കടലക്കറിയില്‍ പുറംതോട് സഹിതമുള്ള ഒച്ചിനെ കണ്ടെത്തിയതോടെ തിരുവനന്തപുരം നഗരത്തിലെ വഴുതക്കാട്ടുള്ള ഐശ്വര്യ എന്ന വെജിറ്റേറിയന്‍ ഹോട്ടല്‍ നഗരസഭയും ഫുഡ് സേഫ്റ്റി അധികൃതരും ചേര്‍ന്ന് താല്‍ക്കാലികമായി അടപ്പിച്ചു. രാവിലെ ആഹാരം കഴിക്കാനെത്തിവര്‍ വായില്‍ കല്ല് പോലെ എന്തോ കടിച്ചതോടെ നടത്തിയ പരിശോധനയിലാണ് ഒച്ചിനെ കണ്ടെത്തിയത്. ഇവര്‍ ബഹളം ഉണ്ടാക്കിയെങ്കിലും ഹോട്ടല്‍ ഉടമയും ജീവനക്കാരും പ്രശ്‌നം ഒത്തുതീര്‍പ്പാക്കാന്‍ ശ്രമം നടത്തി. നഗരസഭാ ആരോഗ്യവിഭാഗവും ഫുഡ്‌സേഫ്റ്റി അധികൃതരും പരാതിയെ തുടര്‍ന്ന് പരിശോധന നടത്തി. പഴകിയ തൈരും മറ്റ് കറികളും പിടിച്ചെടുത്ത് നശിപ്പിച്ചു. വൃത്തിഹീനമായ അന്തരീക്ഷത്തിലാണ് ഭക്ഷണം പാകം ചെയ്യുന്നതെന്നും കണ്ടെത്തി.

തുടര്‍ന്നാണ് ഹോട്ടല്‍ അടപ്പിച്ചത്. തിരുവനന്തപുരം നഗരഹൃദയത്തിലെ പ്രസിദ്ധമായ വെജിറ്റേറിയന്‍ ഹോട്ടലാണ് ഐശ്വര്യ. വനംവകുപ്പിന്റെ ആസ്ഥാനവും ആകാശവാണി തിരുവനന്തപുരം നിലയവും രജിസ്‌ട്രേഷന്‍ ഓഫീസും ഉള്‍പ്പെടുന്ന സ്ഥലമാണ് വഴുതക്കാണ്. ദിവസവും നിരവധി പേരാണ് ഐശ്വര്യയില്‍ ആഹാരം കഴിക്കാനെത്തുന്നത്. കുറേ നാള്‍ മുമ്പ് വെള്ളയമ്പലം കെ.പി.സി.സി ഓഫീസിന് അടുത്തുള്ള പിസ കോര്‍ണറില്‍ നിന്ന് ഹോം ഡെലിവറിയായി വാങ്ങിയ പിസയില്‍ ബബിള്‍ഗം കണ്ടെത്തിയതിത് വിവാദമായിരുന്നു. പരാതിയെ തുടര്‍ന്ന് പിസ കോര്‍ണര്‍ അടച്ചിട്ടിരുന്നു. പിസ ഉണ്ടാക്കിയ ആള്‍ ബബിള്‍ഗം കഴിച്ചിരുന്നെന്നാണ് നിഗമനം.

കഴിഞ്ഞമാസം ഭക്ഷ്യസുരക്ഷ ഉറപ്പു വരുത്തുന്നതിന്റെ ഭാഗമായി ഹോട്ടലുകളിലും റെസ്റ്റാറന്റുകളിലും സംസ്ഥാന വ്യാപകമായി നടത്തിയ പരിശോധനയില്‍ 1722 സ്ഥാപനങ്ങള്‍ക്ക് നോട്ടീസ് നല്‍കിയിരുന്നു. 17,99,500 രൂപ പിഴ ഈടാക്കിയിരുന്നു. 252 സ്ഥാപനങ്ങളില്‍ നിന്നാണ് പിഴ ഈടാക്കിയത്. 4625 സ്ഥാപനങ്ങളിലാണ് പരിശോധന നടത്തിയത്. തീര്‍ത്തും വൃത്തിഹീനമായ അന്തരീക്ഷത്തില്‍ പ്രവര്‍ത്തിച്ച 52 സ്ഥാപനങ്ങളുടെ പ്രവര്‍ത്തനം നിര്‍ത്തിവെപ്പിച്ചിരുന്നു. ഓണത്തോട് അനുബന്ധിച്ചായിരുന്നു പരിശോധന.

തിരുവനന്തപുരം ജില്ലയില്‍ 375 സ്ഥാപനങ്ങളില്‍ നടത്തിയ പരിശോധനയില്‍ 1,68,000 രൂപ പിഴ ഈടാക്കി. 220 സ്ഥാപനങ്ങള്‍ക്ക് നോട്ടീസ് നല്‍കുകയും 11 സ്ഥാപനങ്ങളുടെ പ്രവര്‍ത്തനം നിര്‍ത്തിവെപ്പിക്കുകയും ചെയ്തിരുന്നു. കൊല്ലത്ത് 156 സ്ഥാപനങ്ങള്‍ക്ക് നോട്ടീസ് നല്‍കി. ഒന്‍പത് സ്ഥാപനങ്ങളുടെ പ്രവര്‍ത്തനം നിര്‍ത്തിവെപ്പിച്ചു. പത്തനംതിട്ടയില്‍ 84 സ്ഥാപനങ്ങള്‍ക്ക് നോട്ടീസ് നല്‍കി. ഒരു സ്ഥാപനം അടപ്പിച്ചു.
ആലപ്പുഴയില്‍ 129 സ്ഥാപനങ്ങള്‍ക്ക് നോട്ടിസ് നല്‍കി. എട്ട് സ്ഥാപനങ്ങള്‍ താല്‍ക്കാലികമായി അടപ്പിച്ചു. ഇടുക്കിയില്‍ 48 സ്ഥാപനങ്ങള്‍ക്ക് നോട്ടീസ് നല്‍കി. എറണാകുളത്ത് 218 സ്ഥാപനങ്ങള്‍ക്ക് നോട്ടീസ് നല്‍കി. 12 സ്ഥാപനങ്ങളുടെ പ്രവര്‍ത്തനം നിര്‍ത്തിവെപ്പിച്ചു. തൃശ്ശൂരില്‍ 34ലും പാലക്കാട് 106 സ്ഥാപനങ്ങള്‍ക്കും നോട്ടീസ് നല്‍കി.

ഭക്ഷ്യസുരക്ഷ ലൈസന്‍സോ ഇല്ലാതെ ഭക്ഷ്യവസ്തുക്കള്‍ കൈകാര്യം ചെയ്യുന്ന ഏതെങ്കിലും സ്ഥാപനം ശ്രദ്ധയില്‍പ്പെടുകയാണെങ്കില്‍ ടോള്‍ഫ്രീ നമ്പരിലോ തൊട്ടടുത്ത ഭക്ഷ്യസുരക്ഷാ കാര്യാലയങ്ങളിലോ വിവരം അറിയിക്കണമെന്ന് ഭക്ഷ്യസുരക്ഷാ കമ്മീഷണര്‍ അറിയിച്ചു. ചൂട് ആഹാരങ്ങള്‍ പ്ലാസ്റ്റിക്ക് കവറുകളില്‍ ഒഴിവാക്കണം. അനുവദനീയമായ ഫുഡ് ഗ്രേഡ് അലുമിനിയം ഫോയില്‍ കവറുകളില്‍ മാത്രം ഭക്ഷണ സാധനം പാഴ്‌സല്‍ ആക്കി നല്‍കാന്‍ അനുവദിച്ചിട്ടുള്ളു. ആഹാര സാധനങ്ങള്‍ പൊതിയുവാനോ സൂക്ഷിക്കുവാനോ അടയ്ക്കുവാനോ ന്യൂസ് പേപ്പര്‍ കര്‍ശനമായി ഉപയോഗിക്കുവാനോ പാടില്ല. കര്‍ശനമായ പരിശോധന സംസ്ഥാന വ്യാപകമായി തുടരുമെന്നും കമ്മീഷണര്‍ അറിയിച്ചു.