മണ്ഡല മകരവിളക്ക് പൂജകള്‍ക്കായി നാളെ ശബരിമല നട തുറക്കും. ശബരിമല വീണ്ടും ശ്രദ്ധാകേന്ദ്രമാകുന്നു. രണ്ടു മാസത്തിലധികം നീളുന്ന മണ്ഡല, മകരവിളക്ക് തീര്‍ഥാടനകാലത്തിനു മുന്നോടിയായി നാളെ നട തുറക്കും. യുവതീ പ്രവേശന വിധിക്ക് സ്റ്റേ ഇല്ലെങ്കിലും കഴിഞ്ഞ മണ്ഡലകാലത്ത് ഒരുക്കിയ കനത്ത സുരക്ഷാ ക്രമീകരണങ്ങള്‍ തല്‍ക്കാലം ഇത്തവണ ശബരിമലയില്‍ വേണ്ടെന്നാണ് പോലീസ് തീരുമാനം.

ശബരിമല ക്ഷേത്രത്തില്‍ യുവതി പ്രവേശനവുമായി ബന്ധപ്പെട്ട് കഴിഞ്ഞ ഒരു വര്‍ഷത്തിലേറെയായി തുടരുന്ന വിഷയങ്ങള്‍ ഇന്നലത്തെ സുപ്രീംകോടതി വിധിയോടെ വീണ്ടും സജീവമാകുകയും ചെയ്തു. 2018 സെപ്റ്റംബര്‍ 28ന് സുപ്രീംകോടതിയുടെ ഭരണഘടനാ ബഞ്ച് ശബരിമല ക്ഷേത്രത്തില്‍ യുവതീപ്രവേശനം അനുവദിച്ചു കൊണ്ടു പുറപ്പെടുവിച്ച ഉത്തരവിനെത്തുടര്‍ന്നുണ്ടായ വാദ കോലാഹലങ്ങളും നിയമപോരാട്ടങ്ങളുമാണ് ഇനിയും കെട്ടടങ്ങാത്തത്.

2018 - 19ലെ മണ്ഡല, മകരവിളക്ക് തീര്‍ഥാടനകാലത്തെ സംഘര്‍ഷഭരിതമാക്കിയതു യുവതീപ്രവേശനവുമായി ബന്ധപ്പെട്ട വിഷയങ്ങളായിരുന്നു. സമാനമായ സാഹചര്യം ഇത്തവണയും ഉണ്ടാകുമോയെന്ന ആശങ്ക ഇന്നലത്തെ വിധിയെത്തുടര്‍ന്നും ഉണ്ടായിക്കഴിഞ്ഞു. യുവതീ പ്രവശേന വിധി വന്നതിന് പിന്നാലെ സന്നിധാനത്ത് വനിതാ പൊലീസിനെ അടക്കം വിന്യസിച്ചായിരുന്നു കഴിഞ്ഞ സീസണില്‍ ശബരിമലയിലെ പൊലീസ് സുരക്ഷ. സന്നിധാനത്തും പമ്പയിലും രണ്ട് ഐജിമാരുടെ നേതൃത്വത്തില്‍ എസ്പി മാരെ അണിനിരത്തി ഒരുക്കിയത് വന്‍ ക്രമീകരണം. എന്നിട്ടും ഉണ്ടായത് സംഘര്‍ഷം.
എന്നാല്‍ യുവതീ പ്രവേശനത്തില്‍ സര്‍ക്കാര്‍ പഴയ പിടിവാശി വിട്ടതോടെ പൊലീസിന്റെ സമ്മര്‍ദ്ദം കുറഞ്ഞു. നാളെ വൈകുന്നേരം നട തുറക്കുന്നതിനു പിന്നാലെ പുതിയ ശബരിമല, മാളികപ്പുറം മേല്‍ശാന്തിമാരെ അവരോധിക്കുന്ന ചടങ്ങുകള്‍ നടക്കും. വൃശ്ചികപ്പുലരിയായ 17നു രാവിലെ നട തുറന്നു മണ്ഡലകാല പൂജകളാരംഭിക്കും. മണ്ഡലകാലവും മകരവിളക്കും കഴിഞ്ഞ് ജനുവരി 20 വരെ നീളുന്നതാണ് തീര്‍ഥാടനകാലം.