്‍ശം. പ്രതിപക്ഷ നേതാവ്, കെ.പി.സി.സി പ്രസിഡന്റ് ഉള്‍പ്പെടെയുള്ളവര്‍ ഇതില്‍ പ്രതികരിക്കണം. സര്‍ക്കാരിന്റെ വികസന നേട്ടങ്ങള്‍ ഉയര്‍ത്തിക്കാട്ടി എല്‍.ഡി.എഫ് ഉപതെരഞ്ഞടുപ്പിന്റെ പ്രചാരണ രംഗത്ത് കളം നിറഞ്ഞപ്പോള്‍ പാലാ ഉപതിരഞ്ഞെടുപ്പ് തോല്‍വി ആവര്‍ത്തിക്കുമെന്ന ഭീതിയില്‍ വിറളിപൂണ്ടാണ് ഇത്തരം വ്യക്തിഹത്യകളിലേക്ക് യു.ഡി.എഫ് തിരിയുന്നത്. ഇടതുപക്ഷ ഭരണത്തിനെതിരെ അരോപണങ്ങള്‍ പോലും ഉന്നയിക്കാന്‍ സാധിക്കാത്ത സാഹചര്യത്തില്‍ രാഷ്ട്രീയം പറയാതെ കേവലം വ്യക്തി പരമായ ആരോപണങ്ങളിലേക്ക് തരംതാഴുകയാണ് യു.ഡി.എഫ്. കേരളത്തിലെ പ്രബുദ്ധ ജനത ഇത് തിരി ച്ചറിയുമെന്നും ഇതിനെതിരായ വിധിയെഴുത്തായിരിക്കും ഉപതിരഞ്ഞെടുപ്പില്‍ പ്രതിഫലിക്കാന്‍ പോകുന്നതെന്നും ഡി.വൈ.എഫ്.ഐ പ്രസ്താവനയില്‍ പറഞ്ഞു.

വട്ടിയൂര്‍ക്കാവില്‍ യു.ഡി.എഫ് സ്ഥാനാര്‍ഥി കെ.മോഹന്‍കുമാറിന് വേണ്ടി പ്രചാരണം നടത്തവെയാണ് അധിഷേപിച്ചത്. ' യുവാവായ അച്യുതാനന്ദന്റെ കയ്യില്‍ ഭരണപരിഷ്‌കാര കമ്മീഷന്‍ ലഭിച്ചപ്പോള്‍ നങ്ങളൊക്കെ എന്തൊക്കെയോ പ്രതീക്ഷിക്കില്ലേ. മലബാറിലൊരു പഴമൊഴിയുണ്ട്. അറുപതില്‍ അത്തും പിത്തും, എഴുപതില്‍ ഏടാ പൂടാ, എണ്‍പതില്‍ എടുക്ക് ബെക്ക്, തൊണ്ണൂറില്‍ എടുക്ക് നടക്കെന്നാ. ഇതിപ്പോ 96 ആണ്. കമ്മീഷന്‍ 10 കോടി ചെലവഴിച്ചതിലൂടെ എന്തു നേട്ടമാണ് സംസ്ഥാനത്ത് ഉണ്ടായതെന്നും സുധാകരന്‍ ചോദിച്ചിരുന്നു.